ລັດວິສາຫະກິດນ້ຳປະປານະຄອນຫລວງວຽງຈັນວາງຄາດໝາຍຮອດປີ 2015 ຈະສະໜອງນ້ຳປະປາໃຫ້ໄດ້ 90% ຂອງ ຄວາມຕ້ອງການ.

      ລັດວິສາຫະກິດນ້ຳປະປານະຄອນຫລວງເປັນຫົວໜ່ວຍທຸລະກິດໜຶ່ງ ທີ່ຂຶ້ນກັບ ພະແນກໂຍທາທິການ ແລະ ຂົນສົ່ງນະ ຄອນຫລວງວຽງຈັນ, ເຊິ່ງມີພາລະບົດບາດ ແລະ ໜ້າທີ່ຮັບໃຊ້ດ້ານສາທາລະນຸປະໂພກຈຳໜ່າຍນ້ຳສະອາດຮັບໃຊ້ສັງຄົມໃນນະ ຄອນຫລວງວຽງຈັນໄດ້ຊົມໃຊ້ຢ່າງທົ່ວເຖິງ. ໃນຊຸມປີຜ່ານມາລັດຖະບານໄດ້ໃຊ້ ຄວາມພະຍາຍາມຂົນຂວາຍທຶນຮອນນັບ ເປັນຈຳນວນມະຫາສານສົມທົບກັບທຶນ ພາຍໃນເຂົ້າໃນການກໍ່ສ້າງຂະຫຍາຍລະບົບນ້ຳປະປານະຄອນຫລວງວຽງຈັນ ແລະ ປັດຈຸບັນມີໂຮງງານຜະລິດນ້ຳປະປາ 4 ແຫ່ງ, ລວມບໍລິມາດການຜະລິດ 180.000 ມ3/ວັນ ໃຫ້ການບໍລິການຢ່າງເປັນປົກ ກະຕິ ແລະ ຜົນສຳເລັດດັ່ງກ່າວສ່ວນໃຫຍ່ແມ່ນໄດ້ຮັບການຊ່ວຍເຫລືອຈາກອົງການ ສາກົນ ແລະ ການກູ້ຢືມຈາກບັນດາປະ ເທດເພື່ອນມິດ ເຊັ່ນ: ຍີ່ປຸ່ນ, ຝຣັ່ງ, ສປ ຈີນ, ສສ ຫວຽດນາມ ແລະ ສາມະຄົມ ນະຄອນຫລວງທີ່ໃຊ້ພາສາຝຣັ່ງໄດ້ກາຍເປັນ ຄູ່ຮ່ວມພັດທະນາລະບົບນ້ຳປະປາຂອງນະຄອນຫລວງວຽງຈັນ, ໃນນີ້ມີອົງການ (JICA) ໃຫ້ການຊ່ວຍ ເຫລືອເປັນມູນຄ່າ 2.785 ລ້ານເຢັນ ເຂົ້າໃນໂຄງການຂະຫຍາຍ ໂຮງງານຜະລິດນ້ຳປະປາເກົ້າລ້ຽວ ໄລຍະສອງ, ອົງການ (AFD) ໃຫ້ການຊ່ວຍ ເປັນມູນຄ່າ 5,5 ລ້ານເອີໂຣ ເປັນສອງໄລຍະ ເພື່ອກໍ່ອ່າງເກັບນ້ຳສູງບ້ານວຽງຄຳ (ໜອງແຕ່ງ), ຂະຫຍາຍລະບົບທໍ່ນ້ຳປະປາ 110 ກິໂລແມັດ, ປ່ຽນຖ່າຍທໍ່ເກົ່າຫລາຍກວ່າ 60 ກິໂລແມັດ ແລະ ການສະໜອງ ອຸປະກອນຮັບໃຊ້ວຽກງານບໍລິຫານຄຸ້ມ ຄອງລະບົບນ້ຳປະປາ ທົ່ວນະຄອນຫລວງ, ສ່ວນໂຄງການນ້ຳປະປາຊານເມືອງແມ່ນໄດ້ ຮັບທຶນຊ່ວຍເຫລືອລ້າຈາກສາມະ ຄົມນະຄອນຫລວງທີ່ໃຊ້ພາ ສາຝຣັ່ງ (AIMF) ເພື່ອກໍ່ສ້າງນ້ຳ ປະປາໂຄກເພີງ (ຫ້ວຍຄຳ) ເມືອງສັງທອງ ມີມູນຄ່າກໍ່ສ້າງ 224.146 ໂດລາ. ໂຄງການປັບ ປຸງນ້ຳປະປາບ້ານເພຍລາດແມ່ນສຳເລັດການປ່ຽນຖ່າຍທໍ່ເກົ່າ ຈາກໂຮງງານ, ໂຄງການນ້ຳປະ ປາບ້ານນາທາມ, ບ້ານນາຊອນ, ບ້ານບໍ່ເຫລັກ ເມືອງປາກງື່ມ ລວມມີມູນຄ່າ 121.000 ເອີໂຣ ແລະ ເງິນສົມທົບຈາກນະຄອນ ຫລວງວຽງຈັນ 30.000 ເອີໂຣ, ປັດຈຸບັນແມ່ນໄດ້ກໍ່ສ້າງສຳເລັດ, ໂຄງການກໍ່ສ້າງນ້ຳປະປາ ເມືອງປາກງື່ມ (PPP) ເຊິ່ງເລີ່ມ ລົງມືໄດ້ 15%. ຍ້ອນການເພີ່ມຂຶ້ນຂອງປະຊາຊົນ ແລະ ການພັດທະນາຂອງນະຄອນຫລວງ ວຽງຈັນໄດ້ເຮັດໃຫ້ຄວາມຕ້ອງ ການດ້ານນ້ຳປະປາໃນປັດຈຸບັນສູງເຖິງ 340.000 ມ3/ວັນ ແລະ ເພື່ອແກ້ ໄຂສະພາບດັ່ງກ່າວ ຄະນະພັກ-ຄະນະອຳນວຍ ການລັດວິສາຫະກິດນ້ຳປະປານະຄອນຫລວງໄດ້ ຈັດຕັ້ງນຳພາປັບປຸງກົນໄກດ້ານການຄຸ້ມຄອງບໍລິ ຫານເພື່ອສາມາດຕອບສະ ໜອງນ້ຳປະປາໃຫ້ໄດ້ 90% ໃນປີ 2015. ເພື່ອໃຫ້ບັນລຸຄາດໝາຍລັດວິສາຫະກິດນ້ຳປະປານະ ຄອນຫລວງຈຶ່ງໄດ້ກຳນົດໜ້າ ທີ່ທິດທາງໃນການຈັດຕັ້ງປະຕິບັດແຜນແມ່ບົດ, ໂຄງການກໍ່ສ້າງ ແລະ ຂະຫຍາຍຕາໜ່າງການ ສະໜອງນ້ຳປະປາ ແລະ ໂຮງ ງານຜະລິດນ້ຳຂຶ້ນ ຫລາຍແຫ່ງຄື: ໃນປັດຈຸບັນແມ່ນ ກຳລັງກໍ່ສ້າງ ແລະ ຂະຫຍາຍ ໂຮງງານ ຜະລິດນ້ຳປະປາດົງໝາກຄາຍຈາກ 100.000 ມ3/ວັນ ເປັນ 120.000 ມ3/ວັນ ທີ່ບ້ານແສນດິນ ເມືອງນາຊາຍທອງ, ແຜນ ກໍ່ສ້າງໂຮງງານຜະລິດນ້ຳປະປາ 20.000 ມ3/ວັນ ທີ່ບ້ານ ທ່າມ່ວງ ເມືອງຫາດຊາຍຟອງ, ກະກຽມຂະຫຍາຍບໍລິມາດ ການຜະລິດໂຮງງານນ້ຳປະປາດົງບັງ ເພີ່ມຕື່ມ 20.000 ມ3/ວັນ ແລະ ຂະຫຍາຍການຜະລິດນ້ຳປະປາຈີ່ນາຍໂມ້ເພີ່ມຕື່ມ 40.000 ມ3/ວັນ ໃນອະນາຄົດ.