laophatthananewspaper: ຍ້ອນຫຍັງ ລົດບັນທຸກນ້ຳໜັກເກີນຈຶ່ງແລ່ນໄດ້ຢ່າງງ່າຍດາຍ.

ພາຍຫລັງເກີດເຫດການຂົວຫັກໄລ່ເລ່ຍກັນໃນເດືອນມັງກອນນີ້ເຖິງສອງຈຸດ ຄືເມື່ອວັນທີ 5 ມັງກອນ 2014 ຂົວໄຮຢ່ອນ (ຂົວເຫລັກ) ເມືອງທຸລະຄົມ ແຂວງວຽງຈັນ ຫັກຍ້ອນມີລົດບັນທຸກຊີມັງ 60 ກວ່າໂຕນແລ່ນເຂົ້າ ແລະ ຕໍ່ມາໃນວັນທີ 17 ມັງກອນ 2014 ຂົວຂ້າມນ້ຳພະນາຍ (ຂົວເຫລັກ) ເມືອງທຸລະຄົມ ແຂວງວຽງຈັນ ກໍຫັກຍ້ອນລົດບັນທຸກສິນຄ້າໜັກກວ່າ 40 ໂຕນເຊັ່ນກັນ ໂດຍທັງສອງເຫດການນີ້ບໍ່ພຽງແຕ່ສ້າງຄວາມຫຍຸ້ງຍາກຕໍ່ການສັນຈອນໄປມາເປັນອຳມະພາດເທົ່ານັ້ນ, ແຕ່ຍັງສ້າງຄວາມເສຍຫາຍຕໍ່ຊັບສິນຂອງສ່ວນລວມນຳດ້ວຍ. ຂະນະດຽວກັນ ມັນສະທ້ອນໃຫ້ເຫັນວ່າ: ບັນຫາການສວຍໂອກາດຂົນສິນຄ້ານ້ຳໜັກເກີນຂອງລົດບັນທຸກທັງໃນຕົວເມືອງ ແລະ ທ້ອງຖິ່ນຍັງມີຫລາຍ ທັ້ງໆທີ່ລະບຽບໃນການຄຸ້ມຄອງ ແລະ ຈຸດຊັ່ງນ້ຳໜັກກໍມີຫລາຍແຫ່ງ, ແຕ່ກໍເກີດການເລັດລອດຈົນໄດ້.

ຕໍ່ບັນຫານີ້ ມີຫລາຍຫາງສຽງຂອງສັງຄົມເບິ່ງວ່າ: ໃນເບື້ອງໜຶ່ງແມ່ນເກີດຈາກຄວາມໂລບມາກໂລພາຂອງຜູ້ເປັນເຈົ້າຂອງລົດບັນທຸກທີ່ຕ້ອງການຂົນສິນຄ້າເປັນຈຳນວນຫລາຍ ເພື່ອໃຫ້ໄດ້ຄ່າຈ້າງຫລາຍ ແລະ ທັງປະຢັດເວລາ ແລະ ຕົ້ນທຶນ, ແຕ່ອີກມຸມໜຶ່ງເບິ່ງວ່າ: ຖ້າເຈົ້າໜ້າທີ່ກ່ຽວຂ້ອງຫາກເອົາໃຈໃສ່ໃນການຕິດຕາມກວດກາຢ່າງເຂັ້ມ ງວດ ບັນຫາແບບນີ້ອາດບໍ່ເກີດຂຶ້ນ, ແຕ່ທີ່ຍັງເຫັນລົດບັນທຸກດັ່ງກ່າວແລ່ນໄປມາໄດ້ຢ່າງງ່າຍດາຍຄືໃນທຸກວັນນີ້ ແມ່ນອາດມາຈາກການຖືເບົາຕໍ່ການກວດກາ, ບາງເທື່ອອາດມີການໃຫ້ສິນບົນຕໍ່ເຈົ້າໜ້າທີ່ກວດກາ ເພື່ອແລກກັບຄວາມສະດວກຕ່າງໆ.

ໃນໄລຍະຜ່ານມາ, ລັດຖະບານໄດ້ສຸມທຶນຮອນຢ່າງມະຫາສານ ເພື່ອປັບປຸງກໍ່ສ້າງພື້ນຖານໂຄງລ່າງ ໂດຍສະເພາະເສັ້ນທາງ ເພື່ອໃຫ້ການໄປມາ, ການຂົນສົ່ງສິນຄ້າໄດ້ຮັບຄວາມສະດວກສະບາຍຂຶ້ນ, ບາງເສັ້ນທາງມີມູນຄ່າການກໍ່ສ້າງສູງ, ແຕ່ການນຳໃຊ້ແມ່ນບໍ່ຍາວນານກຸ້ມຄ່າ ຍ້ອນເກີດມີສະພາບເປ່ເພໄວ, ສ່ວນໜຶ່ງແມ່ນເກີດຈາກລົດບັນທຸກທີ່ມີນ້ຳໜັກເກີນຜ່ານໄປມາເປັນຈຳນວນຫລາຍ ເຊິ່ງບັນຫານີ້ເບິ່ງຄືວ່າເປັນບັນຫາທີ່ພົບເຫັນກັນມາດົນແລ້ວ, ແຕ່ກໍຍັງສືບຕໍ່ປາກົດໃຫ້ເຫັນຈົນມາຮອດປັດຈຸບັນ ແລະ ສ້າງຄວາມເສຍຫາຍຄືດັ່ງກ່າວ. ດັ່ງນັ້ນ, ຖ້າພາກສ່ວນກ່ຽວຂ້ອງຖືເບົາຕໍ່ການກວດກາຕິດຕາມ ກໍຍິ່ງເຮັດໃຫ້ບັນຫາດັ່ງກ່າວສ້າງຄວາມເສຍຫາຍຕໍ່ຊັບສິນສ່ວນລວມຫລາຍຂຶ້ນເລື້ອຍໆ.