ພິທີເປີດການຍົກລະດັບດ່ານທ້ອງຖິ່ນລະໄລ
(ແຂວງສາລະວັນ) - ລະໄລ (ແຂວງກວາງຈິ) ໄດ້ມີຂຶ້ນຢ່າງເປັນທາງການ ໃນວັນທີ
25 ມິຖຸນານີ້ ຢູ່ດ່ານດັ່ງ ກ່າວ ໂດຍການເປັນປະທານຮ່ວມຂອງທ່ານ ທອງລຸນ ສີສຸລິດ
ຮອງນາຍົກລັດຖະມົນຕີ, ລັດຖະ ມົນຕີວ່າການກະຊວງການຕ່າງ ປະເທດແຫ່ງ ສປປ ລາວ, ທ່ານ
ຟາມ ບິງມິງ ຮອງນາຍົກລັດຖະ ມົນຕີ, ລັດຖະມົນຕີວ່າການກະ ຊວງການຕ່າງປະເທດ ແຫ່ງ
ສສ ຫວຽດນາມ ພ້ອມເຈົ້າແຂວງສາ ລະວັນ ແລະ ເຈົ້າແຂວງກວາງຈິ ແລະ ບັນດາການນຳແຂວງໃກ້ຄຽງຂອງສອງປະເທດລາວ-
ຫວຽດນາມເຂົ້າຮ່ວມ.
ໃນພິທີອັນສະຫງ່າລາສີ ແລະ ເປັນປະຫວັດສາດນີ້,
ທ່ານຮອງນາຍົກລັດຖະມົນຕີ, ລັດຖະມົນຕີວ່າການກະຊວງການຕ່າງປະເທດ ແຫ່ງ ສປປ ລາວ ທອງລຸນ
ສີສຸລິດ ໄດ້ກ່າວປາໄສວ່າ: ພາຍ ຫລັງສຳເລັດການປັກຫລັກໝາຍຖີ່ ແລະ ບູລະນະລະບົບຫລັກໝາຍຊາຍແດນລາວ-ຫວຽດ
ນາມ ໂດຍມີເຈດຕະນາອັນແຮງກ້າ ເພື່ອເຮັດໃຫ້ເສັ້ນຊາຍແດນຂອງສອງປະເທດມີຄວາມຈະແຈ້ງ
ແລະ ຊັດເຈນຕະຫລອດການ; ເປັນເສັ້ນຊາຍແດນແຫ່ງສັນຕິພາບ, ມິດຕະພາບ ແລະ ການຮ່ວມມື
ເພື່ອ
ຄວາມສົມບູນພູນສຸກ ແລະ ເປັນມໍລະດົກອັນລ້ຳຄ່າໃຫ້ບັນດາອະນຸຊົນຮຸ້ນ
ຫລັງຂອງສອງປະເທດໄດ້ສືບທອດຕໍ່ໄປຊົ່ວກາລະນານ. ຄຽງຄູ່ກັນນັ້ນ, ການທີ່ສອງປະເທດໄດ້ຮ່ວມກັນສ້າງສາພັດທະນາຊາຍແດນນຳກັນ
ກໍເພື່ອເສີມສ້າງຄວາມສົມບູນພູນສຸກໃຫ້ແກ່ປະຊາຊົນທີ່ດຳລົງຊີວິດຢູ່ຕາມບໍ
ລິເວນຊາຍແດນ ກໍຄືປະຊາຊົນຂອງສອງປະເທດລາວ- ຫວຽດ ນາມ ໃຫ້ມີຊີວິດການເປັນຢູ່ທີ່ດີ
ແລະ ສ້າງຄວາມຮັ່ງມີໃຫ້ແກ່ປະເທດຊາດ. ການຍົກລະດັບດ່ານແຫ່ງນີ້ຂຶ້ນເປັນດ່ານສາກົນ
ຈະເປັນການຊຸກຍູ້ການພັດທະນາເສດຖະກິດ-ສັງຄົມລະຫວ່າງແຂວງສາລະວັນ ແລະ ແຂວງກວາງຈິ
ໃຫ້ມີການຂະຫຍາຍຕົວຂຶ້ນກວ່າເກົ່າ. ພ້ອມດຽວກັນ ກໍເປັນການສ້າງເງື່ອນໄຂໃຫ້ເປັນເສັ້ນທາງໜຶ່ງທີ່ສຳຄັນໃນການເຊື່ອມຕໍ່ເສດຖະກິດໃນພາກພື້ນນີ້.
ໃນໂອກາດນີ້, ທ່ານຮອງນາຍົກ ທອງລຸນ ສີສຸລິດ ກໍໄດ້ສະແດງຄວາມຊົມເຊີຍມາຍັງຄະນະກຳ
ມະການຊາຍແດນແຫ່ງຊາດ ລາວ-ຫວຽດ ນາມ, ຫວຽດນາມ- ລາວ, ການນຳແຂວງສາລະວັນ, ແຂວງກວາງຈິ
ຕະຫລອດເຖິງປະຊາຊົນບັນດາເຜົ່າຂອງສອງປະເທດທີ່ໄດ້ປະກອບສ່ວນເຂົ້າໃນການສ້າງສາພັດທະນາ
ແລະ ຮ່ວມມືຊ່ວຍເຫລືອເຊິ່ງກັນ ແລະ ກັນຕະຫລອດມາໃນການເຮັດໃຫ້ຊາຍແດນດັ່ງກ່າວເປັນຊາຍແດນແຫ່ງສັນຕິພາບ,
ມິດຕະພາບ ແລະ ການຮ່ວມມືຢ່າງແທ້ຈິງ.
ດ່ານສາກົນລະໄລເປັນດ່ານສາກົນທຳອິດຂອງແຂວງສາລະວັນ
ແລະ ເປັນດ່ານສາກົນອັນດັບທີ 8 ຂອງ ສປປ ລາວ ທີ່ເຊື່ອມຈອດກັບ ສສ ຫວຽດນາມ. ມາຮອດປັດຈຸບັນ,
ສປປ ລາວ ມີດ່ານສາກົນທັງໝົດ 25 ແຫ່ງ ໃນນີ້ເຊື່ອມຈອດກັບ ສສ ຫວຽດ ນາມ 8 ແຫ່ງ,
ສປ ຈີນ 2 ແຫ່ງ, ກຳປູເຈຍ 1 ແຫ່ງ, ຣາຊະອານາ ຈັກໄທ 10 ແຫ່ງ ແລະ ດ່ານສະ ໜາມບິນສາກົນ
4 ແຫ່ງ.
ດ່ານສາກົນລະໄລຕັ້ງຢູ່ຈຸດຍຸດທະສາດອັນສຳຄັນຂອງເສັ້ນ
ທາງ 15 A ທີ່ເຊື່ອມຕໍ່ຊາຍແດນ ລາວ-ຫວຽດນາມ ຫາເທສະບານແຂວງສາລະວັນ ມີຄວາມຍາວ
147 ກິໂລແມັດ ແລະ ມີເສັ້ນ ທາງ 15 B ເຊື່ອມຕໍ່ຈາກເທສະບານແຂວງອີກ 75 ກິໂລແມັດ
ໄປຈອດໃສ່ທາງເລກທີ 13 ໃຕ້ ທີ່ບ້ານນາປົ່ງ. ເສັ້ນທາງ 15 A ແລະ 15 B ນີ້ ເປັນທາງປູຢາງສອງຊ່ອງຈະລາຈອນທີ່ຫາກໍ່ສ້າງສຳເລັດ.
ສະເພາະເສັ້ນທາງ 15 B ແມ່ນເສັ້ນທາງລັດໃໝ່ທີ່ເຊື່ອມຕໍ່ເສັ້ນທາງ 13 ໃຕ້ ເຊິ່ງເມື່ອກ່ອນຜູ້ທີ່ຈະເດີນທາງໄປແຂວງສາລະວັນຕ້ອງໄດ້ເດີນ
ທາງຜ່ານເມືອງປາກເຊ ແຂວງຈຳປາສັກ. ໃນອະນາຄົດທັງສອງເສັ້ນທາງນີ້ຈະເປັນທ່າແຮງໃນການເຊື່ອມຈອດກັບເສັ້ນທາງໄປຫາດ່ານປາກຕະພານ
ເມືອງລະຄອນເພັງ (ຊາຍແດນນ້ຳຂອງ ລາວ-ໄທ) ເຊິ່ງມີແຜນການຈະກໍ່ສ້າງຂົວຂ້າມນ້ຳຂອງ
ເພື່ອເຊື່ອມຕໍ່ລະຫວ່າງແຂວງສາລະວັນກັບແຂວງອຳນາດຈະເລີນ ປະເທດໄທ. ນອກຈາກນີ້
ດ່ານຊາຍແດນສາກົນລະໄລຍັງຈະກາຍເປັນດ່ານທີ່ຮັບໃຊ້ແຜນພັດທະນາເສດຖະກິດ-ສັງຄົມຂອງແລວເສດຖະກິດຕາເວັນອອກ-
ຕາເວັນຕົກ, ການເຊື່ອມຕໍ່ຂອງອາຊຽນ ແລະ ໂຄງການເຊື່ອມໂຍງຂອງພາກພື້ນ ແລະ
ສາກົນນຳອີກ.
No comments:
Post a Comment