ສື່ມວນຊົນຈຳປາສັກ-ສະຫວັນ ໄດ້ຮັບການຍົກລະດັບຄວາມ ຮູ້ວຽກງານສິດຄົນພິການ.

      ສາມາຄົມຄົນພິການແຫ່ງຊາດສົມທົບກັບພະແນກແຮງງານສະຫວັດດີການ-ສັງຄົມ ແຂວງສະຫວັນນະເຂດ (ຮສສ), ໂດຍການສະໜັບສະໜູນທຶນຂອງອົງການສາກົນເພື່ອຄົນພິການ (HANDICAP) ໄດ້ຈັດຊຸດຝຶກອົບຮົມກ່ຽວກັບສິດທິ ແລະ ຄວາມສະເໝີພາບຂອງຄົນພິການໃຫ້ແກ່ສື່ມວນຊົນ 2 ແຂວງ ຄື: ແຂວງສະຫວັນນະເຂດ ແລະ ຈຳປາສັກຂື້ນໃນວັນທີ 19​-20 ມີ ນາຜ່ານມານີ້ທີ່ແຂວງສະຫວັນນະເຂດ, ໂດຍການເປັນປະທານ ຂອງທ່ານ ນາງ ທຸມມີ ລາດສຸລິນ ຫົວໜ້າ ຂະແໜງປະກັນສັງຄົມ ພະແນກ ຮສສ ແຂວງສະຫວັນນະເຂດ, ມີທ່ານ ທອງຈັນ ດວງມາລາ ຮອງປະທານສະມາຄົມ ຄົນພິການແຫ່ງຊາດລາວ, ສື່ມວນຊົນຂອງສອງແຂວງເຂົ້າຮ່ວມ.

      ທ່ານນາງ ທຸມມີ ລາດສະລິນ ໃຫ້ຮູ້ວ່າ: ເພື່ອເປັນການຍົກລະດັບຄວາມຮູ້ຄວາມສາມາດ ຂອງສື່ມວນຊົນທີ່ເຮັດວຽກ ກ່ຽວກັບຂ່າວສານບໍ່ວ່າຈະເປັນທາງໂທລະພາບ, ວິທະຍຸ ແລະ ໜັງສືພິມ, ຮັບຮູ້ເຂົ້າໃຈກ່ຽວກັບວຽກງານສິດທິ ແລະ ຄວາມ ສະເໝີພາບຂອງຄົນພິການ, ເພື່ອເປັນສື່ກາງໃນການນຳສະເໜີວຽກ ງານດັ່ງກ່າວໃຫ້ສັງຄົມຮັບຮູ້ເຂົ້າໃຈ, ໃຫ້ສິດສະເໝີພາບ

ເທົ່າທຽມກັບຄົນປົກະຕິ ແລະ ເປີດໂອກາດ ໃຫ້ເຂົາເຈົ້າໄດ້ມີສ່ວນຮ່ວມໃນສັງຄົມ ແລະ ວຽກງານຕ່າງໆ.

      ສຳລັບເນື້ອໃນທີ່ໄດ້ຮຽນຮູ້ປະກອບມີ: ຄວາມຮູ້ກ່ຽວກັບການສາທິດຄວາມເປັນພິການໂດຍໃຫ້ຜູ້ເຂົ້າຮ່ວມເຮັດກິດຈະ ກຳຈຳລອງວ່າຕົນເອງເປັນຄົນພິການ ເພື່ອສ້າງຄວາມເຂົ້າໃຈວ່າຄົນພິການມີຄວາມຫຍຸ້ງຍາກສັບສົນໃນການດຳລົງຊີວິດຫຼາຍສ່ຳ ໃດ, ການປ່ຽນແປງທັດສະນະຄະຕິທາງລົບຂອງຄົນປົກກະຕິ ທີ່ມີຕໍ່ຄົນພິການເພື່ອໃຫ້ຄົນປົກກະຕິເຂົ້າໃຈ ແລະ ເປີດໂອກາດ ໃຫ້ແກ່ເຂົາເຈົ້າ, ການພັນລະນາ ນິໄສໃຈຄໍຂອງຄົນພິການ, ຄວາມຮູ້ກ່ຽວກັບຮູບແບບສິດທິມະນຸດ ຕໍ່ກັບຄວາມເປັນພິການ ແລະ ການພັດທະນາ, ຄວາມຕ້ອງການອັນເປັນພື້ນຖານຂອງຄົນພິການ ແລະ ສ້າງຄວາມເຂົ້າໃຈກ່ຽວກັບອຸປະສັກຕ່າງໆ ຕໍ່ການມີສ່ວນຮ່ວມຂອງຄົນພິການ.