ປະຊາຊົນຈຳນວນບໍ່ໜ້ອຍລໍຖ້າສິ່ງຊົດເຊີຍດິນຖືກໂຄງການ

     ໃນໄລຍະດຳເນີນກອງປະຊຸມ ສະໄໝສາມັນເທື່ອທີ 7 ຂອງສະ ພາແຫ່ງຊາດຊຸດທີ VII ທີ່ສຳ ເລັດລົງເມື່ອບໍ່ດົນນີ້, ໄດ້ມີ ປະຊາຊົນຈຳນວນຫລາຍສະເໜີບັນຫາໃຫ້ສະພາຮັບຊາບໂດຍສະເພາະກໍແມ່ນປະຊາຊົນທີ່ຍັງບໍ່ໄດ້ຮັບ ສິ່ງຊົດເຊີຍທີ່ດິນຖືກ ໂຄງການພັດທະນາທັງໂຄງການຂອງລັດ ແລະ ເອກະຊົນ ເປັນຕົ້ນ :ໂຄງ ການກໍ່ສ້າງຕາຝັ່ງເຈື່ອນຢູ່ເມືອງສີໂຄດຕະບອງ, ນະ ຄອນຫລວງວຽງຈັນ, ໂຄງການພັດທະນາ ເຂດເສດຖະກິດພູຂຽວແຂວງຄຳມ່ວນ, ໂຄງການສະໜາມກິລາ ແຫ່ງຊາດຫລັກ 16 ແລະ ສະໜາມກ໊ອຟບູຍອງ ແລະ ໂຄງການອື່ນໆອີກ.

     ທ່ານຮອງຫົວໜ້າກົມຄຸ້ມ ຄອງທີ່ດິນ ອະໂນໄທ ຈັນທະລາສີ ໃຫ້ຮູ້ວ່າ: ຕໍ່ບັນຫາຊົດເຊີຍ ໂຄງການຕ່າງໆນີ້, ສ່ວນຫລາຍ ແມ່ນມີຄະນະຮັບພິຊອບກ່ຽວກັບການແກ້ໄຂຜົນກະທົບເຊິ່ງບາງໂຄງການກໍ່ໄດ້ຈ່າຍທົດແທນ ແລະ ຊົດເຊີຍໃຫ້ປະຊາຊົນທັງ ເປັນເງິນ ແລະ ທີ່ດິນໄປຈຳນວນ ໜຶ່ງແລ້ວ, ແຕ່ຍັງມີຈຳນວນບໍ່ໜ້ອຍທີ່ຍັງບໍ່ທັນຈັດຕັ້ງປະຕິບັດສຳເລັດຊຶ່ງອາດເປັນຍ້ອນມີ ບາງໂຄງການຍັງຢູ່ໃນຂັ້ນຕອນພິຈະລະນາຂອງຄະນະກຳມະການປະເມີນຕີລາຄາ ຫລື ລໍຖ້າງົບປະມານ, ສະນັ້ນປະຊາຊົນທີ່

ຍັງບໍ່ທັນໄດ້ຮັບສິ່ງຊົດເຊີຍກໍສາມາດໄປພົວພັນກັບພາກສ່ວນກ່ຽວຂ້ອງ ຫລື ເຈົ້າຂອງໂຄງການຕື່ມ, ສະເພາະການຊົດເຊີຍ ຂອງໂຄງການພັດທະນາເຂດເສດຖະກິດພູຂຽວຢູ່ແຂວງຄຳມ່ວນນັ້ນ ແມ່ນໄດ້ປະຕິບັດຕາມຂໍ້ຕົກລົງຂອງເຈົ້າແຂວງຄຳມ່ວນທີ່ ກຳນົດໄວ້ຄື: ປະເພດດິນປ່າເລົ່າເປົ່າຫວ່າງແມ່ນ 10 ລ້ານກີບຕໍ່ເຮັກຕາ, ດິນນາເຟືອງ 34 ລ້ານ ກີບຕໍ່ເຮັກຕາ ແລະ ປະເພດສິ່ງ ປຸກສ້າງຕ່າງໆແມ່ນຊົດເຊີຍຕາມການປະເມີນຂອງຄະນະກຳມະ ການກ່ຽວຂ້ອງ ແລະ ການຊົດເຊີຍຂອງໂຄງການອື່ນໆກໍອາດ ປະຕິບັດໃນລັກສະນະຄ້າຍຄືກັນນີ້.