ຢ່າເອົາແຕ່ເພິ່ນເກີນເຖືອດ ( ຄໍລຳ ບັນຫາຈານແຍ່ )

ໂດຍ : ວິເສດ ສະແຫວງສຶກສາ

       ຈຳໄດ້ວ່າ: ຜ່ານມາ, ຈານແຍ່ເຄີຍຂຽນບົດປະເພດແລກປ່ຽນຄຳເຫັນກ່ຽວກັບ ເພງລາວ ໃນຍຸກປັດຈຸບັນວ່າມີເບື້ອງໜ້າ ເບື້ອງຫລັງແນວໃດ ແລະ ຄວນກ້າວຂາໄປ ຂ້າງໜ້າຢ່າງໃດ. ຈາກບ່ອນທີ່ວ່າ: ບໍ່ເຄີຍຮ້ອງເພງ ສຸດຈັກເພງ (ຍົກເວັ້ນເວລາຮ້ອງ ລວມໝູ່) ເພາະເອົາດີແຕ່ຟັງເປັນສ່ວນໃຫຍ່, ຈານແຍ່ຈຶ່ງບໍ່ສາມາດ ຈົກໄງ້ໄສ້ພຸງຂອງຈັງ ຫວະ, ທຳນອງ, ສຽງສູງສຽງຕ່ຳຂອງເພງມາເວົ້າຢ່າງລະອຽດໄດ້ກໍເລີຍໄດ້ແຕ່ເວົ້າໄປ ແບບຂີ່ມ້າຊົມສວນ. ໃນບົດເຫລົ່ານັ້ນ, ຈານແຍ່ໄດ້ເວົ້າ ວ່າ: ບໍ່ມີຍາມໃດທີ່ ເພງລາວ ມີໂອກາດຕິດປີກໂບຍບິນຂ້າມຊາຍແດນໄປໄກເທົ່າກັບຍຸກປັດຈຸບັນ. ເພງ “ໄຕດຳລຳ ພັນ” ຂອງ ກໍວິ ເສດ ໃນເມື່ອ ກ່ອນຢ່າງເກັ່ງດັງໄປຮອດບາງປະເທດທີ່ມີຊາຍແດນຕິດກັບປະເທດເຮົາເທົ່ານັ້ນ. ແຕ່ດຽວນີ້ ເພງລາວໄດ້ກາຍເປັນ ໜຶ່ງໃນບັນ ດາປັດໄຈປາຍແຫລມຂອງຂະບວນການເຊື່ອມໂຍງອາ ຊຽນ, ອາຊີ ແລະ ທົ່ວໂລກ. ນັກ ຮ້ອງໜຸ່ມນ້ອຍລາວຫລາຍຄົນໄດ້ ຮັບກຽດຖືກແຕ່ງຕັ້ງໂດຍອົງການຈັດຕັ້ງສາກົນໃຫ້ເປັນທູດໃນ ຂະແໜງວຽກທີ່ຊົງກຽດຕ່າງໆ. ເປັນຈັ່ງຊີ້ຊິບໍ່ໃຫ້ເອີ້ນວ່າ: ໂດດ ເດັ່ນກ້າວໄກ ແລ້ວຊິໃຫ້ເອີ້ນວ່າແນວໃດ ?.

      ແຕ່ຈານແຍ່ກໍເຄີຍເວົ້າເຖິງ ບາງບັນຫາທີ່ຍັງຄາໃຈ ແລະ ບໍ່ ທັນເຫັນວ່າມີພາກສ່ວນໃດຈິງຈັງ ແລະ ຈິງໃຈແກ້ໄຂເທື່ອ ເຊັ່ນບັນ ຫາການປ່ຽນແປງບາງເນື້ອໃນ ຂອງເພງປະຕິວັດແບບຕາມໃຈ ດ້ວຍຂໍ້ອ້າງຕື້ນໆວ່າ: ຂໍ້ຄວາມນີ້ ບໍ່ເໝາະສົມແລ້ວ ເພາະດຽວນີ້ ພວກເຮົາ “ບໍ່ມີເຂດປົດປ່ອຍ ແລ້ວ” ຄືເມື່ອກ່ອນ ເຊັ່ນບາງເນື້ອ ໃນຂອງເພງ “ທົ່ງນາແຊງ” ທີ່ວ່າ: “ເພື່ອສ້າງສາ ເຂດປົດປ່ອຍ ເຮົາໃຫ້ເຂັ້ມແຂງ” ກໍປ່ຽນມາເປັນ “ເພື່ອສ້າງສາປະເທດຊາດເຮົາ ໃຫ້ເຂັ້ມແຂງ”. ບັນຫານີ້ ຖ້າເບິ່ງກັນແບບ ຕື້ນໆກໍອາດແລ້ວໄປ, ແຕ່ຖ້າເບິ່ງດ້ວຍສາຍຕາທີ່ວ່າ: ສຽງເພງ ຫລື ສິລະປະແຕ່ລະຍຸກ ແຕ່ລະສະໄໝນັ້ນຕ້ອງສ່ອງແສງ ສະ ພາບຄວາມເປັນຈິງຂອງຍຸກນັ້ນໆ ແລ້ວກໍຈະເຫັນວ່າ: ການ ປ່ຽນແປງດັ່ງກ່າວເປັນການລຶບ ລ້າງປະຫວັດສາດຍ່ານໜຶ່ງຂອງ ປະເທດຊາດ. ນອກຈາກເພງ “ທົ່ງນາແຊງ” (ຂໍໂທດບໍ່ຈຳຊື່ເຕັມ ຂອງເພງນີ້) ເນື້ອໃນຂອງອີກ ຫລາຍໆເພງກໍຖືກລະເມີດເຊັ່ນ ກັນ. ຈຸດທີສອງທີ່ຈານແຍ່ເຫັນ ວ່າຄວນລະມັດລະວັງໃນບາງ ເພງທີ່ເວົ້າເຖິງສາຍສຳພັນກັບປະ ເທດບ້ານໃກ້ເຮືອນຄຽງ. ເພງປະ ເພດນີ້ຈຸດປະສົງແມ່ນດີ ເສຍແຕ່ ວ່າເວລາເວົ້າຮອດເຂດນ້ຳແດນ ດິນພັດເວົ້າບໍ່ຄົບບໍ່ຖ້ວນ. ຈານແຍ່ວ່າເພງປະເພດນີ້ ສາມາດແກ້ໄຂເນື້ອໃນໄດ້ ຫລື ບໍ່ກໍເຊົາຮ້ອງ ແລ້ວເກັບມ້ຽນເຂົ້າສາງ ເພື່ອເປັນ ບົດຮຽນ. ຈຸດທີສາມທີ່ຈານແຍ່ເຄີຍເອີ່ຍເຖິງ ວ່າຄວນລະວັງສົບລະວັງປາກນັ້ນ ກໍຄືການເອົາຊື່ ຂອງປະເທດໃດປະເທດໜຶ່ງເຂົ້າ ມາເປັນເນື້ອໃນເພງນັ້ນ ຕ້ອງຄິດໃຫ້ຄັກໆ ວ່າ: ມັນຈະມີຜົນດີຜົນຮ້າຍແນວໃດ, ມັນຈະມີຫຍັງເຕີນ ມາຕຳເຮົາຄືນ ເພາະບາງປະເທດນັ້ນ ເຂົາເອົາຈິງເອົາຈັງແທ້ໆກັບ ຊື່ຂອງປະເທດເຂົາ, ພວກເຮົາຈະເອົາແຕ່ມ່ວນ, ເອົາແຕ່ຄິດວ່າຊື່ ຂອງປະເທດນັ້ນປະເທດນີ້ມັນຄ່ອງດີກັບເນື້ອເພງ. ແຕ່ກໍຍັງ ມີອີກຈຸດໜຶ່ງທີ່ຈານແຍ່ບໍ່ທັນໄດ້ເວົ້າ ແລະ ຂໍເວົ້າໃນບົດນີ້ເລີຍນັ້ນ ຄືຢາກໃຫ້ລະວັງເນື້ອໃນເພງທີ່ເວົ້າເຖິງຄວາມອຸດົມສົມ ບູນຂອງ ເຂົ້າປາອາຫານ, ສັດສາວາສິ່ງ ໃນດົງໃນປ່າ ວ່າບໍ່ອຶດບໍ່ຢາກສາມາດລ່າມາເປັນອາຫານໄດ້ ເພາະວ່າເນື້ອໃນແບບ ນີ້ມັນສວນທາງກັບທິດອະນຸລັກສັດປ່າບາງຊະນິດທີ່ໃກ້ຈະສູນພັນ. ເພງທີ່ມີເນື້ອໃນແບບນີ້ອາດສ້າງຈິດສຳນຶກໃຫ້ອອນ ຊອນນຳການລ່າສັດມາເປັນອາຫານກໍໄດ້. ເວົ້າສ່ຳນີ້ຄິດວ່າຄົງພໍຫອມປາກຫອມຄໍແລ້ວລະ.