ມອບ-ຮັບ ແລະ ເປີດນຳໃຊ້ຫໍວັດ ທະນະທຳ ໄກສອນ ພົມວິຫານ ຂອງຂວັນຈາກ ສສ ຫວຽດນາມ

      ຫ້ອງວ່າການສູນພັກກອມມູນິດຫວຽດນາມສົມທົບກັບອຳນາດການປົກຄອງ ແຂວງສະຫວັນນະເຂດ ຈັດພິ ທີມອບ-ຮັບ ແລະ ເປີດນຳໃຊ້ໂຄງການກໍ່ສ້າງຫໍວັດ ທະນະທຳ ໄກສອນ ພົມວິຫານ ໃນຕອນເຊົ້າຂອງວັນທີ 7 ມັງກອນ 2014 ໂດຍການ ເຂົ້າຮ່ວມເປັນກຽດຂອງສະຫາຍ ບຸນປອນ ບຸດຕະນະວົງ ກຳມະການກົມການເມືອງ ສູນກາງພັກ, ຫົວໜ້າຫ້ອງວ່າການສູນກາງ ພັກ; ສະຫາຍ ເຈິ່ນກວັກເວື້ອງ ເລ ຂາທິການສູນກາງພັກ, ຫົວໜ້າ ຫ້ອງວ່າການສູນກາງພັກກອມມູນິດຫວຽດນາມ; ສະຫາຍ ດຣ. ສຸພັນ ແກ້ວມີໄຊ ເຈົ້າແຂວງໆສະຫວັນນະເຂດ; ສະຫາຍຫງຽວນ ແມ໋ງຮຸ່ງເອກອັກຄະລັດຖະທູດວິສາມັນຜູ້ມີອຳນາດ ເຕັມ ແຫ່ງ ສສ ຫວຽດນາມ ປະຈຳລາວ; ມີບັນດາການນຳຈາກສູນກາງ, ແຂວງສະຫວັນນະເຂດ ແລະ ຊັ້ນຄົນຕ່າງໆພາຍໃນ ແຂວງສະຫວັນນະເຂດ ເຂົ້າຮ່ວມຢ່າງຫລວງຫລາຍ.

          ໂຄງການດັ່ງກ່າວ ໄດ້ລົງມືກໍ່ສ້າງແຕ່ທ້າຍປີ 2011 ເປັນຕົ້ນມາ ແລະ ມາຮອດ ປັດຈຸບັນການກໍ່ສ້າງ ແລະ ຕົກແຕ່ງ ພ້ອມປະກອບອຸປະກອນຮັບໃຊ້ຄົບຊຸດສຳເລັດ ແລ້ວ 100%, ເປັນໂຄງການທີ່ໃຫຍ່ ແລະ ມີຄວາມໝາຍສຳຄັນພິເສດຊຶ່ງ ເປັນຂອງ ຂວັນຈາກພັກ-ລັດ ແລະ ປະຊາຊົນຫວຽດນາມມອບໃຫ້ພັກ, ລັດ ແລະ ປະຊາ ຊົນລາວ ເນື່ອງໃນໂອກາດທີ່ສະຫາຍ ຫງຽວນຟູຈ້ອງເລຂາທິການໃຫຍ່ ຄະນະບໍລິ ຫານງານສູນກາງພັກ ກອມມູນິດຫວຽດນາມເດີນທາງຢ້ຽມຢາມສັນທະວະໄມຕີ ສປປ ລາວ ຢ່າງເປັນທາງການໃນເດືອນມີຖຸນາປີ 2011 ດ້ວຍທຶນກໍ່ສ້າງທັງໝົດ 191 ຕື້ດົງ ຫລື ປະມານ 10 ລ້ານໂດລາສະຫະ ລັດໂດຍແມ່ນສະຫະບໍລິສັດ ເລກທີ 36 ກະຊວງປ້ອງກັນປະເທດຫວຽດນາມເປັນ ຜູ້ຮັບເໝົາກໍ່ສ້າງ.

     ຫໍວັດທະນະທຳ ໄກສອນ ພົມວິຫານ ແມ່ນສະຖາປັດທີ່ທັນສະໄໝ ແລະ ໄດ້ຮັບການອອກແບບເປັນ 4 ອາຄານມີໃນ ເນື້ອທີ່ກວ້າງ 4.777 ຕາແມັດ. ອາຄານ A ເປັນອາຄານຕ້ອນຮັບມີເນື້ອທີ່ 210 ຕາແມັດ. ອາຄານ B  ເປັນອາຄານຫ້ອງຮຽນ ຫ້ອງອະເນກປະສົງມີເນື້ອ 1.010 ຕາແມັດ, ສູງ 2 ຊັ້ນ, ສ່ວນອາຄານ C ເປັນອາຄານບໍລິຫານມີເນື້ອທີ່ 189 ຕາແມັດ ສູງ 2 ຊັ້ນ ແລະ ອາຄານ D ເປັນຫ້ອງປະຊຸມໃຫຍ່ ມີຫ້ອງ ຮັບແຂກລະດັບພິເສດ, ມີຫ້ອງຊົມການສະແດງບັນຈຸ 680 ບ່ອນ ນັ່ງ, ເວທີສະແດງ ແລະ ຫ້ອງເຕັກນິກຮັບ ໃຊ້ມີເນື້ອທີ່ທັງໝົດ 1.355 ຕາແມັດ, ສູງ 4 ຊັ້ນ. ນອກ ຈາກນີ້ ກໍມີເນື້ອທີ່ເດີ່ນສວນ, ບ່ອນຈອດລົດ, ເສັ້ນ ທາງສັນຈອນພາຍໃນລວມມີເນື້ອທ່ີທັງໝົດ 10.524 ຕາແມັດ.

       ໃນໂອກາດດັ່ງກ່າວນີ້ ການນຳທັງສອງປະເທດ ແລະ ແຂວງສະຫວັນນະເຂດກໍໄດ້ຮ່ວມກັນຕັດແຖບຜ້າປ່ອຍໝາກປຸ່ມ ເປົ້າເພື່ອເປັນສັນຍາລັກວ່າຫໍວັດທະນະທຳໄກສອນ ພົມວິຫານ  ແຫ່ງນີ້ນອກຈາກຈະເຮັດໜ້າ ທີ່ໃຫ້ການບໍລິການຢ່າງສົມບູນ ແບບຍັງເປັນການຢັ້ງຢືນເຖິງນ້ຳໃຈມິດຕະພາບຄວາມສາມັກຄີແບບພິເສດ ແລະ ການຮ່ວມມືຮອບດ້ານຂອງພັກ, ລັດ ແລະ ປະຊາຊົນສອງຊາດຫວຽດນາມ-ລາວ  ຊຶ່ງເປັນບ່ອນສຶກສາອົບຮົມ ມູນເຊື້ອມິດຕະພາບ ແລະ ຄຸນສົມບັດສິນທຳປະຕິວັດຂອງ ປະທານ ໄກສອນ ພົມວິຫານ ແລະ ເປັນບ່ອນຈົດ ຈຳຄຸນງາມຄວາມດີຂອງຄົນຮຸ້ນກ່ອນຂອງສອງຊາດລາວ-ຫວຽດນາມ ໄວ້ ເປັນແວ່ນແຍງໃຫ້ຄົນຮຸ້ນໃໝ່ໄດ້ສືບ ທອດເສີມຂະຫຍາຍ ແລະປົກປັກຮັກສາໄວ້ໃຫ້ຢືນຍົງຄົງຕົວຢູ່ນຳພວກເຮົາຕະຫລອດໄປ.