laophatthananewspaper: ໜັງສືພິມພາສາຕ່າງປະເທດມີບົດບາດສຳຄັນໃນການໂຄສະນາສູ່ສາກົນ

ເນື່ອງໃນໂອກາດສະເຫລີມສະຫລອງວັນສື່ມວນຊົນແຫ່ງຊາດ 13 ສິງຫາ ທ່ານທອງສະ ຫວັດ ຈັນສົມບັດ ຫົວໜ້າບັນນາ ທິການໜັງສືພິມພາສາຕ່າງປະເທດ ໄດ້ໃຫ້ສຳພາດຕໍ່ນັກຂ່າວໜັງສືພິມລາວພັດທະນາວ່າ: ໜັງ ສືພິມພາສາຕ່າງປະເທດແມ່ນໜຶ່ງໃນບັນດາສື່ມວນຊົນລາວ ແລະ ກໍເປັນສື່ໜຶ່ງທີ່ມີການພັດ ທະນາຂະ ຫຍາຍຕົວໄວ ນັບທາງດ້ານປະລິມານ ແລະ ຄຸນນະພາບ ບົນຈິດໃຈເພິ່ງຕົນເອງ, ກຸ້ມຕົນ ເອງ ແລະ ສ້າງຄວາມເຂັ້ມແຂງດ້ວຍຕົນເອງ ໃນການນຳໃຊ້ກາ ລະໂອກາດ ແລະ ຄວາມອາດສາ ມາດບົ່ມຊ້ອຍທີ່ມີຢູ່ໃນຍຸກໂລກາພິວັດມາພັດທະນາຕົນເອງ ແລະ ເພື່ອເປັນການສົ່ງເສີມການເປີດກວ້າງການພົວພັນຮ່ວມມືກັບໂລກພາຍນອກ ແລະ ມີຄວາມມຸ້ງໝາຍເພື່ອຊ່ວຍເສີມສ້າງຄວາມເຂົ້າໃຈ, ການສື່ສານ ແລະ ການເຊື່ອມໂຍງລະ ຫວ່າງລາວ ແລະ ບັນດາປະຊາຊາດໃນໂລກ ໃຫ້ນັບມື້ກວ້າງຂວາງຂຶ້ນ.

ທ່ານຫົວໜ້າບັນນາທິການໜັງສືພິມຕ່າງປະເທດ ໃຫ້ຮູ້ວ່າ: ໜັງສືພິມຂອງຕົນ ຈະສືບຕໍ່ຍຶດ ໝັ້ນມາດຕະຖານຈັນຍາບັນ ຂອງສື່ມວນຊົນໃນການສະໜອງຂໍ້ມູນຂ່າວສານໃຫ້ແກ່ສັງຄົມດ້ວຍຄວາມວ່ອງໄວ, ທັນກັບເຫດການ, ສະພາບການ, ຖືກ ຕ້ອງຊັດເຈນ, ແຫລມຄົມ, ກວ້າງໄກ, ທົ່ວເຖິງ ແລະ ມີຄວາມຮັບ ຜິດຊອບສູງ, ເພີ່ມຄຸນຄ່າຂອງໜັງສືພິມ ທີ່ມີເນື້ອໃນອຸດົມ ສົມ ບູນ ແລະ ເຕັມໄປດ້ວຍນາໆສາ ລະຄວາມຮູ້ ແລະ ຍັງສາມາດຕອບຄຳຖາມຂອງຜູ້ອ່ານດ້ວຍຄວາມສັດຊື່ບໍລິສຸດ ແລະ

ຈິງໃຈ, ຊຶ່ງຈະເພີ່ມຄໍລຳ ແລະ ໃຫ້ນັກຂ່າວລົງເລິກຂຽນຂ່າວສະເພາະແຕ່ລະຂະແໜງການກວມລວມ ທົ່ວປະເທດ, ເພີ່ມການລາຍງານຂ່າວຈາກຕ່າງແຂວງ, ການເຊື່ອມໂຍງເຂົ້າເປັນປະຊາຄົມອາຊຽນ, ເພີ່ມທະວີການແລກປ່ຽນຂໍ້ມູນຂ່າວສານກັບສະ ມາຊິກເຄືອຂ່າຍຂ່າວອື່ນໆນັບທັງພາຍໃນ ແລະ ຕ່າງປະເທດ ແລະ ພ້ອມນີ້ທາງໜັງສືພິມພາສາຕ່າງປະເທດຍັງຈະປັບປຸງດ້ານຂ່າວທຸລະກິດ, ສັງຄົມ ແລະ ອື່ນໆໃຫ້ຄົບວົງຈອນ. ນອກຈາກນັ້ນ ຍັງໄດ້ຫັນມາບໍລິການຂ່າວ ສານຜ່ານສື່ຫລາຍຮູບແບບ, ຫລາຍຊ່ອງທາງ ແລະ ຫລາກຫລາຍວິທີການເພື່ອໃຫ້ຜູ້ອ່ານ ໄດ້ຊົມໃຊ້ສະດວກເປັນຕົ້ນຂ່າວເປັນຕົວອັກສອນ, ພາບນິ້ງ, ພາບເຄື່ອນໄຫວ, ພາບວິດີໂອ ແລະ ສຽງ, ຊຶ່ງສາມາດຮັບບໍລິການໄດ້ຜ່ານອິນເຕີເນັດ-ເວັບໄຊ, ຜ່ານໂທລະສັບມືຖື ແລະ ອື່ນໆ. ພ້ອມກັນນັ້ນຍັງໄດ້ເອົາໃຈໃສ່ການພັດທະນາຊັບພະຍາກອນມະນຸດ ເພື່ອຍົກລະດັບຄວາມຮູ້ ແລະ ຄວາມສາມາດໃຫ້ແກ່ຖັນແຖວພະນັກງານຄ່ອຍໆຫຍັບມໍ່ສູ່ມາດຕະຖານສາກົນ ແລະ ສາ ມາດເຊື່ອມໂຍງກັບພາກພື້ນ ແລະ ໃນໂລກ.

ການພັດທະນາຂອງໜັງສືພິມພາສາຕ່າງປະເທດໄດ້ປະຕິບັດເປັນແຕ່ລະບາດກ້າວ ຈາກລາຍສັບປະດາໃນປີ 1994 ມາເປັນລາຍ 2 ສະບັບຕໍ່ອາທິດໃນປີ 1996 ແລະ ເປັນລາຍວັນໃນປີ 2004 ເປັນຕົ້ນມາ. ໃນໄລຍະຕົ້ນແມ່ນພິມອອກ ລາຍສັບປະດາມີ 16 ໜ້າເປັນພາບຂາວ-ດຳ ແລະ ຈັດໜ້າໃຊ້ຮູບການຕັດຕໍ່ດ້ວຍມື, ໃນນັ້ນສະບັບທຳອິດໄດ້ພິມອອກ ໃນວັນທີ 7 ເມສາ 1994 ແລະ ໃນປັດຈຸບັນມີ 30 ກວ່າໜ້າ ປະກອບມີພາບສີຢູ່ໜ້າປົກ, ໜ້າທຸລະກິດ ແລະ ໜ້າສຸດທ້າຍ.