ກອງປະຊຸມລັດຖະບານສະໄໝສາມັນປະຈຳເດືອນພຶດສະພານີ້ ພິຈາລະນາຫຼາຍບັນຫາສຳຄັນ

    ໂດຍການເປັນປະທານຂອງ ທ່ານ ທອງສິງ ທໍາມະວົງ ນາຍົກລັດຖະມົນຕີ, ໃນ ວັນທີ 26-27 ພຶດ ສະພາ 2014 ກອງປະ ຊຸມລັດຖະບານສະໄໝສາມັນປະຈຳ ເດືອນພຶດສະພາ 2014 ໄດ້ຈັດຂຶ້ນທີ່ຫ້ອງວ່າການລັດຖະບານໃນວັນທີ 26-27 ພຶດສະ ພານີ້ ໂດຍການເປັນປະທານຂອງທ່ານ ທອງສິງ ທຳມະວົງ ນາຍົກລັດຖະ ມົນຕີ ແຫ່ງ ສປປ ລາວ ໂດຍມີບັນດາສະມາຊິກລັດ ຖະບານເຂົ້າຮ່ວມຢ່າງພ້ອມ ພຽງເຊິ່ງກອງປະຊຸມໄດ້ພິຈາລະນາ ແລະ ຮັບຮອງເອົາວຽກງານ ແລະ ນິຕິກຳທີ່ສຳ ຄັນຈຳນວນໜຶ່ງ ຄື:

     1. ສະມາຊິກລັດຖະບານ ໄດ້ປຶກສາຫາລືດ້ວຍຄວາມຮັບຜິດຊອບຕໍ່ຮ່າງຍຸດທະສາດກະສິກຳ ຮອດປີ 2025 ແລະ ວິໄສ ທັດ 2030 ເພື່ອແນໃສ່ຮັບປະກັນ ຄວາມໝັ້ນຄົງທາງດ້ານສະບຽງອາຫານຂອງຊາດ, ພັດທະນາກະສິກໍາສະອາດ, ປອດໄພ ແລະ ຍືນຍົງ, ຜະລິດສິນຄ້າກະສິກຳ ທີ່ມີທ່າແຮງບົນພື້ນຖານການຫັນເປັນອຸດສາຫະກຳ ແລະ ທັນສະໄໝເພື່ອປະກອບສ່ວນ

ສ້າງພື້ນ ຖານເສດຖະກິດຂອງຊາດຕາມທິດສັງຄົມນິຍົມ. ກອງປະຊຸມໄດ້ ໃຫ້ທິດຊີ້ນໍາຂະແໜງການກ່ຽວຂ້ອງນໍາເອົາຄໍາເຫັນ ຂອງສະມາຊິກລັດຖະບານສືບຕໍ່ຄົ້ນຄວ້າຢ່າງລະອຽດ ແລະ ຄົບຖ້ວນຕື່ມອີກເປັນຕົ້ນແມ່ນການປົກປັກຮັກສາສິ່ງແວດລ້ອມ, ການຮັກສາ ປ່າໄມ້, ຮັກສາແຫຼ່ງນ້ຳເພື່ອ ການຜະລິດກະສິກໍາທີ່ຕິດພັນກັບການທ່ອງທ່ຽວ, ຕິດພັນກັບການພັດທະນາຊົນນະ ບົດ ແລະ ກະສິກອນຜູ້ຜະລິດ. ທີ່ສຳຄັນແມ່ນການກຳນົດນະໂຍບາຍດ້ານຕ່າງໆທີ່ເປັນການສົ່ງເສີມ ເຊັ່ນ: ນະໂຍບາຍກ່ຽວ ກັບທີ່ດິນ, ນະໂຍບາຍດ້ານສິນເຊື່ອເພື່ອສາມາດເຂົ້າເຖິງແຫຼ່ງທຶນ, ນະໂຍບາຍດ້ານພາສີ-ອາກອນ, ການຄົ້ນຄວ້າວິໄຈລວມ ທັງກົນໄກການປະສານງານລະຫວ່າງສູນກາງກັບທ້ອງຖິ່ນ, ລັດກັບພາກທຸລະກິດ, ລັດກັບປະຊາຊົນ ແລະ ບັນຫາອື່ນໆ.

         2. ກອງປະຊຸມໄດ້ພິຈາລະນາ ແລະ ເຫັນດີຮັບຮອງຮ່າງດຳລັດວ່າດ້ວຍກອງທຶນຄວບຄຸມ, ສະກັດກັ້ນ ແລະ ຕ້ານ ຢາເສບຕິດ. ບັນຫານີ້ ແມ່ນໜຶ່ງ ໃນຫົກບັນຫາຫຍໍ້ທໍ້ທີ່ຕ້ອງໄດ້ແກ້ໄຂ ແລະ ໄດ້ກໍານົດມາດຕະການຈັດຕັ້ງປະຕິບັດໃນຄໍາສັ່ງ ເລກທີ 27/ນຍ ແລະ ເພື່ອກຳນົດຫຼັກການ, ລະບຽບການກ່ຽວກັບການສ້າງຕັ້ງ, ການຄຸ້ມຄອງບໍລິຫານ, ການນຳໃຊ້ ແລະ ກວດກາການເຄື່ອນໄຫວຂອງກອງທຶນ. ພ້ອມດຽວກັນນັ້ນ, ກໍເພື່ອລະດົມຂົນຂວາຍທຶນຈາກທຸກພາກສ່ວນໃນສັງຄົມທັງພາຍ ໃນ ແລະ ຕ່າງປະເທດ ເຂົ້າມາຮັບ ໃຊ້ວຽກງານກວດກາ ແລະ ຄວບຄຸມຢາເສບຕິ ລວມທັງ ການປິ່ນປົວ, ການບຳບັດ, ຟື້ນ ຟູສຸຂະພາບ ແລະ ການເຝິກວິຊາ ຊີບເບື້ອງຕົ້ນໃຫ້ແກ່ຜູ້ຕິດຢາເສບຕິດແນໃສ່ເຮັດໃຫ້ສັງຄົມລາວ, ຄົນລາວປອດຈາກຢາເສບ ຕິດ ເທື່ອລະກ້າວ ແລະ ມີສຸຂະພາບ ແຂງແຮງສົມບູນ, ປະກອບສ່ວນ ເປັນກຳລັງແຮງອັນສຳຄັນເຂົ້າໃນການປົກປັກຮັກສາ ແລະ ສ້າງສາພັດທະນາປະເທດຊາດ.

        3. ບັນຫາສຸດທ້າຍກອງປະຊຸມໄດ້ພິຈາລະນາຮັບຮອງການປັບປຸງຮ່າງກົດໝາຍວ່າດ້ວຍອາກອນມູນຄ່າເພີ່ມເນື່ອງ ຈາກວ່າຮ່າງກົດໝາຍສະບັບດັ່ງກ່າວທີ່ໄດ້ຮັບຮອງ ແລະ ປະກາດ ໃຊ້ມາແຕ່ປີ 2006 ເປັນຕົ້ນມາ ແລະ ຜ່ານການຈັດຕັ້ງປະ ຕິບັດມາຮອດປັດຈຸບັນເຫັນວ່າເນື້ອໃນສ່ວນໜຶ່ງຂອງກົດໝາຍສະບັບດັ່ງກ່າວບໍ່ສອດຄ່ອງກັບສະພາບການພັດທະນາໃນປັດ ຈຸບັນ ແລະ ຕໍ່ໜ້າໂດຍສະເພາະແມ່ນໃນ ເງື່ອນໄຂຂອງການເປີດກວ້າງການລົງທຶນ ແລະ ການເຊື່ອມ ໂຍງກັບພາກພື້ນ ແລະ ສາກົນໃນໄລຍະໃໝ່. ດັ່ງນັ້ນ, ຈຸດປະ ສົງຂອງການປັບປຸງຮ່າງກົດ ໝາຍໃນຄັ້ງນີ້ກໍເພື່ອຮັບປະກັນການເກັບພັນທະເຂົ້າງົບປະ ມານແຫ່ງລັດແນໃສ່ຊຸກຍູ້ສົ່ງເສີມການສົ່ງອອກ, ການຜະລິດ, ການຄ້າ ແລະ ການບໍລິການຢູ່ພາຍໃນປະເທດປະກອບສ່ວນ ເຂົ້າໃນການພັດທະນາເສດຖະກິດ-ສັງຄົມຂອງຊາດ, ເຊື່ອມ ໂຍງເຂົ້າກັບພາກພື້ນ ແລະ ສາກົນ.

            ຕອນທ້າຍກອງປະຊຸມທ່ານນາຍົກລັດຖະມົນຕີໄດ້ຊີ້ນໍາໃຫ້ສະມາຊິກລັດຖະບານນໍາເອົາເນື້ອໃນທີ່ໄດ້ຕົກ ລົງເປັນ ເອກະພາບລວມທັງບັນດາວຽກງານທີ່ເປັນຈຸດສຸມເດືອນມິຖຸນາ 2014 ໄປຈັດຕັ້ງຜັນຂະຫຍາຍ ແລະ ປະຕິບັດດ້ວຍຄວາມ ຮັບຜິດຊອບ ແລະ ໃຫ້ໄດ້ຮັບຜົນສໍາເລັດ ແລະ ທ່ານນາຍົກໄດ້ເນັ້ນບາງບັນຫາສຳຄັນຄື:

      1. ໃຫ້ເອົາໃຈໃສ່ວຽກງານ ປ້ອງກັນຊາດ-ປ້ອງກັນຄວາມ ສະຫງົບ ແລະ ແກ້ໄຂບັນຫາ ຫຍໍ້ທໍ້ໃນສັງຄົມທີ່ຈະກະທົບຕໍ່ ຄວາມສະຫງົບປອດໄພຂອງສັງຄົມ, ໂດຍສະເພາະແມ່ນບັນ ຫາຢາເສບຕິດ, ປຸ້ນຈີ້ຂີ້ລັກ, ບັນ ຫາອຸບັດຕິເຫດ..., ສຳລັບກະ ຊວງປ້ອງກັນປະເທດກໍໃຫ້ເອົາ ໃຈໃສ່ກວດກາ, ປັບປຸງວຽກ ງານການບິນໃຫ້ມີຄວາມພ້ອມ ສູງ ແລະ ມີຄວາມປອດໄພ.

         2. ໃຫ້ເອົາໃຈໃສ່ຊີ້ ນຳ-ນຳ ພາການເກັບລາຍຮັບໃຫ້ໄດ້ຕາມແຜນ ແລະ ແກ້ໄຂວຽກເຄັ່ງ ຮ້ອນທາງເສດຖະກິດຈຳນວນ ໜຶ່ງໃຫ້ສຳເລັດເປັນກ້າວໆ; ພ້ອມ ກັນນັ້ນ, ໃຫ້ຮີບຮ້ອນເກັບກ່ຽວ ແລະ ເກັບມ້ຽນຜົນຜະລິດລະດູນາແຊງ ແລະ ກະກຽມ ໃນການຜະລິດລະດູຝົນ ຫຼື ລະດູນາປີທີ່ຈະມາເຖິງນີ້.

   3. ໃຫ້ເອົາໃຈໃສ່ນຳພາ ແລະ ຈັດຕັ້ງການສອບເສັງຈົບຊັ້ນ, ຈົບຂັ້ນໃຫ້ຖືກຕ້ອງໂປ່ງໃສໃນ ທຸກຂັ້ນຕອນຂອງການສອບເສັງ ແລະ ເອົາໃຈໃສ່ຈັດກິດຈະກຳ ໃຫ້ແກ່ນັກຮຽນ-ນັກສຶກສາ ໃນ ຍາມພັກແລ້ງ ເຮັດແນວໃດໃຫ້ ລູກຫຼານຫ່າງໄກຈາກສິ່ງຫຍໍ້ທໍ້ ຕ່າງໆ, ພ້ອມກັນຮັກສາຮີດ ຄອງປະເພນີ-ວັດທະນະທຳອັນດີງາມຂອງຊາດລາວເຮົາ.

        4. ໃຫ້ເອົາໃຈໃສ່ກະກຽມ ເນື້ອໃນ ແລະ ເຂົ້າຮ່ວມກອງປະ ຊຸມສູນກາງ, ກອງປະຊຸມສະພາ ແຫ່ງຊາດ ແລະ ກະກຽມ ຕອບ ຄຳຊັກຖາມສົດຂອງສະມາຊິກ ສະພາແຫ່ງຊາດ ແລະ ຄຳຖາມ ຂອງປະຊາຊົນຜ່ານໂທລະສັບສາຍດ່ວນຂອງສະພາ ແຫ່ງຊາດ.

         5. ໃຫ້ຕັ້ງໜ້າຜັນຂະຫຍາຍ ບັນດາສັນຍາ ແລະ ການຕົກລົງ ຂອງຜູ້ນຳເຮົາກັບຜູ້ນຳຕ່າງປະ ເທດໃຫ້ມີປະສິດທິຜົນ; ເອົາໃຈ ໃສ່ເຜີຍແຜ່ທັດສະນະຂອງພັກ ແລະ ລັດຖະບານເຮົາຕໍ່ສະພາບ ການເຄັ່ງຮ້ອນຢູ່ປະເທດໃກ້ຄຽງ, ພາກພື້ນ ແລະ ສາກົນ ໃຫ້ຮັບ ຮູ້ເຂົ້າໃຈຢ່າງເປັນເອກະພາບ.

         6. ໃຫ້ເອົາໃຈໃສ່ກະກຽມ ແລະ ຈັດຕັ້ງການສະເຫຼີມສະຫຼອງວັນສິ່ງແວດລ້ອມໂລກ, ວັນ ເດັກນ້ອຍສາກົນ ແລະ ວັນປູກຕົ້ນໄມ້ແຫ່ງຊາດໃຫ້ມີປະສິດທິຜົນ, ມີຄຸນນະພາບ ແລະ ມີບັນຍາກາດຟົດຟື້ນມ່ວນຊື່ນໂດຍມີການປຸກລະດົມທົ່ວ ສັງຄົມໃຫ້ມີການປູກຕົ້ນໄມ້ຢູ່ສວນຂອງຕົນ, ຢູ່ສຳນັກງານ, ສວນສາທາລະນະ ແລະ ມີການປົກປັກຮັກສາໃຫ້ ເຕີບໂຕ ແລະ ຍືນຍົງ.