laophatthananewspaper: ປີ 2013 ລັດວິສາຫະກິດຖືຮຸ້ນລາວໄດ້ເງິນປັນຜົນຈາກເຂື່ອນໄຟຟ້ານ້ຳເທີນIIຫລາຍກວ່າ 30 ລ້ານໂດລາ

ໃນວັນທີ 20 ກຸມພານີ້, ລັດວິສາຫະກິດຖືຮຸ້ນລາວ (ລຮລ) ໄດ້ຈັດພິທີສະຫຼຸບການດຳເນີນທຸລະກິດປະຈຳປີ 2013 ແລະ ຜ່ານແຜນການປີ 2014 ຢູ່ສຳນັກງານຕົນ.ໂດຍການເຂົ້າຮ່ວມຂອງ ທ່ານ ສຸລິວົງ ດາລາວົງ ລັດຖະມົນ ຕີວ່າການກະຊວງພະລັງງານ ແລະ ບໍ່ແຮ່.

ທ່ານ ດຣ ສົມບຸນ ມະໂນລົມ ຜູ້ອຳນວຍການ ລຮລ ໄດ້ລາຍງານກ່ຽວກັບຜົນສຳເລັດໃນການຈັດຕັ້ງປະຕິບັດ ແຜນການປີ 2013, ໂດຍສະເພາະແມ່ນການຈັດ ຕັ້ງປະຕິບັດວຽກງານພາຍຫລັງທີ່ ລຮລ ເຂົ້າຮ່ວມຖືຮຸ້ນ,ຊຶ່ງມີກຳລັງຕິດຕັ້ງທັງໝົດ 3.658 MW,ມູນຄ່າການລົງທຶນປະມານ
6.899 ລ້ານໂດລາສະຫະລັດ. ໃນນັ້ນ ລຮລ ຮ່ວມລົງທຶນປະມານ 537,14 ລ້ານໂດລາສະຫະລັດ ແລະ ໃນປີ 2013 ຜ່ານ

ມາ ລຮລ ໄດ້ຮັບເງິນປັນຜົນຈາກໂຄງການໄຟຟ້ານ້ຳເທີນ 2 ຈຳນວນ 30,83 ລ້ານໂດລາສະຫະລັດ, ລື່ນຄາດໝາຍຫຼາຍກວ່າ ໜຶ່ງເທົ່າໂຕ, ຊຶ່ງໃນນີ້ມີເງິນປັນຜົນປົກກະຕິ 13,52 ລ້ານໂດລາສະຫະລັດ ແລະ ເງິນປັນຜົນພິເສດ 17,31 ລ້ານໂດລາສະຫະ ລັດທີ່ໄດ້ຮັບຈາກບັນຊີສະສົມເງິນແຮ່ ເພື່ອຊຳລະໜີ້ເງິນກູ້ຂອງບໍລິສັດໄຟຟ້ານ້ຳເທີນ 2 ຈຳກັດ (NTPC) .ຄຽງຄູ່ກັນນັ້ນ, ລຮລ ໄດ້ຊຳລະຕົ້ນທຶນ ແລະ ດອກເບ້ຍໃຫ້ກະຊວງການເງິນຕາມສັນຍາກູ້ຢືມຈຳນວນ 4,78 ລ້ານໂດລາສະຫະລັດ,ພ້ອມທັງໄດ້ມອບພັນທະອາກອນຕ່າງໆຕາມກົດໝາຍໃຫ້ແກ່ກະຊວງການເງິນ ຈຳນວນ 19,55 ລ້ານໂດລາສະຫະລັດ.

ສຳລັບໂຄງການໄຟຟ້າຄວາມຮ້ອນຫົງສາທີ່ມີກຳລັງຕິດຕັ້ງ 1.878 MW ແມ່ນໄດ້ເລີ່ມລົງມືກໍ່ສ້າງຢ່າງເປັນທາງການມາແຕ່ທ້າຍປີ 2010 ມາຮອດທ້າຍປີ 2013 ການກໍ່ສ້າງສາມາດປະຕິບັດໄດ້ແລ້ວ 77,6%.ໂດຍມີເຄື່ອງຈັກຜະລິດໄຟຟ້າ 3 ໜ່ວຍ ຊຶ່ງໜ່ວຍທີ 1 ຈະຜະລິດໄຟຟ້າ ໃນເດືອນພຶດສະພາ 2015,ໜ່ວຍທີ 2 ໃນເດືອນຕຸລາ 2015 ແລະ ໜ່ວຍທີ 3 ໃນເດືອນກຸມພາ 2016 ເພື່ອຂາຍໃຫ້ການໄຟຟ້າຝ່າຍຜະລິດແຫ່ງປະເທດໄທ (EGAT) ຈຳນວນ 1.473 MW ແລະ ລັດວິສາຫະກິດໄຟຟ້າລາວ (EDL) ຈຳນວນ 100 MW. ສ່ວນໂຄງການໄຟຟ້າເຊປຽນ-ເຊນ້ຳນ້ອຍ ກໍ່ມີຄວາມຄືບໜ້າຫຼາຍ ເຊິ່ງໄດ້ບັນລຸການເຊັນສັນຍາຕ່າງໆເຊັ່ນ: ສັນຍາເຊົ່າທີ່ດິນກັບລັດຖະ ບານ, ສັນຍາຊື້-ຂາຍໄຟຟ້າກັບ EGAT ແລະ EDL ແລະ ສັນຍາຮັບເໝົາກໍ່ສ້າງ. ພິເສດໂຄງການໄດ້ສຳເລັດການລະດົມທຶນໃນວັນທີ 4 ກຸມພາ 2014 ຜ່ານມານີ້ ແລະ ໄດ້ເລີ່ມການກໍ່ສ້າງຢ່າງເຕັມຮູບແບບ. ສຳລັບໂຄງການໄຟຟ້ານ້ຳງຽບ 1 ກໍ່ບັນລຸການເຊັນສັນຍາຜູ້ຖືຮຸ້ນ, ສ້າງຕັ້ງບໍລິສັດໂຄງການ,ເຊັນສັນຍາສຳປະທານກັບລັດຖະບານ, ສັນຍາຊື້-ຂາຍໄຟຟ້າກັບ EGAT ແລະ EDL ແລະ ສັນຍາຮັບເໝົາກໍ່ສ້າງເປັນຕົ້ນ.

ປັດຈຸບັນ ໂຄງການກຳລັງສືບຕໍ່ດ້ານວຽກງານສິ່ງແວດລ້ອມ-ສັງຄົມ ແລະ ການລະດົມທຶນ. ເພື່ອມາກໍ່ສ້າງໂຄງການ, ຊຶ່ງຕາມແຜນແລ້ວແມ່ນຈະໃຫ້ສຳເລັດໃນເດືອນ 7 ປີ 2014 ຈາກນັ້ນ ກໍ່ຈະເລີ່ມລົງມືກໍ່ສ້າງຢ່າງເປັນທາງການ.ສະຫຼຸບລວມແລ້ວ, ການເຄື່ອນໄຫວທຸລະກິດຂອງ ລຮລ ໃນປີ 2013 ແມ່ນປະສົບຜົນສຳເລັດຢ່າງຈົບງາມ ແລະ ໄດ້ຮັບຄວາມເຊື່ອໝັ້ນຈາກຂາຮຸ້ນຕ່າງປະເທດ, ສະຖາບັນການເງິນສາກົນ ລວມທັງບັນດາທະນາຄານຕ່າງໆ ທັງພາຍໃນ ແລະ ຕ່າງປະເທດເປັນຢ່າງດີ. ສຳລັບທິດທາງ-ແຜນການປີ 2014, ລຮລ ຈະສືບຕໍ່ບຸກບືນສູ້ຊົນປະຕິບັດໜ້າທີ່ຕາມພາລະບົດບາດ ແລະ ຄວາມຮັບຜິດຊອບຂອງຕົນຢ່າງຕັ້ງໜ້າ ລວມທັງການດຳເນີນທຸລະກິດຂີ້ເທົ່າລອຍ (Fly Ash Business) ໃນໂຄງການໄຟຟ້າຄວາມຮ້ອນຫົງສາ ເພື່ອພັດທະນາທຸລະກິດຂອງ ລຮລ ໃຫ້ເຕີບໃຫຍ່ເຂັ້ມແຂງ, ມີຜົນສຳເລັດຫຼາຍກວ່າເກົ່າ ແລະ ເພື່ອປະກອບສ່ວນສ້າງລາຍຮັບເຂົ້າງົບປະມານຂອງລັດເພີ່ມຂຶ້ນໃນແຕ່ລະປີ.