ສະຫລອງວັນຜູ້ເສຍອົງຄະ ແລະ ເສຍສະລະຊີວິດ ເພື່ອປະເທດຊາດຈັດຂຶ້ນຢ່າງມີຄວາມໝາຍຢູ່ແຂວງຄຳມ່ວນ

             ວັັນທີ 21 ມີນາ ນີ້ຄະນະພັກ, ຄະນະປົກຄອງແຂວງຄຳມ່ວນໄດ້ຈັດງານ ໂຮມຊຸມນຸມສະຫລອງວັນຜູ້ເສຍອົງຄະ ແລະ ເສຍສະລະຊີວິດເພື່ອປະເທດຊາດ 21 ມີນາຄົບຮອບ 68 (21/3/ 1946-21/3/2014) ຂຶ້ນຢູ່ສະໂມສອນ 21 ມີນາ ໃນເທສະບານເມືອງທ່າແຂກໂດຍການເຂົ້າຮ່ວມຂອງທ່ານພົນໂທ ດວງໃຈ ພິຈິດ ຮອງນາຍົກລັດຖະມົນຕີ, ລັດຖະມົນຕີ ວ່າການກະຊວງປ້ອງກັນປະເທດພ້ອມດ້ວຍ ພະນັກງານອາວຸໂສ, ຜູ້ເສຍອົງຄະ, ພະນັກງານສະມາຊິກພັກ, ກຳລັງປະກອບ ອາ ວຸດ, ນັກສຶກສາປັນຍາຊົນ, ຊາວໜຸ່ມເຍົາວະຊົນ ແລະ ມວນຊົນແຂວງຄຳມ່ວນເຂົ້າ ຮ່ວມເປັນຈຳນວນຫລາຍ ເພື່ອສະແດງ ຄວາມຮູ້ບຸນຄຸນກະຕັນຍູຕໍ່ບັນດານັກຮົບທີ່ໄດ້ອຸທິດເລືອດເນື້ອເຫື່ອແຮງເພື່ອປະເທດ ຊາດກໍຄືພາລະກິດປົກປັກຮັກສາ ແລະ ສ້າງສາປະເທດຊາດໃນປັດຈຸບັນອັນເປັນເຫດການສຳຄັນທາງປະຫວັດສາດຂອງຊາດ ເຮົາທີ່ທົ່ວພັກ, ທົ່ວລັດ, ທົ່ວກອງທັບ ແລະ ທົ່ວປວງຊົນລາວທັງຊາດໄດ້ຮ່ວມກັນລະນຶກເຖິງວັນປະຫວັດສາດສຳຄັນດັ່ງ ກ່າວ.      

          ທ່ານພົນໂທ ດວງໃຈ ພິຈິດ ມີຄຳປາໃສໃນພິທີວ່າ:ປະຫວັດ ສາດຂອງຄວາມຄຽດແຄ້ນ 21 ມີນາເປັນວັນທີ່ປວງຊົນ ລາວທັງຊາດຈົດຈຳຈາລຶກ ແລະ ສະແດງຄວາມກະຕັນຍູຮູ້ບຸນຄຸນຕໍ່ນັກຮົບປະຕິວັດທີ່ເສຍສະລະເພື່ອເອກະ ລາດຂອງຊາດ ໃນໄລຍະແຫ່ງການຕໍ່ສູ້ກູ້ຊາດເວົ້າລວມ, ເວົ້າສະເພາະຜູ້ເສຍສະລະໃນບັ້ນຮົບປ້ອງກັນຕົວເມືອງທ່າແຂກ. ຈາກນີ້ພັກ ແລະ ລັດເຮົາຈຶ່ງໄດ້ກຳນົດເອົາວັນນີ້ຂອງທຸກປີເປັນວັນສະແດງຄວາມກະຕັນຍູຮູ້ບຸນຄຸນຕໍ່ນັກຮົບປະຕິວັດທີ່ໄດ້ເສຍສະລະຊີວິດເພື່ອຊາດເພື່ອການປະຕິວັດ ແລະ ເພື່ອອະນາຄົດອັນສົດ ໃສຂອງພວກເຮົາ. ທ່ານ ພົນໂທ ກ່າວວ່າ: ໃນໂອກາດນີ້ຂ້າພະເຈົ້າຕາງ ໜ້າໃຫ້ການນພັກ-ລັດ ແລະ ກຳລັງປະກອບອາວຸດຂໍ ໃຫ້ທຸກຄົນຈົ່ງຈົດຈຳຈາລຶກ ແລະ ສະແດງພະລັງແຫ່ງຄວາມສາມັກຄີ ຮັກຊາດ, ຮັກລະບອບໃໝ່ ປະຊາທິປະໄຕ ປະຊາຊົນໂດຍການເຄົາລົບ, ສະໜັບສະໜູນຊ່ວຍເຫລືອອະດີດພະນັກງານນັກ ຮົບທີ່ໄດ້ຕໍ່ສູ້ເສຍສະລະໃນໄລຍະຜ່ານມາ ແລະ ແຂ່ງຂັນກັນຮັກຊາດພັດທະນາຢ່າງເປັນເຈົ້າການເພື່ອຜົນສຳເລັດໃນການປະ ຕິບັດພາລະກິດປົກປັກຮັກສາ ແລະ ພັດທະນາປະເທດຊາດອັນແສນຮັກຂອງພວກເຮົາ.

       ໃນໂອກາດດຽວກັນທ່ານ ຄຳໃບ ດຳລັດ ເຈົ້າແຂວງໆຄຳມ່ວນກໍໄດ້ກ່າວປາໄສຕໍ່ທີ່ຊຸມນຸມນອກຈາກໄດ້ຍົກໃຫ້ເຫັນຂະ ບວນການຕໍ່ສູ້ອັນພິລະອາດຫານເພື່ອປ້ອງກັນຕົວເມືອງທ່າແຂກ ແລະ ໂທດກຳຂອງຈັກກະພັດແລ້ວ, ທ່ານຍັງໄດ້ຮຽກຮ້ອງ ໃຫ້ທົ່ວປວງຊົນແຂວງຂອງຕົນ, ຍົກສູງສະຕິເປັນເຈົ້າປົກປັກຮັກສາທ້ອງຖິ່ນ, ຕ້ານທຸກກການເຄື່ອນໄຫວມ້າງເພທຳລາຍຂອງ ບັນດາອິດທິກຳລັງປໍລະປັກ ແລະ ກຸ່ມຄົນບໍ່ດີຢ່າງທັນການທັງເປັນເຈົ້າສ້າງສາພັດທະນາເສດຖະກິດ- ສັງຄົມໂດຍການຈັດຕັ້ງ ການຜະຜະລິດສ້າງເສດຖະກິດຄອບຄົວ, ແກ້ໄຂຄວາມຫຍຸ້ງຍາກ ແລະ ໃນສະພາບເສດຖະກິດທີ່ຝືດເຄືອງຄືປັດຈຸບັນ. ກໍຈົ່ງ ພ້ອມກັນປະຢັດມັດທະຍັດທັງປັບປຸງແບບແຜນການດຳລົງຊີວິດຢ່າງລຽບງ່າຍ, ໃຊ້ຈ່າຍມີແຜນການ ແລະ ເຮັດໃຫ້ສິ່ງນີ້ກາຍ ເປັນສະຕິ ແລະ ລະບຽບແບບແຜນຂອງພວກເຮົາ.