ໃນໂອກາດສະເຫລີມສະຫລອງວັນສ້າງຕັ້ງລັດວິສາຫະກິດການບິນລາວ
ຄົບ ຮອບ 25 ປີ (23/5/1989 - 23/5/ 2014) ທ່ານອຳນວຍການລັດວິສາຫະກິດ ການບິນລາວ
ດຣ. ສົມພອນ ດວງດາລາ ໄດ້ໃຫ້ຮູ້ວ່າ: ເລີ່ມແຕ່ປີ 1989-2001, ລັດວິສາຫະກິດການບິນລາວໄດ້ປະຕິບັດໜ້າທີ່ການເມືອງຂອງຕົນ
ໂດຍໄດ້ຮັບທຶນຈາກລັດ 50 ລ້ານໂດລາສະຫະລັດ ເພື່ອຈັດຊື້ເຮືອບິນຂະ ໜາດ
Y12 ຈຳນວນ 7 ລຳ, Y7 ຈຳນວນ 3 ລຳ ແລະ ATR 72-200 ຈຳນວນ 1 ລຳ ມາເສີມເຮືອບິນທີ່ມີແລ້ວຈຳນວນໜຶ່ງ
ເພື່ອເລັ່ງໃສ່ຍົກລະດັບການບໍລິ ການພາຍໃນປະເທດເປັນຕົ້ນຕໍ, ຈາກນັ້ນມາລະຫວ່າງປີ
2002- 2005 ໄດ້ມີການປັບປຸງແຜນທຸລະກິດ ແລະ ເຊົ່າເຮືອບິນແອບັດ A320 ບິນສາຍຕ່າງປະເທດ
ແລະ ຕົກມາຮອດໄລຍະປີ 2006-2010 ການບິນລາວໄດ້ຍົກເລີກນຳໃຊ້ເຮືອບິນຂະໜາດ
Y7 ແລະ
Y12 ແລະ ນຳໃຊ້ພຽງແຕ່ເຮືອບິນ ATR 72-200 ຈຳນວນ 2 ລຳ ແລະ ສຸມໃສ່ການບິນບໍລິການສາຍທາງທີ່ມີປະສິດທິຜົນທັງສາຍພາຍໃນ
ແລະ ຕ່າງປະເທດ. ຂະນະດຽວກັນ ກໍລຶບລ້າງກົນໄກ 2 ລາຄາ (ລາຄານະໂຍບາຍໃຫ້ຄົນລາວ
ແລະ ລາຄາຂາຍໃຫ້ຕ່າງປະເທດ) ໃຫ້ເປັນລາຄາດຽວ ແລະ ໄດ້ປັບປຸງລະບົບນິຕິກຳໃຫ້ເຊື່ອມໂຍງກັບມາດຕະຖານການ
ບິນພົນລະເຮືອນສາກົນ ແລະ ກ້າວມາຮອດປີ 2011 ເປັນຕົ້ນມາ ແມ່ນໄລຍະຫັນເປັນມາດຕະຖານ
ແລະ ເຊື່ອມໂຍງ ໂດຍໄດ້ສຸມທຶນ ຮອນຢ່າງມະຫາສານເຂົ້າໃນການປັບປຸງລະບົບການບໍລິການສາຍການບິນໃຫ້ໃຫຍ່ຂຶ້ນຈາກການນຳໃຊ້ເຮືອບິນໃບພັດມານຳໃຊ້ເຮືອບິນອາຍພົ່ນທີ່ມີເຕັກໂນໂລຊີສູງກວ່າ,
ຍົກລະດັບມາດ ຖານຄວາມປອດໄພຕ່າງໆ ແລະ ເປີດກວ້າງການຮ່ວມມືດ້ານທຸ ລະກິດກັບສາຍການບິນຕ່າງປະເທດຢ່າງກວ້າງຂວາງ.
ທ່ານອຳນວຍການ ກ່າວວ່າ: ຕະຫລອດ 25 ປີຜ່ານມານັ້ນ,
ມັນມີທັງໄລຍະທີ່ເປັນກາລະໂອກາດດີ ແລະ ໄລຍະທີ່ສັບສົນລະອິດລະອ້ຽວ ແລະ
ມີຜົນກະທົບຫລາຍຢ່າງ ໂດຍສະເພາະຈາກສະພາບເສດຖະກິດໂລກທີ່ເຮັດໃຫ້ທຸລະກິດການບິນຖືກທົດທອຍ
ລວມເຖິງສະພາບຕ່າງໆ, ແຕ່ການບິນລາວກໍຍາດໄດ້ຜົນງານ ແລະ ເຮັດໃຫ້ທຸລະກິດຂະຫຍາຍຕົວຕໍ່ເນື່ອງເປັນກ້າວໆມາ
ຄືປັດຈຸບັນມີທຶນເພີ່ມຂຶ້ນເປັນ 2 ພັນຕື້ກີບ, ມີເຮືອບິນ 15 ລຳ, ໃນນັ້ນ ແອບັດ
A320 ຈຳນວນ 4 ລຳ, ພະນັກ ງານ 800 ກວ່າຄົນ, ຈຸບິນເພີ່ມຂຶ້ນ 6 ເທົ່າຕົວ, ມີ 360
ຕົວແທນຈຳໜ່າຍ ແລະ ຮ່ວມມືກັບ 25 ສາຍການບິນຂອງ 23 ປະເທດໃນໂລກ, ບໍລິການຜູ້ໂດຍສານໄດ້ເພີ່ມຂຶ້ນຫລາຍເທົ່າ
ແລະ ມີລາຍຮັບທຸລະກິດປະມານ 926 ຕື້ກວ່າກີບ. ນອກຈາກນີ້ ລະບົບການບໍລິຫານຄຸ້ມຄອງມີຄວາມເຂັ້ມແຂງ
ຈົນໄດ້ຮັບລາງວັນຈາກອົງການຈັດຕັ້ງສາກົນ BID ແລະ BIZZ 5 ປີຊ້ອນ. ພ້ອມນີ້ ຍັງໄດ້ຮັບຮອງເປັນອົງການທີ່ມີມາດຕະຖານ
ISO ດ້ານບໍລິການ ແລະ ພວມກວດສອບເພື່ອຮັບ ຮອງເປັນອົງການທີ່ມີມາດຕະ ຖານຄວາມປອດໄພສາກົນ
IOSA ໃນປີນີ້.
ທ່ານອຳນວຍການລັດວິສາຫະກິດການບິນລາວ ເວົ້າວ່າ:
ຜົນສຳເລັດທີ່ກ່າວມານັ້ນມັນເປັນໜ້າຊື່ມຊົມກໍຕາມ, ແຕ່ມັນກໍເປັນ ຜົນສຳເລັດໃນເບື້ອງຕົ້ນເທົ່ານັ້ນ.
ພວກເຮົາຍັງມີສິ່ງທ້າທາຍຫລາຍຢ່າງທີ່ໜັກໜ່ວງ ໂດຍສະເພາະການເກີດອຸປະຕິເຫດໃນທ້າຍປີ
2013 ເຊິ່ງມັນເປັນເຫດການທີ່ສ້າງຄວາມສູນເສຍທາງດ້ານຊັບສິນ, ຊີວິດ ແລະ ເປັນສິ່ງທີ່ເສົ້າເສຍດາຍໃຫ້ແກ່ຄອບຄົວຜູ້ເສຍຊີວິດ,
ໃຫ້ແກ່ພະນັກງານກຳມະ ກອນລັດວິສາຫະກິດການບິນລາວ ແລະ ປະຊາຊົນລາວທັງປະເທດ
ເຊິ່ງພວກເຮົາຈະບໍ່ໃຫ້ເກີດຂຶ້ນອີກ. ເຫດການນີ້ມັນປຽບເໝືອນເສັ້ນຜົມນ້ອຍໆບັງພູເຂົາທີ່ໃຫຍ່ສູງ
ເຮັດໃຫ້ພາບພົດທີ່ສົດໃສຂອງການປັບປຸງ ແລະ ພັດທະ ນາຕະຫລອດ 25 ປີຜ່ານມາຖືກໝົ່ນໝອງ.
ສະນັ້ນ ພວກເຮົາຕ້ອງບຸກທະລຸໃນການແກ້ໄຂພາບພົດນີ້ໃຫ້ຜ່ານພົ້ນໄປ, ພວກເຮົາຈະນຳໃຊ້ສິ່ງທ້າທາຍນີ້ກາຍເປັນໂອກາດພັດທະນາຕົນເອງ
ແລະ ເຮັດໃຫ້ສັງຄົມຮູ້ໄດ້ຈຸດເຂັ້ມແຂງຂອງພວກເຮົາ ເພື່ອສ້າງຄວາມເຊື່ອໝັ້ນກັບຄືນມາໂດຍໄວ.
ສິ່ງທ້າທາຍທີ່ໜັກໜ່ວງນັ້ນ ແມ່ນພວກເຮົາຕ້ອງບຸກທະລຸທຸກສິ່ງໃນຍຸກສະໄໝໃໝ່
ເຊິ່ງເປັນຍຸກແຫ່ງໂລກາພິວັດ, ຍຸກແຫ່ງຂໍ້ມູນຂ່າວ ສານ ແລະ ເຕັກໂນໂລຊີທີ່ທັນສະໄໝ,
ຍຸກແຫ່ງການເຊື່ອມໂຍງ ແລະ ເປີດນ່ານຟ້າເສລີ. ພວກເຮົາຈະພະຍາຍາມນຳໃຊ້ບົດ ຮຽນ
ແລະ ປະສົບການທີ່ມີ ເພື່ອສືບຕໍ່ປັບປຸງ ແລະ ພັດທະນາການບິນລາວໃຫ້ບັນລຸເປົ້າໝາຍຫັນເປັນທັນສະໄໝ,
ມີມາດຖານ ແລະ ເຊື່ອມໂຍງກັບສາກົນໃນປີ 2020 ເຊິ່ງເປັນປີທີ່ປະເທດຊາດຂອງເຮົາໄດ້ຫລຸດພົ້ນອອກຈາກບັນຊີປະເທດດ້ອຍພັດທະນາ.
No comments:
Post a Comment