ສະມາຄົມໂຮງແຮມ ແລະ ຮ້ານອາຫານຕີລາຄາການເຄື່ອນໄຫວວຍກງານສົກປີຜ່ານມາ

          ວັນທີ 15 ມັງກອນນີ້ສະ ມາຄົມໂຮມແຮມ ແລະ ຮ້ານອາຫານລາວໄດ້ຈັດ ກອງປະຊຸມຕີ ລາຄາການເຄື່ອນໄຫວວຽກງານຂອງຕົນໃນສົກປີຜ່ານມາຂຶ້ນຢູ່ໂຮງ ແຮມເມີກຽວ ນະຄອນຫຼວງວຽງຈັນ, ໂດຍການເຂົ້າຮ່ວມ ຂອງທ່ານ ຈະເລີນ ວາລິນທະລາສັກ ລັດຖະມົນຕີຊ່ວຍວ່າການກະຊວງຖະແຫຼ່ງຂ່າວວັດ ທະນະທຳ ແລະ ທ່ອງທ່ຽວ, ມີຄະນະບໍລິຫານສະ ມາຄົມໂຮງແຮມ ແລະ ຮ້ານອາຫານ, ພ້ອມພາກສ່ວນກ່ຽວຂ້ອງເຂົ້າຮ່ວມເປັນຈຳນວນຫຼາຍ.

           ໃນກອງປະຊຸມທ່ານ ອຸເດດ ສຸວັນນະວົງ ປະທານສະ ມາຄົມໂຮງແຮມ ແລະ ຮ້ານອາ ຫານລາວກ່າວວ່າ: ໃນໄລຍະ ຜ່ານມາສະມາຄົມໂຮງແຮມ ແລະ ຮ້ານອາຫານລາວໄດ້ເລີ່ມ ເຄື່ອນໄຫວວຽກງານຂອງຕົນ ຕາມພາລະບົດບາດ ແລະ ໜ້າທີ່ ທີ່ໄດ້ຖືກມອບໝາຍໄວ້ພາຍໃຕ້ ການຊີ້ນຳຂອງຄະນະບໍລິຫານງານ ແລະ ສະມາຊິກໄດ້ເຂົ້າ ຮ່ວມກິດຈະກິດຕ່າງໆເພື່ອສົ່ງ ເສີມ

ແລະ ພັດທະນາການທ່ອງທ່ຽວໃນຫຼາຍໆດ້ານເຊັ່ນ: ພັດທະນາການຕະຫຼາດໂດຍການສຸມໃສ່ປະຕິບັດວຽກງານເພື່ອໃຫ້ແທດ ເໝາະກັບວິໄສທັດ ແລະ ວັດຖຸປະສົງຂອງສະມາຄົມທີ່ໄດ້ຄາດເອົາໄວ້, ເຮັດໃຫ້ສະມາຄົມໂຮງແຮມ ແລະ ຮ້ານອາຫານລາວ ເປັນທີ່ຮັບຮູ້ຢ່າງກ້ວາງຂວາງທາງດ້ານມາດຕະຖານວິຊາຊີບ, ຄຸນນະພາບການບໍລິການ ແລະ ອຳນວຍຄວາມສະດວດໃຫ້ແກ່ ສະມາຊິກ ແລະ ບໍ່ແມ່ນສະມາຊິກ, ມີການພັດທະນາການຕະຫຼາດໃຫ້ເຂັ້ມແຂງໂດຍການສຸມໃສ່ໂຄສະນາໃນຮູບແບບຕ່າງໆ, ພ້ອມນັ້ນຍັງໄດ້ເອົາໃຈໃສ່ສ້າງບຸກຄະລາກອນ ແລະ ພັດທະນາສີມືແຮງງານໂດຍການຈັດອົບຮົມ ແລະ ຈັດກິດຈະກຳຕ່າງໆ ເພີ່ອເພີ່ມຄວາມຮູ້ໃຫ້ສະມາຊິກ ແລະ ເຮັດໃຫ້ວຽກງານປະສານສົມທົບລະຫວ່າງພາກລັດ ແລະ ເອກະຊົນຂອງໂຮງແຮມ, ຮ້ານອາຫານມີການພັດທະນາດີຂຶ້ນ ແລະ ເພີ່ມທະວີວຽກງານການພົວພັນກັບຕ່າງປະເທດເຮັດໃຫ້ ສະມາຄົມໂຮງແຮມ ແລະ ຮ້ານອາຫານລາວໄດ້ເຂົ້າເປັນສະມາຊິກສະມາຄົມໂຮງແຮມ, ຮ້ານອາຫານ ແລະ ທ່ອງທ່ຽວອາ ຊຽນນັບແຕ່ປີ 2003 ເປັນ ຕົ້ນມາ, ຊຶ່ງເປັນເງື່ອນໄຂໃຫ້ລາວໄດ້ເຂົ້າຮ່ວມທຸກໆກອງປະຊຸມ ແລະ ງານສະແດງ ATF ຢູ່ບັນດາປະເທດອາຊຽນຕະຫຼອດ ມາ.

          ທ່ານ ປະທານສະມາຄົມໂຮງແຮມ ແລະ ຮ້ານອາຫານລາວກ່າວວ່າ: ຄຽງຄູ່ກັບຜົນສຳ ເລັດ ແລະ  ຂໍ້ສະດວດດັ່ງກ່າວ ທາງສະມາຄົມພວກເຮົາກໍໄດ້ພົບກັບຂໍ້ຍຸ້ງຍາກຫຼາຍດ້ານເຊັ່ນ: ການຂະຫຍາຍສະມາຊິກຂອງສະມາຄົມໂດຍສະເພາະຢູ່ຕ່າງ ແຂວງມີຂໍ້ຈຳກັດຍ້ອນ, ນິຕິກຳຂອງສະມາຄົມ ແລະ ບັນດາກຸ່ມໂຮງແຮມ, ຮ້ານອາຫານຢູ່ລະດັບແຂວງບໍ່ສອດຄ່ອງກັນຈຶ່ງ ເຮັດໃຫ້ການປະສານສົມທົບເກັບເງິນຄ່າທຳນຽມຂອງຜູ້ເປັນສະມາຊິກແຕກຕ່າງກັນເຮັດໃຫ້ການພັດທະນາຂອງສະມາຄົມບໍ່ໄດ້ ທົ່ວເຖິງ, ການປັບປຸງເອກະ ສານ, ນິຕິກຳຂອງສະມາຄົມໃຫ້ ຖືກກັບມະຕິເລກທີ 115/ນຍ ແລະ ຄຳສັ່ງແນະນຳຂອງກະຊວງ ພາກໃນແມ່ນໃຊ້ເວລາດົນເຮັດ ໃຫ້ສະມາຄົມບໍ່ສາມາດເຄື່ອນ ໄຫວເປີດກອງປະຊຸມ ແລະ ຂະ ຫຍາຍສະມາຊຶກໄດ້, ການຂະ ຫຍາຍຕົວຂອງຈຳນວນໂຮງ ແຮມ ແລະ ຮ້ານອາຫານຕາມ ສະພາບຄວາມຕ້ອງການໃນແຕ່ ລະແຂວງ ແລະ ແຫຼ່ງທ່ອງທ່ຽວ ໄດ້ເຮັດໃຫ້ມີການແກ່ງແຍ້ງລະ ຫວ່າງໂຮງແຮມຫຼາຍຂຶ້ນນັບ ທັງດ້ານລາຄາ ແລະ ການບໍລິ ການ, ບັນດາໂຮງແຮມ ແລະ ຮ້ານອາຫານຍັງຂາດແຮງງານທີ່ມີສີມືໃນທຸກໆລະດັບ ແລະ ທຸກໆດ້ານເພື່ອບໍລິການໃນລະດັບສາກົນ, ກິດຈະກິດຂອງສະມາ ຄົມໂຮງແຮມ ແລະ ຮ້ານອາຫານ ຮ່ວມກັບສະພາອາຊີວະສຶກສາ ແຫ່ງຊາດ,ກະຊວງສຶກສາ, ກະ ຊວງແຮງງານ ແລະ ໂຄງການ LANITH ແມ່ນຍັງບໍ່ທັນພຽງພໍ.       

           ສະມາຄົມໂຮງແຮມ ແລະ ຮ້ານອາຫານລາວໄດ້ສ້າງຕັ້ງຂື້ນໃນປີ 1999 ໂດຍເປັນກຸ່ມທຸລະກິດພາຍໃຕ້ສະພາການຄ້າ ແລະ ອຸດສາຫະກຳແຫ່ງຊາດລາວ,ຈົນເຖິງປີ 2003 ກຸ່ມດັ່ງກ່າວໄດ້ຍົກຖານະຂຶ້ນມາເປັນສະມາຄົມພາຍໃຕ້ການຊີ້ນຳຂອງອົງ ການທ່ອງທ່ຽວຈົນເຖິງປັດຈຸບັນລວມມີສະມາຊິກທັງໝົດ 75 ຫົວໜ່ວຍໂຮງ ແຮມ ແລະ ຮ້ານອາຫານຕ່າງໆ.