ລັດຖະສະພາລະຫວ່າງຊາດອາ ຊຽນເພ່ີມທະວີຮ່ວມມືສ້າງປະຊາຄົມອາຊຽນໃຫ້ປອດຢາເສບຕິດ

         ກອງປະຊຸມຄະນະກຳມະການຄົ້ນຄວ້າຫາຄວາມຈິງຂອງສະມັດຊາລັດຖະ ສະພາລະຫວ່າງຊາດອາຊຽນ ເພື່ອສະກັດ ກັ້ນ ແລະ ຕ້ານ ກັບໄພຄຸກຄາມຂອງ ຢາເສບຕິດ ຄັ້ງທີ 11 ໄດ້ໄຂຂຶ້ນ ຢ່າງເປັນທາງການໃນລະຫວ່າງວັນທີ 13-16 ພຶດສະ ພາ 2014 ນີ້ ຢູ່ໂຮງແຮມແລນມາກແມ່ຂອງ ລີເວີໄຊ ນະຄອນຫລວງວຽງ ຈັນ, ພາຍໃຕ້ຫົວຂໍ້” ເພີ່ມທະວີການຮ່ວມມືລັດຖະ ສະພາເພື່ອ ສ້າງປະຊາຄົມອາຊຽນໃຫ້ ປອດຢາເສບຕິດ” ເຊິ່ງ ເປັນຄັ້ງທີ 2 ທີ່ ສປປ ລາວເປັນເຈົ້າພາບໂດຍມີ ທ່ານ  ນາງ ປາ ນີ ຢາທໍ່ຕູ້ ປະທານ ສະພາແຫ່ງຊາດ ແຫ່ງ ສປປ ລາວ , ທັງເປັນປະທານ ໄອປາ, ທ່ານ ເປຣິໂອສາມີ ໂອ ຕາແຣມ ເລຂາ ທິການ ໃຫຍ່ ຂອງ ໄອປາ, ມີບັນດາຜູ້ຕາງໜ້າ ເຈົ້າໜ້າທີ່ອາວຸໂສຂອງອາຊຽນ, ຜູ້ຕາງໜ້າອົງການຈັດຕັ້ງສາກົນປະຈຳພາກພື້ນ ກ່ຽວກັບຢາເສບຕິດ ແລະ ອາຊະຍາກຳ, ພ້ອມ ດ້ວຍສະມາຊິກອາຊຽນ 9 ປະ ເທດຄື: ກຳປູເຈຍ, ລາວ, ສສ. ຫວຽດນາມ, ສິງກະໂປ, ມຽນມາ, ມາເລເຊຍ, ອິນໂດເນເຊຍ, ຟິລິບປິນ, ບຣູໄນ ເຂົ້າຮ່ວມ.

      ປະທານສະພາແຫ່ງຊາດ ທ່ານ ນາງ ປານີ ຢາທໍ່ຕູ້ ໄດ້ກ່າວ ເປີດກອງປະຊຸມວ່າ: ກອງປະ ຊຸມໄອໂຟຄອມຄັ້ງນີ້ ເປັນອີກ ກອງປະຊຸມໜຶ່ງທີ່ມີຄວາມໝາຍສຳຄັນໃນກົນໄກການຮ່ວມມື ເພື່ອສ້າງໂອກາດໃຫ້ບັນດາສະ ມາຊິກລັດຖະສະພາຈາກປະ ເທດອາຊຽນກໍຄືຜູ້ຕາງໜ້າອົງການ ຈັດຕັ້ງສາກົນ ແລະ ພາກພື້ນໄດ້ ປຶກສາຫາລື ແລະ ສະໜອງຂໍ້ມູນ ຂ່າວສານຊຶ່ງກັນ ແລະ ກັນກ່ຽວ ກັບການສະກັດກັ້ນ ແລະ ຕ້ານ ໄພຄຸກຄາມຈາກຢາເສບຕິດແນ ໃສ່ເຮັດໃຫ້ເປົ້າໝາຍປະຊາຄົມ ອາຊຽນປອດຢາເສບ ຕິດປາກົດຜົນເປັນຈິງຕາມທີ່ຜູ້ນຳອາຊຽນໄດ້ຕົກລົງກັນໄວ້.

      ບັນຫາຢາເສບຕິດເປັນບັນຫາຊຳເຮື້ອ ແລະ ຍາກທີ່ຈະແກ້ໄຂໄດ້ໃນຍາມໜຶ່ງຍາມດຽວໃນຂົງເຂດອາຊຽນ ກໍຄືໃນທົ່ວ ໂລກ. ໃນໄລຍະຜ່ານມາເຖິງວ່າບັນດາອົງການຈັດຕັ້ງສາກົນ, ພູມີພາກ ແລະ ລັດຖະບານໃນແຕ່ລະປະ ເທດຈະເພີ່ມທະວີການ ນຳໃຊ້ມາດຕະການທາງດ້ານກົດໝາຍ, ການເງິນ ແລະ ສຶກສາອົບຮົມ ເຂົ້າໃນການຕ້ານ ແລະ ສະກັດ ກັ້ນການຜະລິດ, ການ ເສບ ແລະ ການຄ້າຂາຍຢາເສບຕິດຢ່າງຕໍ່ ເນື່ອງ ແລະ ເປັນລະບົບເຊື່ອມ ໂຍງກັນຫລາຍຂຶ້ນກໍຕາມ, ແຕ່ ບັນຫານີ້ກໍຍັງສືບຕໍ່ ຮ້າຍແຮງ ແລະ ກາຍເປັນໄພຄຸກຄາມຕໍ່ ຄວາມໝັ້ນຄົງຂອງຊາດ, ສະ ຖຽນລະພາບທາງດ້ານການ ເມືອງ, ຄວາມເປັນລະບຽບ ຮຽບຮ້ອຍທາງສັງຄົມ ແລະ ຄວາມ ກ້າວໜ້າໃນການສ້າງສາພັດທະ ນາປະເທດຊາດ. ສປປ ລາວ ກໍໄດ້ຮັບຜົນກະທົບຢ່າງ ຕໍ່ເນື່ອງຈາກໄພຄຸກຄາມຂອງຢາເສບ ຕິດ, ເຮັດໃຫ້ລັດຖະບານຕ້ອງມີຍຸດທະສາດລະດັບຊາດເພື່ອແກ້ໄຂບັນຫາໃນແຕ່ລະ ໄລຍະ ແລະ ເອົາໃຈໃສ່ດຳເນີນມາດຕະການລະອຽດຢ່າງຈິງຈັງເຊັ່ນ: ປັບປຸງ ກົດໝາຍໃຫ້ຮັດກຸມ ແລະ ສອດ ຄ່ອງກັບສະພາບ ຕົວຈິງ, ສຶກສາອົບຮົມເພື່ອປູກຈິດສຳນຶກໃຫ້ຄົນໃນສັງຄົມເປັນຕົ້ນແມ່ນຊາວໜຸ່ມ-ເຍົາວະຊົນເຂົ້າໃຈຢ່າງຖືກຕ້ອງຕໍ່ຜົນຮ້າຍ ຂອງຢາເສຍຕິດຊ່ວຍເຫລືອປະຊາຊົນທີ່ເຄີຍດຳລົງຊິວິດດ້ວຍການປູກຝິ່ນໃຫ້ມີຊີວິດ ການເປັນຢູ່ດີຂຶ້ນດ້ວຍການສ້າງ ເງື່ອນ ໄຂໃຫ້ເຂົາເຈົ້າຫັນໄປປະກອບສ່ວນອາຊີບອື່ນທີ່ໝັ້ນຄົງ, ຊ່ວຍເຫລືອຜູ້ປະສົບເຄາະຮ້າຍ ຈາກຢາເສບຕິດດ້ວຍການປິ່ນ ປົວ ແລະ ຟື້ນຟູສຸຂະພາບທາງຈິດໃຈ ແລະ ຮ່າງກາຍເພື່ອຊ່ວຍ ໃຫ້ເຂົາເຈົ້າກັບຄືນມາເປັນພົນລະເມືອງດີຂອງສັງຄົມ. ນອກນີ້ ສປປ ລາວ ຍັງໄດ້ປະຕິບັດພັນທະຂອງຕົນຕໍ່ພາກພື້ນ ແລະ ສາກົນທີ່ຕົນເອງເປັນພາຄີຢ່າງ ຕັ້ງໜ້າ ແລະ ສະເໝີຕົ້ນສະເໝີ ປາຍໂດຍການຜັນຂະຫຍາຍບັນດາສັນຍາສາກົນເຂົ້າສູ່ລະບົບນິຕິກຳພາຍໃນປະເທດ, ການຮ່ວມ ມືກັບປະເທດເພື່ອນມິດ ແລະ ອົງການຈັດຕັ້ງສາກົນ.