ແຂວງບໍ່ແກ້ວກຽມສ້າງແຜນພັດທະນາເສດຖະກິດ-ສັງຄົມໄລຍະ 5 ປີ

     ກອງປະຊຸມກະກຽມສ້າງ ແຜນພັດທະນາເສດຖະກິດ-ສັງຄົມໄລຍະ 5 ປີຄັ້ງທີ 8 ແຕ່ປີ 2016​2020 ຂອງ​ແຂວງ​ບໍ່​ແກ້ວ, ໄດ້ມີຂຶ້ນໃນວັນທີ 27 ກຸມພານີ້, ຢູ່ ຫ້ອງວ່າການປົກຄອງແຂວງ ໂດຍການເປັນປະທານ ຂອງທ່ານ ສຸບັນ ສົມປະສົງ ຫົວໜ້າ ພະແນກແຜນການ ແລະ ການລົງທຶນແຂວງ, ທ່ານນາງ ທອງວັນ ອຸທະວົງ ຮອງຫົວໜ້າກົມແຜນການກະຊວງແຜນ ການ ແລະ ການລົງທຶນ, ມີບັນດາຫົວໜ້າ ຮອງຫົວໜ້າຂະແໜງແຜນການທົ່ວແຂວງ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.

     ກອງປະຊຸມສຳມະນາຄັ້ງນີ້, ໄດ້ຜ່ານແຜນພັດທະນາເສດຖະກິດ-ສັງຄົມ 5 ປີຄັ້ງທີ 8 ແຕ່ປີ 2016​2020, ຜ່ານວິທີວິ
ທະຍາການສ້າງແຜນພັດທະນາເສດຖະກິດ-ສັງຄົມແຫ່ງຊາດໄລຍະ 5 ປີ ຄັ້ງທີ 8 ແຕ່ປີ 2016​2020 ພ້ອມນີ້ ຜູ້ເຂົ້າຮ່ວມຍັງ ໄດ້ຄົ້ນຄວ້າປະເດັນທີ່ສຳຄັນໃນການວາງແຜນພັດທະນາເປັນຕົ້ນສັງລວມໜ້າ ວຽກຫລັກ, ກະກຽມທີມງານ, ເກັບກຳຂໍ້ມູນ,
ສ້າງແຜນທີ່ພັດທະນາ, ຮ່າງແຜນເບື້ອງຕົ້ນ, ນຳສະເໜີຜ່ານແຜນ, ປັບປຸງ ແລະ ສ້າງແຜນສະບັບສົມບູນພ້ອມທັງ ຮັບຮູ້ໜ້າ

ທີ່ຮັບຜິດຊອບຂອງທີມງານ, ການເກັບກຳ ແລະ ກວດກາຂໍ້ມູນ, ສຶກສາເອກະສານທີ່ກ່ຽວຂ້ອງບັນດາຂໍ້ມູນທີ່ມີ, ເກັບກຳ ແລະ ສັງລວມຂໍ້ມູນສະຖິຕິ, ກວດກາ ແລະ ປັບປຸງຂໍ້ມູນຈາກ ແຕ່ລະຂະແໜງການສ້າງຄວາມເປັນເອກະພາບກ່ຽວກັບຂໍ້ມູນ, ເກັບ ກຳຂໍ້ມູນດ້ານພື້ນທີ່ພູມສັນຖານ, ສ້າງຖານຂໍ້ມູນດ້ານພູມສາດ, ສ້າງແຜນທີ່ພັດທະນາສະເພາະຂະແໜງການ, ການວາງແຜນ ແບບມີສ່ວນຮ່ວມ ແລະ ອື່ນໆ.