ບົດເພັງ
“ມົນຮັກບ່າວເມືອງວັງ” ເຊິ່ງຮ້ອງໂດຍ “ມຸກດາວັນ” ມີຜູ້ເຂົ້າຊົມຜ່ານຢູທູບເກືອບ
3 ແສນເທື່ອ, ຊຶ່ງບົດເພັງດັ່ງກ່າວໄດ້ສະທ້ອນໃຫ້ເຫັນເຖິງຄວາມສຳພັນຂອງ “ ສາວຜູ້ໄທ”
ສອງຝັ່ງແມ່ນ້ຳຂອງໂດຍຝ່າຍຊາຍຢູ່ເມືອງວັງ, ແຂວງສະຫວັນນະເຂດ ແລະ ຝ່າຍຍິງຢູ່ເມືອງເວນນູ
ນະຄອນ, ແຂວງນະ ຄອນພະນົມ. ນອກຈາກບົດເພັງດັ່ງກ່າວແລ້ວຍັງມີອີກຫຼາຍບົດເພັງເຊັ່ນ:
ເອີ້ນອ້າຍໃສ່ໝໍ້ໜຶ້ງ, ສາວທາດອີງຮັງຍັງຄອຍ, ສະເໜ່ທ່າເຊຈຳພອນ, ສຽງແຄນແທນໃຈ,
ນ້ຳຕາໄຫຼໃຕ້ຕົ້ນດອກແຄ ແລະ ອື່ນໆອີກ. ສຳລັບປະຫວັດຫຍໍ້ຂອງສາວນ້ອຍຄົນດັ່ງກ່າວນີ້ກໍ່ໜ້າສົນໃຈເປັນຢ່າງຍິ່ງ.
ມຸກດາວັນ ສັນຕິພອນ
ເກີດເມື່ອວັນທີ 2/6/1997 ທີ່ບ້ານທາດອີງຮັງ, ເມືອງໄກສອນພົມວິຫານ,
ແຂວງສະຫວັນ ນະເຂດ ລາວເຕີບໃຫຍ່ມາໃນຄອບຄົວນັກຮ້ອງເປັນລູກສາວຫຼ້າ ມີເອື້ອຍນ້ອງນຳກັນທັງໝົດ
6 ຄົນ. ຄອບຄົວຂອງລາວມີອາ ຊີບເຮັດໄຮ່, ເຮັດນາ. ຫຼັງຈາກແລ້ວໄຮ່ແລ້ວນາ ພໍ່ຂອງລາວກໍໄດ້ຕັ້ງວົງດົນຕີເອເລັກໂທນນ້ອຍໆເພື່ອຮັບຈ້າງເສບຕາມງານທົ່ວໆໄປ
ແລະ ມີບາງຄັ້ງກໍອອກຕ່າງແຂວງ.
“ມຸກດາວັນ” ເລີ່ມຮ້ອງເພັງໂດຍມີພໍ່ເປັນຄົນສອນຮ້ອງ
ແລະ ມີອາຈານ ດອກເພັດ ແດນຈຳພອນ ເປັນຄົນສອນລຳ, ລາວເຄີຍປະກວດຮ້ອງເພັງແຕ່ອາຍຸ
5 ປີ ນັບແຕ່ນັ້ນມາລາວກໍເລີ່ມປະກວດຮ້ອງເພັງ, ຂັບລຳຫຼາຍເວທີ ບາງຄັ້ງກໍໄດ້ຮັບ
ແລະ ບໍ່ໄດ້ຮັບ ລາງວັນກໍມີ. ໃນຂະນະນັ້ນນາງກໍເປັນໜຶ່ງໃນສະມາຊິກຂອງຄະນະສິລະປະສະໂມສອນວັດທະນາທຳບັນດາເຜົ່າແຂວງສະຫວັນນະເຂດ,
ໃນນາມເປັນນັກຮ້ອງ ແລະ ໜໍລຳ ແລະ ໄດ້ເດີນທາງໄປສະແດງໃນນາມແຂວງສະຫວັນນະເຂດທັງພາຍໃນ
ແລະ ຕ່າງປະເທດ. ໃນຂະນະທີ່ຮຽນຢູ່ຊັ້ນປະ ຖົມປີທີ 3 ( ປ 3 ), ລາວໄດ້ອອກອາລະບ້ຳຊຸດທຳອິດສັງກັດຢູ່ຄ້າຍເພັງ
ລາວອາສມີເດຍ, ໃນບົດເພັງ “ໄຫວບໍ່ພໍ່” ທີ່ໄດ້ຮັບຄວາມນິຍົມໃນລະດັບໜຶ່ງທາງໂທລະພາບ.
ເມື່ອຮຽນຢູ່ຊັ້ນມັດ ທະຍົມປີທີ 2 ( ມ 2 ), ລາວໄດ້ ອອກອາລະບ້ຳຊຸດ “ ບ່າວທ່າແຂກ-ສາວສະຫວັນ”
ເຮັດໃຫ້ແຟນເພັງຂອງລາວໄດ້ຮູ້ຈັກລາວຫຼາຍຂື້ນເປັນຕົ້ນ “ຖາມຂ່າວບ່າວມັດທະຍົມ”
ແລະ “ເພິ່ນມີມັກຂ້ອຍ” ກ່ອນທີ່ລາວຈະຕັດສິນໃຈເຮັດອາລະບ້ຳເພັງເອງໃນນາມ
“ໜາກກ້ວຍສຸກຂຽວ” ແລະ ຍັງເປັນຊື່ວົງດົນຕີຂອງຄອບຄົວລາວເອງ.
ບົດເພັງເກືອບທັງອາລະບ້ຳ “ມົນຮັກບ່າວເມືອງວັງ” ເປັນຜົນງານການປະພັນຂອງ “ກຸໄລ ລູກທາດອີງຮັງ”
ອະດີດອາຈານປະຈຳວິທະຍາໄລຄູສະຫວັນນະເຂດ ຍົກເວັ້ນເພັງ “ເອີ້ນອ້າຍໃສ່ໝໍ້ໜຶ້ງ”
ທີ່ຂຽນໂດຍ “ວາດ ວາ ທະສິນ” ແລະ ບົດເພັງ “ເອີ້ນອ້າຍໃສ່ໝໍ້ໜຶ້ງ” ຍັງໄດ້ຮັບລາງວັນດວງຈຳປາໃນງານມອບລາງ
ວັນດວງຈຳປາໃນສາຂາເພັງບ້ານນາຍິງດີເດັ່ນອີກດ້ວຍ.
“ມຸກດາວັນ ສັນຕິພອນ” ເປີດໃຈຜ່ານເຟດບຸກ
(Facebook) ສ່ວນໂຕວ່າ: ຂໍຂອບໃຈກັບທິມ ງານເບື້ອງຫຼັງທຸກຄົນ “ຂອບໃຈພໍ່ທີ່ສັ່ງສອນ ແລະ ເຝິກຝົນໃຫ້ຂ້ອຍຮ້ອງເພັງ
ຂອບໃຈກັບອາຈານທຸກໆທ່ານທີ່ມອບໂອກາດເຮັດໃຫ້ຂ້ອຍມີມື້ນີ້, ບໍ່ເຄີຍຄິດເລີຍວ່າຊີວິດນີ້ຊິໄດ້ມາເຖິງຈຸດນີ້
ຂໍຂອບໃຈຫຼາຍໆ ”.
No comments:
Post a Comment