ປະຊາຊົນພໍໃຈເຫັນສະພາຈີ້ພາກລັດຕອບຂໍ້ຂ້ອງໃຈຜ່ານສື່ມວນຊົນ

    ກອງປະຊຸມສະໄໝສາມັນເທື່ອທີ 7 ຂອງສະພາແຫ່ງຊາດ ຊຸດທີ VII ໄດ້ອັດລົງດ້ວຍຜົນ ສຳເລັດຈົບງາມໃນທ້າຍອາທິດ ຜ່ານມາ ແລະ ໃນກອງປະຊຸມເທື່ອນີ້ເຫັນວ່າປະຊາຊົນໃນທົ່ວປະເທດໄດ້ໃຫ້ຄວາມສົນໃຈເປັນພິເສດກວ່າຄັ້ງຜ່ານມາເພາະ ວ່າທຸກບັນຫາຂ້ອງໃຈທີ່ປະຊາຊົນ ສ່ອງແສງເຂົ້າມາຜ່ານໂທລະສັບສາຍດ່ວນ,ໂທລະສານ ແລະ ສົ່ງອີເມວຫາກອງປະຊຸມ ແມ່ນໄດ້ເຊີນເອົາພາກສ່ວນກ່ຽວຂ້ອງ ອອກມາຊີ້ແຈງຕອບຂໍ້ຂ້ອງໃຈ ທັນທີຊຶ່ງບໍ່ຄືກັບກອງປະຊຸມສະພາໃນຫລາຍຄັ້ງຜ່ານມາ ກວ່າຈະຕອບຂໍ້ຂ້ອງໃຈຂ້ອງປະຊາຊົນແມ່ນໄດ້ໃຊ້ເວລາເປັນຫລາຍເດືອນ ແລະ ເປັນປີກໍມີອັນໄດ້ເຮັດໃຫ້ບາງບັນຫາພົ້ນເດັ່ນ ທີ່ເກີດຂຶ້ນໃນຫລາຍທ້ອງຖິ່ນບໍ່ໄດ້ຮັບການແກ້ໄຂທັນກັບສະພາບການ. ແຕ່ສຳລັບກອງປະຊຸມເທື່ອນີ້ ສະພາບໍ່ປ່ອຍໃຫ້ຄວາມ ຂັດຂ້ອງໝອງໃຈ ຫລື ຄວາມເດືອດຮ້ອນຕ່າງໆຂອງປະຊາຊົນຖືກແກ່ຍາວຄືດັ່ງຜ່ານມາ ເຊິ່ງໄດ້ເຊີນເອົາທຸກຂະແໜງການ ມາຊີ້ແຈງຕໍ່ສື່ມວນຊົນໃນໄລຍະດຳເນີນກອງປະຊຸມບໍ່ວ່າບັນຫາກ່ຽວກັບການພັດທະນາເສດຖະກິດ-ສັງຄົມ, ລວມ ໄປເຖິງ ການຕອບຂໍ້ຂ້ອງໃຈຂອງປະຊາຊົນທີ່ມີຄວາມຂັດຂ້ອງໃຈໃນບັນຫາຕ່າງໆທີ່ແຕະຕ້ອງເຖິງສິດ ແລະ ຜົນປະໂຫຍດ ລວມຂອງ ຊາດແລະປະຊາຊົນບັນດາເຜົ່າເຖິງວ່າມີບາງບັນຫາຂະແໜງການກ່ຽວຂ້ອງຍັງຕອບບໍ່ໄດ້ດີເທົ່າທີ່ຄວນກໍຕາມໂດຍສະເພາະບັນດາ ຂະແໜງການທີ່ຕິດພັນກັບຂົງເຂດເສດຖະກິດ ແຕ່ກໍສາມາດແກ້ໄຂຂ້ອງຂອງໃຈຂອງສັງຄົມກໍຄືປະຊາຊົນໄດ້ເປັນຢ່າງດີທັງ

ຢັ້ງຢືນໃຫ້ເຫັນວ່າ: ສະພາແຫ່ງຊາດໄດ້ເຮັດບົດບາດຂອງຕົນຢ່າງແຂງແຮງຂຶ້ນກວ່າເກົ່າໃນການເປັນຕົວແທນແຫ່ງສິດຜົນປະ ໂຫຍດຂອງປະຊາຊົນຢ່າງແທ້ຈິງໃນການຊຸກຍູ້ຕິດຕາມກວດກາການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມຂອງ ລັດກໍຄືການຕອບສະໜອງການແກ້ໄຂບັນຫາສະພາບຫຍຸ້ງຍາກຕ່າງໆໃນການດຳລົງຊີວິດ ແລະ ການທຳມາຫາກິນຂອງປະຊາ ຊົນບັນດາເຜົ່າໃຫ້ດີຂຶ້ນເທື່ອລະກ້າວ. ແນວໃດກໍຕາມສັງຄົມສ່ວນຫລາຍສະເໜີຜ່ານສື່ມວນຊົນວ່າຢາກໃຫ້ສະພາແຫ່ງຊາດ ສືບຕໍ່ຊຸກຍູ້ບັນດາຂະແໜງການຂອງລັດໃຫ້ຮ່ວມມື ກັບສື່ຫລາຍຂຶ້ນຕື່ມເພື່ອສະເໜີ ຜົນງານການຈັດຕັ້ງປະຕິບັດແຜນພັດທະ ນາເສດຖະກິດ-ສັງຄົມຂອງແຕ່ລະຂົງເຂດພ້ອມດຽວກັນນັ້ນ, ກໍຊອກໃຫ້ເຫັນບັນດາຂໍ້ຫຍຸ້ງຍາກ ແລະ ສິ່ງຫຍໍ້ທໍ້ຕ່າງໆເພື່ອ ພ້ອມກັນຫາວິທີແກ້ໄຂໄດ້ຢ່າງທັນການ, ເຊິ່ງໃນໄລຍະຜ່ານມາຫລາຍພາກສ່ວນຍັງບໍ່ໃຫ້ການຮ່ວມມືກັບສື່ມວນຊົນດີເທົ່າທີ່ ຄວນໂດຍສະເພາະການຕອບບັນຫາທີ່ສັງຄົມມີຄວາມສົນໃຈ.