ໃນໂອກາດສະເຫລີມສະ ຫລອງສົງການປີໃໝ່ລາວ
ພສ 2557 ທີ່ຈະມາເຖິງນີ້, ລັດຖະ ມົນຕີກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ
(ຖວທ) ໄດ້ອອກແຈ້ງການແນະນຳໃຫ້ປະຊາຊົນບັນດາເຜົ່າໃນທົ່ວປະເທດສະຫລອງປີໃໝ່ໃຫ້ມີເນື້ອໃນຖືກຕ້ອງສອດຄ່ອງຕາມຮີດຄອງປະເພນີ
ແລະ ວັດທະນະທຳອັນດີງາມຂອງຊາດ ແນໃສ່ອະນຸລັກຮັກສາ ແລະ ສົ່ງເສີມຮີດຄອງປະເພນີດັ່ງກ່າວໃຫ້ຢູ່ຄູ່ລາວຕະຫລອດໄປ.
ຄຳແນະນຳດັ່ງກ່າວ ລະບຸວ່າ: ຈັດຕັ້ງການສະເຫລີມສະຫລອງໃຫ້ພໍດີພໍງາມ,
ຫລີກເວັ້ນຈັດພິທີແບບໃຫຍ່ໂຕ, ຟູມເຟືອຍດ້ານຊັບສິນ, ການເສບງັນມ່ວນຊື່ນ, ຟ້ອນ-ລຳ,
ຊື້-ຂາຍເຄື່ອງດື່ມມືນເມົາບໍ່ໃຫ້ຈັດຂຶ້ນໃນວັດວາອາຮາມ, ສະຖານທີ່ສັກກາລະບູຊາ;
ການຫລິ້ນ, ກິນ, ການດື່ມ ແລະ ມ່ວນຊື່ນໃຫ້ຢູ່ໃນຂອບເຂດ, ຕາມລະບຽບການຕ່າງໆຂອງເຈົ້າໜ້າທີ່ກ່ຽວຂ້ອງກຳນົດໄວ້;
ການຫົດ ສົງພະພຸດທະຮູບ, ການຫົດສົງພໍ່, ແມ່, ເຖົ້າແກ່, ຜູ້ອາວຸໂສ ແລະ ໝູ່ເພື່ອນກໍຕ້ອງຫົດສົງດ້ວຍນ້ຳອົບນ້ຳຫອມ,
ນ້ຳສະອາດ ແລະ ຫົດ ສົງດ້ວຍ
ທ່າທີອ່ອນນ້ອມ, ມີມາ ລະຍາດດີ; ການຫລິ້ນນ້ຳຢູ່ສະ
ຖານທີ່ຕ່າງໆໃຫ້ໃຊ້ນ້ຳສະອາດ, ບໍ່ເປິະເປື້ອນ, ນ້ຳທີ່ບໍ່ປະສົມສີ, ບໍ່ແຊ່ສິ່ງຄັນຄາຍ,
ສິ່ງໂສໂຄກຕ່າງໆ ອັນກໍ່ໃຫ້ເກີດຜົນກະທົບຕໍ່ຊີວິດ, ຮ່າງກາຍຂອງບຸກຄົນອື່ນ;
ບໍ່ໃຫ້ໃຊ້ຖົງຢາງທີ່ບັນຈຸນ້ຳ, ນ້ຳສີ, ນ້ຳຄັນຄາຍ, ນ້ຳກ້ອນແກວ່ງໃສ່ຄົນເດີນທາງ,
ບໍ່ໃຫ້ຫລິ້ນນ້ຳ, ຫົດນ້ຳ, ເສບງັນມ່ວນຊື່ນ ແລະ ສະແດງທ່າທີແບບລາ ມົກອານາຈານຢູ່ແຄມທາງ
ອັນເປັນການເສຍພາບພົດ, ເສຍວັດ ທະນະທຳອັນດີງາມຂອງຊາດ ທັງກີດກັ້ນການສັນຈອນໄປ-ມາ
ແລະ ສ່ຽງຕໍ່ການເກີດອຸປະຕິເຫດ; ບໍ່ໃຫ້ໃຊ້ທໍ່ນ້ຳສີດໃສ່ຄົນ ຫລື ລົດທີ່ກຳລັງແລ່ນໄປ-ມາຕາມທາງ;
ບໍ່ໃຫ້ໃຊ້ກຳລັງຮຸນແຮງຕໍ່ກັນໃນເວລາຫລິ້ນນ້ຳ, ຫົດນ້ຳ ຫລື ສວຍໂອກາດຕໍ່ເພດຍິງໃນເວລາຫົດສົງນ້ຳກັນ.
ສຳລັບການນຸ່ງຖື: ປະຊາຊົນບໍ່ວ່າຍິງ-ຊາຍ,
ນ້ອຍ, ໃຫຍ່ເວລາເຂົ້າໄປຫົດສົງພະພຸດທະຮູບ ຫລື ຫົດສົງພະສົງ, ສຳມະເນນນຢູ່ໃນວັດຕ້ອງນຸ່ງຖືສຸພາບຮຽບຮ້ອຍ,
ຜູ້ຍິງຕ້ອງນຸ່ງສິ້ນ, ເສື້ອສຸພາບ ສະແດງອອກເຖິງວັດທະນະທຳລາວຢ່າງແທ້ຈິງ, ຫ້າມບໍ່ໃຫ້ແມ່
ຍິງນຸ່ງສົ້ງ, ນຸ່ງສະເກິດ, ກະໂປ່ງສັ້ນ, ເສື້ອສາຍດ່ຽວເປີດແປນເຂົ້າວັດ ແລະ
ຫລິ້ນນ້ຳ, ຫົດນ້ຳຢູ່ສະຖານທີ່ສາທາລະນະ ຖ້າຜູ້ໃດລະເມີດຕໍ່ສິ່ງທີ່ກ່າວມາທັງໝົດນັ້ນ
ແມ່ນຈະຖືກຕັກເຕືອນ, ສຶກ ສາອົບຮົມ, ຖ້າກໍລະນີຮ້າຍແຮງແມ່ນມອບໃຫ້ເຈົ້າ ໜ້າທີ່ຕຳຫລວດກ່ຽວຂ້ອງກັກຕົວເພື່ອດຳເນີນຄະດີຕາມກໍລະນີໜັກ-ເບົາ.
No comments:
Post a Comment