ພະນະທ່ານ ທອງສິງ ທຳມະວົງ ນາຍົກລັດຖະມົນຕີ
ແຫ່ງ ສປປ ລາວ ໄດ້ສຳເລັດການເຂົ້າ ຮ່ວມກອງປະຊຸມສຸດຍອດອາຊຽນ ຄັ້ງທີ 24 ເຊິ່ງໄດ້ຈັດຂຶ້ນໃນວັນທີ
11 ພຶດສະພານີ້ ທີ່ເນປີດໍ ປະເທດມຽນມາ ໂດຍໄດ້ເນັ້ນໃສ່ປຶກສາຫາລື 4 ບັນຫາຄື
1. ການສ້າງປະຊາຄົມອາຊຽນໃຫ້ບັນລຸໃນປີ 2015, 2. ການພົວພັນຮ່ວມມືກັບພາຍນອກຂອງອາຊຽນ,
3. ທິດທາງໃນອະ ນາຄົດຂອງອາຊຽນ, 4. ບັນຫາພາກ ພື້ນ ແລະ ສາກົນທີ່ພົ້ນເດັ່ນ ແລະ
ມີຄວາມສົນໃຈຮ່ວມກັນ.
ໃນໂອກາດນີ້, ພະນະທ່ານ ນາຍົກລັດຖະມົນຕີ ທອງສິງ
ທຳມະວົງ ໄດ້ຮ່ວມກັບບັນດາຜູ້ນຳອາຊຽນທົບທວນຄືນຄວາມຄືບໜ້າໃນການສ້າງປະຊາຄົມອາຊຽນ
ເຊິ່ງເຫັນວ່າການຈັດຕັ້ງ ປະຕິບັດແຜນແມ່ບົດຂອງສາມເສົາຄ້ຳປະຊາຄົມອາຊຽນ (ປະ
ຊາຄົມການເມືອງ-ຄວາມໝັ້ນຄົງອາຊຽນ, ປະຊາຄົມເສດຖະກິດອາຊຽນ ແລະ ປະຊາຄົມວັດທະ
ນະທຳ-ສັງຄົມອາຊຽນ),
ແຜນວຽກຂໍ້ລິເລີ່ມວ່າດ້ວຍການເຊື່ອມໂຍງອາຊຽນໄລຍະສອງ,
ແຜນແມ່ບົດວ່າດ້ວຍການເຊື່ອມຈອດອາຊຽນມີຄວາມຄືບໜ້າດີ, ແຕ່ຍັງມີບາງກິດຈະກຳທີ່ບັນດາຂະແໜງການຂອງອາຊຽນຕ້ອງໄດ້ເອົາໃຈໃສ່ສືບຕໍ່ຈັດຕັ້ງປະຕິບັດໃຫ້ສຳເລັດຕາມກຳນົດເວລາ.
ໃນໂອກາດນີ້, ບັນດາຜູ້ນຳອາຊຽນ ໄດ້ຮັບຮອງເອົາຖະແຫລງ
ການເນປີດໍ ວ່າດ້ວຍການສ້າງປະຊາຄົມອາຊຽນໃຫ້ສຳເລັດໃນປີ 2015 ເຊິ່ງເປັນເອກະສານທີ່ກຳນົດກິດຈະກຳບູລິມະສິດສຳ
ລັບປີ 2014 ແນໃສ່ບັນລຸການສ້າງປະຊາຄົມອາຊຽນ ຕາມກຳນົດເວລາ. ບັນດາຜູ້ນຳອາຊຽນ
ໄດ້ຮຽກຮ້ອງໃຫ້ບັນດາຂະແໜງການຂອງອາຊຽນຈັດຕັ້ງປະຕິ ບັດຖະແຫລງການດັ່ງ ກ່າວຢ່າງທັນການ
ແລະ ມີປະສິດທິພາບ.
ກ່ຽວກັບການພົວພັນພາຍນອກຂອງອາຊຽນ, ບັນດາຜູ້ນຳອາຊຽນໄດ້ສະແດງຄວາມຍິນດີທີ່ເຫັນວ່າການຮ່ວມມືຂອງອາ
ຊຽນກັບບັນດາຄູ່ເຈລະຈາຂອງຕົນໄດ້ຮັບການເສີມຂະຫຍາຍເທື່ອລະກ້າວ ເຊິ່ງໄດ້ປະກອບ
ສ່ວນອັນສຳຄັນເຂົ້າໃນຂະບວນ ການສ້າງປະຊາຄົມອາຊຽນ ກໍຄືການປົກປັກຮັກສາ
ແລະ ສົ່ງເສີມສັນຕິພາບ, ສະຖຽນລະພາບ ແລະ ການຮ່ວມມື ເພື່ອການພັດທະນາໃນພາກພື້ນ
ແລະ ໃນໂລກໂດຍລວມ. ບັນດາຜູ້ນຳອາຊຽນ ໄດ້ເຫັນດີໃຫ້ເສີມຂະຫຍາຍໝາກຜົນທີ່ຍາດມາໄດ້ໃນການຮ່ວມມືກັບພາຍນອກຂອງອາຊຽນ
ໂດຍສືບຕໍ່ຮັດແໜ້ນບົດ ບາດຄວາມເປັນແກນກາງຂອງອາຊຽນໃນໂຄງສ້າງພາກພື້ນ ໂດຍຜ່ານບັນດາກົນໄກທີ່ອາຊຽນເປັນຜູ້ລິເລີ່ມຄື
ອາຊຽນ +1, ອາຊຽນ +2, ເວທີພາກພື້ນອາຊຽນ, ກອງປະຊຸມລັດຖະມົນຕີປ້ອງກັນປະເທດອາຊຽນບວກ
ແລະ ກອງປະຊຸມສຸດຍອດອາຊີຕາເວັນອອກ.
ກ່ຽວກັບທິດທາງໃນອະ ນາຄົດຂອງອາຊຽນ, ບັນດາຜູ້
ນຳອາຊຽນ ໄດ້ຊົມເຊີຍທຸກຂະແໜງການຂອງອາຊຽນທີ່ໄດ້ເລີ່ມຂະບວນການຮ່າງວິໄສທັດປະຊາຄົມອາຊຽນ
ຫລັງປີ 2015 ເຊິ່ງເປັນເອກະສານທີ່ຈະກຳນົດທິດທາງເດີນຂອງອາຊຽນໃນອະນາຄົດ.
ຕໍ່ບັນຫານີ້, ບັນດາຜູ້ ນຳອາຊຽນ ໄດ້ຮຽກຮ້ອງໃຫ້ບັນ ດາຂະແໜງການຂອງອາຊຽນເອົາໃຈໃສ່ຮ່າງວິໄສທັດດັ່ງກ່າວຢ່າງຮອບດ້ານ
ແລະ ທັນການ ເພື່ອໃຫ້ບັນດາຜູ້ນຳອາຊຽນໄດ້ຮັບຮອງເອົາໃນທ້າຍປີ 2015 ໂດຍວິໄສທັດດັ່ງກ່າວຄວນເນັ້ນໃສ່ສືບຕໍ່ຮັດແໜ້ນປະຊາຄົມອາຊຽນທີ່ເປັນອົງການຈັດຕັ້ງພາກ
ພື້ນລະຫວ່າງລັດຖະບານໃຫ້ມີຄວາມເປັນປຶກແຜ່ນດ້ານການເມືອງ, ເຊື່ອມໂຍງກັນດ້ານເສດ
ຖະກິດ ແລະ ມີຄວາມຮັບຜິດ ຊອບທາງສັງຄົມຕາມ 3 ເສົາຄ້ຳ ຄືປະຊາຄົມການເມືອງ-ຄວາມໝັ້ນຄົງອາຊຽນ,
ປະຊາຄົມວັດ ທະນະທຳ-ສັງຄົມອາຊຽນ ແລະ ປະຊາຄົມເສດຖະກິດອາຊຽນ ແລະ ສືບຕໍ່ຮັດແຄບຄວາມແຕກໂຕນດ້ານການພັດທະນາລະ
ຫວ່າງບັນດາປະເທດອາຊຽນ.
ນອກຈາກນີ້, ບັນດາຜູ້ນຳອາຊຽນຍັງໄດ້ແລກປ່ຽນຄຳຄິດເຫັນກ່ຽວກັບບັນຫາພາກພື້ນ
ແລະ ສາກົນທີ່ພົ້ນເດັ່ນທີ່ມີຄວາມສົນໃຈຮ່ວມກັນ ແລະ ເຫັນດີເສີມຂະຫຍາຍທ່າອ່ຽງລວມແຫ່ງການປົກປັກຮັກສາ
ແລະ ສົ່ງເສີມສັນຕິພາບ ແລະ ສະຖຽນລະພາບ ເຊິ່ງເປັນພື້ນຖານສຳລັບການຮ່ວມມືກັນ
ເພື່ອການພັດ ທະນາຂອງພາກພື້ນ ແລະ ສາ ກົນ.
ໃນໂອກາດນີ້, ບັນດາຜູ້ນຳອາຊຽນ ຍັງໄດ້ພົບປະບໍ່ເປັນທາງການກັບຜູ້ຕາງໜ້າສະມັດຊາລັດ
ຖະສະພາອາຊຽນ ແລະ ຊາວໜຸ່ມອາຊຽນນຳອີກ ເຊິ່ງບັນດາຜູ້ນຳອາຊຽນໄດ້ຊົມເຊີຍການປະກອບສ່ວນອັນສຳຄັນຂອງທັງ
2 ອົງການດັ່ງກ່າວໃນຂະບວນ ການສ້າງປະຊາຄົມອາຊຽນ ແລະ ຫວັງວ່າກອງປະຊຸມຄັ້ງທີ
35 ຂອງສະມັດຊາລັດຖະສະພາອາຊຽນ ເຊິ່ງສະພາແຫ່ງຊາດ ແຫ່ງ ສປປ ລາວ ຈະເປັນເຈົ້າ ພາບຈັດຂຶ້ນໃນເດືອນກັນຍາ
2014 ທີ່ນະຄອນຫລວງວຽງຈັນ ຈະໃຫ້ມີຜົນສຳເລັດອັນຈົບງາມ ປະກອບສ່ວນເຂົ້າໃນຂະບວນ
ການສ້າງປະຊາຄົມອາຊຽນ ກໍຄືການຮ່າງວິໄສທັດປະຊາຄົມອາຊຽນຫລັງປີ 2015 ໃຫ້ມີຜົນສຳເລັດ.
No comments:
Post a Comment