ຊາວນາເມືອງທ່າແຂກເດືອດຮ້ານ ຍ້ອນພວກມືກາວລັກອຸປະກອນບັງຄັບໄຟຈັກສູບນ້ຳ

     ຊາວກະສິກອນທ່ານໜຶ່ງຢູ່ ເມືອງທ່າແຂກໄດ້ໂທລະສັບເຂົ້າມາຫາສຳນັກງານໜັງສືພິມລາວພັດທະນາ ໃນວັນທີ 14 ມັງກອນ ນີ້ວ່າ: ຊາວກະສິກອນຫຼາຍບ້ານໃນເຂດເມືອງທ່າແຂກແຂວງຄຳມ່ວນພວມຜະເຊີນກັບຄວາມເດືອດຮ້ອນຍ້ອນ ບໍ່ມີນ້ຳມາສະໜອງໃຫ້ແກ່ການຜະລິດລະດູແລ້ງ, ຫລັງຈາກມີພວກມືກາວ ໄດ້ມາລັກເອົາອຸປະກອນຕູ້ບັງຄັບໄຟ ແລະ ໝໍ້ແປງ ປະຈຳສະຖານີຈັກສູບນ້ຳບ້ານມ່ວງສຸມເມືອງທ່າແຂກແຕ່ເດືອນພະຈິກ 2013 ຜ່ານມາ, ມາຮອດປັດຈຸບັນຍັງບໍ່ມີພາກສ່ວນ ກ່ຽວຂ້ອງລົງໄປແກ້ໄຂໃຫ້ສາມາດດຳເນີນການສູບນ້ຳໄດ້ເທື່ອເຊິ່ງໃຫ້ເຫດຜົນວ່າ: ຍັງບໍ່ມີງົບປະມານພຽງພໍໃນການສ້ອມແປງ ຈຶ່ງເຮັດໃຫ້ຊາວກະສິກອນຫລາຍບ້ານບໍ່ໄດ້ລົງມືທຳການຜະລິດລະດູແລ້ງເທື່ອ ຍ້ອນບໍ່ມີນ້ຳຈາກຊົນລະປະທານດັ່ງກ່າວເຊິ່ງ ມີເນື້ອທີ່ການຜະລິດປະມານ 500-600 ເຮັກຕາ.

     ຕໍ່ບັນຫານີ້, ຫ້ອງການກະສິກຳ-ປ່າໄມ້ເມືອງທ່າແຂກໃຫ້ຮູ້ວ່າ: ຊົນລະປະທານມ່ວງສຸມມີຫົວງານຕັ້ງຢູ່ດ້ານຫລັງພະທາດ ສີໂຄດຕະບອງ ເມືອງທ່າແຂກໄດ້ກໍ່ສ້າງຕິດຕັ້ງຈັກສູບນ້ຳ ແຕ່ປີ 1986 ແລະ ສາມາດເປີດນຳໃຊ້ດູດນ້ຳສະໜອງໃຫ້ແກ່ການ

ຜະລິດກະສິກຳຂອງປະຊາຊົນໄດ້ຫລາຍຮ້ອຍເຮັກຕາໃນລະດູແລ້ງອັນໄດ້ຊ່ວຍໃຫ້ປະຊາຊົນມີສະບຽງອາຫານບໍລິໂພກພຽງພໍ ແລະ ຂາຍເປັນສິນຄ້າສ້າງລາຍຮັບເປັນຈຳນວນບໍ່ໜ້ອຍໃນແຕ່ ລະປີຜ່ານມາ, ແຕ່ຕົກມາຮອດ ໄລຍະເດືອນພະຈິກ 2013 ຜ່າ ນມານີ້, ເຄື່ອງອຸປະກອນສະຖາ ນີສູບນ້ຳດັ່ງກ່າວໂດຍສະເພາະ ແມ່ນຕູ້ບັງຄັບໄຟ, ໝໍ້ແປງໄຟ ທີ່ ມີມູນຄ່າສູງເຖິງ 160 ລ້ານ ກວ່າກີບຖືກຄົນຮ້າຍລັກໄປແບບບໍ່ສາມາດສືບຫາໄດ້ຈົນຮອດປັດຈຸບັນ. ດັ່ງນັ້ນ ປະຊາຊົນໃນເຂດໄດ້ຮັບຜົນກະທົບດັ່ງກ່າວ ຈຶ່ງຂໍຮຽກຮ້ອງມາຍັງພາກສ່ວນກ່ຽວຂ້ອງລົງຊ່ວຍປັບປຸງແກ້ໄຂເພື່ອຈະໄດ້ທຳການຜະລິດທ່ວງທັນລະດູການ.