ຈະເຮັດແນວໃດເພື່ອບໍ່ໃຫ້ມີການສວຍໂອກາດເກັບເງິນຄ່າຈອດລົດຕາມແຄມທາງ

      ໃນປັດຈຸບັນຜູ້ໃຊ້ລົດໃຊ້ຖະໜົນຫຼາຍຄົນເກີດອາການມຸດມັດກັບການເກັບ ເງິນຄ່າຝາກລົດຢູ່ຕາມແຄມທາງ ແລະ ສະຖາ ທີ່ຕ່າງໆໃນນະຄອນຫຼວງວຽງຈັນ, ນັບທັງສະຖານທີ່ສະທາລະນະ, ໂຮງໝໍ, ໂຮງຮຽນ, ບໍລິເວນຂອບເຂດຕະຫຼາດ, ເຫັນວ່າ ຍັງບໍ່ທັນສອດຄ່ອງ, ສ້າງຄວາມສັບສົນ ແລະ ມີລັກສະນະຊະຊາຍ, ສວຍໂອກາດເຫັນແກ່ຜົນປະໂຫຍດສ່ວນຕົວຫຼາຍກວ່າ, ໂດຍບໍ່ຮູ້ວ່າຮ່ວງເງິນດັ່ງ ກ່າວ ເຂົ້າຖົງໃຜ, ສ້າງຄວາມເຂົ້າໃຈຜິດລະແວງສົງໃສໃຫ້ຜູ້ໃຊ້ລົດໃຊ້ຖະໜົນ, ຊຶ່ງຜ່ານມາພໍຮູ້ວ່າການ ບໍລິການຝາກລົດຢູ່ຕາມສະຖານທີ່ດັ່ງກ່າວສ່ວນໃຫຍ່ແມ່ນຜູ້ຮັບເໝົາຈາກອົງການບໍລິຫານ ແລະ ພັດທະນາຕົວເມືອງ    ( ອພ ບ) ຫຼືຈາກຂະແໜງການກ່ຽວຂ້ອງເຊັ່ນ: ໂຮງໝໍ ແລະ ຕະຫຼາດຕ່າງໆໃນນະຄອນຫຼວງວຽງຈັນ, ຊຶ່ງບາງບ່ອນເບິ່ງແລ້ວບໍ່ຈະ ແຈ້ງປານໃດວ່າຜູ້ບໍລິການເຮັດຝາກລົດນັ້ນມາຈາກພາກສ່ວນໃດ ?, ໃຜເປັນຜູ້ຮັບຜິດຊອບ ?

ໃນເວລາທີ່ຜູ້ຖືກເກັບເງິນຄ່າ ຝາກລົດຖາມກໍໄດ້ຮັບຄຳຕອບ ວ່າ ເມືອງເປັນຄົນສັ່ງໃຫ້ເກັບ ຫຼື  ວ່າເຂດນີ້ເປັນເຂດສຳປະທານ ຮັບເໝົາຂອງເຂົາເຈົ້າຖ້າຈອດ ລົດຕ້ອງໄດ້ເສຍເງິນ, ໂດຍບໍ່ມີຂໍ້ຍົກເວັ້ນໃດໆຕົວຢ່າງ: ມີຜູ້ຂັບຂີຫຼາຍຄົນເລົ່າວ່າມີບາງຄັ້ງທີ່ຕົນ ໄດ້ຂັບລົດໄປຈອດບແຄມທາງ ຊົ່ວຄາວພຽງເພື່ອໃຫ້ຄົນລົງກໍຈະມີຄົນເຂົ້າມາເກັບເງິນຄ່າ ຈອດລົດທັນທີ, ໃນຂະນະທີ່ບໍລິ ເວນດັ່ງກ່າວບໍ່ແມ່ນບ່ອນຝາກລົດ ແລະ ບາງກໍລະນີກໍມີການຜິດຖຽງກັນລະຫວ່າງຜູ້ຂັບຂີ່ ແລະ ຜູ້ເກັບປີ້, ຊ້ຳບໍ່ໜໍາຄ່າຝາກ ລົດຕາມສະຖານທີ່ດັ່ງກ່າວກໍມີລາຄາ ແຕກໂຕນກັນຫຼາຍ ເຊັ່ນ: ບາງຈຸດ 3 ພັນກີບ, ບາງຈຸດ 5 ພັນກີບ ແລະ ບາງຈຸດສູງເຖິງ 8 ພັນກີບ ຍິ່ງໄປກວ່ານັ້ນການຈອດ ລົດຢູ່ບໍລິເວນເສັ້ນທາງອ້ອມຕະຫຼາດໃຫຍ່ບາງບ່ອນບໍ່ມີປີ້ເກັບເງິນຄ່າຝາກລົດຊ້ຳ, ບໍ່ພຽງ ແຕ່ເທົ່ານັ້ນຜູ້ປະກອບການຍັງບໍ່ຫົວ ຊາກັບການຈັດສັນຄວາມເປັນລະບຽບຂອງການຈອດລົດ, ອັນໄດ້ສ້າງຄວາມແອອັດ ໃຫ້ແກ່ການໃຊ້ລົດໃຊ້ຖະໜົນ, ເປັນຕົ້ນ ເສັ້ນທາງເຂດຕະຫຼາດຕ່າງໆ, ດັ່ງນັ້ນຈຶ່ງສະເໜີໃຫ້ພາກສ່ວນກ່ຽວຂ້ອງເບິ່ງຄືນ ແລະ ຄວນມີມາດຕະການແກ້ໄຂ້ເພື່ອເຮັດ ແນວໃດໃຫ້ການເກັບຄ່າຝາກລົດຢູ່ຕາມສະຖານທີ່ຕ່າງໆມີຄວາມເໝາະສົມ, ເປັນເອກະ ພາບ ແລະ ໂປ່ງໃສ, ເພື່ອບໍ່ໃຫ້ເກີດ ຊ່ອງຫວ່າງໃຫ້ຄົນບໍ່ດີແອບອ້າງຫາຜົນປະໂຫຍດແກ່ຕົນເອງດັ່ງທີ່ເຄີຍເປັນມາແລ້ວ.