ເຈົ້າຄອງສັ່ງເຂັ້ມງວດໃນຄວາມປອດໄພໄລຍະບຸນປີໃໝ່ຊາວຈີນ-ຫວຽດນາມ

    ທ່ານເຈົ້າຄອງນະຄອນຫລວງວຽງຈັນ ສຸກັນ ມະຫາ ລາດ, ໄດ້ອອກແຈ້ງການສະບັບ ເລກທີ 001/ຈນວ, ລົງວັນທີ 27 ມັງກອນ 2014 ໃຫ້ທຸກພາກສ່ວນກ່ຽວຂ້ອງ, ພ້ອມກັນເຂັ້ມງວດໃນການຮັກສາຄວາມສະຫງົບປອດໄພໃນໄລຍະສະເຫລີມ ສະຫລອງບຸນປີໃຫມ່ຂອງພີ່ນ້ອງ ຊາວຈີນ ແລະ ຫວຽດນາມ ຢູ່ນະ ຄອນຫລວງວຽງຈັນ ໃຫ້ຖືກ ຕ້ອງຕາມຮີດຄອງປະເພ ນີມີຄວາມເບີກບານມ່ວນຊື່ນທັງຮັບປະກັນຄວາມປອດໄພ ແລະ ຄວາມເປັນລະບຽບຮຽບຮ້ອຍ ຄື: ການສະຫລອງບຸນດັ່ງ ກ່າວຕ້ອງສອດຄ່ອງກັບປະເພນີວັດທະນະທຳ, ມີບັນຍາກາດມ່ວນຊື່ນ, ມີຄວາມສາມັກຄີຮັກແພງຢ່າງເລິກເຊິ່ງຮັບປະກັນ ຄວາມສະຫງົບປອດໄພ ແລະ ເປັນລະບຽບຮຽບຮ້ອຍທັງຢູ່ໃນສະຖານທີ່ຈັດງານສະຫລອງ ແລະ ສະຖານທີ່ອື່ນໆ, ໃຫ້ບັນດາ ເມືອງ, ພະແນກການ, ຫ້ອງການ, ກົມກອງຕ່າງໆອ້ອມຂ້າງນະຄອນຫລວງວຽງຈັນມີແຜນປ້ອງກັນຄວາມສະຫງົບໃນຂອບ ເຂດທີ່ຕົນຮັບຜິດຊອບຢ່າງຕັ້ງຫນ້າ. ພ້ອມນັ້ນມອບໃຫ້ພະແນກອຸດສາຫະກຳ ແລະ ການຄ້ານະຄອນຫລວງວຽງຈັນ ກວດ ກາແກ້ໄຂການຈຳຫນ່າຍຫມາກກະໂພກ, ທາດແຕກ ແລະ ບັ້ງໄຟດອກບໍ່ໃຫ້ມີວາງຂາຍໃນທົ່ວນະຄອນຫລວງເດັດຂາດ ແລະ ມອບໃຫ້ກອງບັນຊາການປ້ອງກັນຄວາມສະຫງົບ, ກອງບັນຊາການທະຫານນະຄອນຫລວງວຽງຈັນຄຸ້ມຄອງບໍ່ໃຫ້ມີການ ຈູດຫມາກກະໂພກ, ການກໍ່ສຽງແຕກມອບໃຫ້ ປກສ ກຸ່ມບ້ານເປັນເຈົ້າການຕິດຕາມ, ຕັກເຕືອນ ແລະ ຫ້າມປະຊາຊົນບໍ່ໃຫ້ ກະທຳຜິດຕາມສິ່ງທີ່ມີການຫ້າມຄືດັ່ງກ່າວ.