ຜູ້ລະເມີດຍອມໃຫ້ປັບໃໝ ແຕ່ຂໍ ໃຫ້ເຈົ້າຫນ້າທີ່ມີຄວາມຊື່ສັດໂປ່ງໃສ

     ປັດຈຸບັນມີຫາງສຽງຂອງ ສັງຄົມຈົ່ມວ່າສຽດສີຕໍ່ບັນຫາ ເຈົ້າໜ້າທີ່ດຳເນີນການປັບໃໝຜູ້ລະເມີດບໍ່ວ່າຈະເປັນການລະ ເມີດລະບຽບຈະລາຈອນລວມໄປເຖິງການລະເມີດຂອງຜູ້ປະກອບ ການຄ້າຂາຍຕ່າງໆ, ໂດຍເຈົ້າ ໜ້າທີ່ກ່ຽວຂ້ອງເຫລົ່າ ນີ້ກວດ ພົບບໍ່ມີໜັງສືຄົບຖ້ວນຈຳເປັນຕ້ອງ ໄດ້ປັບໃໝໃສ່ລະບຽບໂດຍຜູ້ລະ ເມີດສ່ວນຫລາຍແມ່ນຍອມຮັບຄວາມຜິດ ເຫັນດີໃຫ້ປັບ ໃໝແຕ່ຂໍໃຫ້ເຈົ້າໜ້າທີ່ກ່ຽວຂ້ອງມີຄວາມບໍລິສຸດສັດຊື່ໂປ່ງໃສ ໄດ້ເງິນ ແລ້ວຄວນເຮັດໃບເກັບເງິນ ຫລື ໃບບິນໃຫ້ຜູ້ລະເມີດ ເພື່ອສະແດງໃຫ້ເຫັນເຖິງຈັນຍາບັນຂອງເຈົ້າໜ້າທີ່ ແລະ ເປັນການຢັ້ງຢືນວ່າ ເງິນດັ່ງກ່າວຈະບໍ່ຕົກເຮ່ຍ ເສຍຫາຍ ແລະ ນຳໄປ ໃຊ້ຈ່າຍໃນທາງທີ່ບໍ່ຖືກຕ້ອງ.

     ສະພາບການດັ່ງກ່າວໄດ້ເກີດມີຂຶ້ນຢູ່ຫລາຍຂະແໜງການທີ່ ນອນຢູ່ໃນຖັນແຖວການບໍລິການປະຊາຊົນໃນນີ້, ສຽງຈົ່ມ ທີ່ໜາຫູກວ່າໝູ່ແມ່ນຂະແໜງຕຳຫຼວດຈະລາຈອນທີ່ປະຈຳຢູ່ຕາມປ້ອມຍາມຕ່າງໆເມື່ອພົບເຫັນຜູ້ລະ ເມີດເຊັ່ນວ່າ: ລ່ວງໄຟ ແດງ, ບໍ່ໃສ່ ໝວກກັນກະທົບ ຫລື ລ່ວງປ້າຍຫ້າມ, ເຈົ້າໜ້າທີ່ຕ້ອງໄດ້ເປົ່າ ໝາກຫວິດເພື່ອກວດກາໃນກໍລະນີເອກະສານ ບໍ່ຄົບຖ້ວນຕ້ອງໄດ້ຕີຄວາມຜິດເປັນຫລາຍກະໂທງ ໂດຍໃຊ້ຂໍ້ອ້າງຕ່າງໆວ່າ: ຖ້າ ໄປຫ້ອງການຈະລາຈອນເຈົ້າຈະ ຕ້ອງໄດ້ ຈ່າຍ ຫລາຍ, ຜູ້ລະເມີດ ຕ້ອງໄດ້ຂໍຮ້ອງກັບເຈົ້າໜ້າທີ່ຂໍ ຈ່າຍຜ່ອນ ແລະ ຈ່າຍເງິນໃຫ້ ກັນຕາມຄວາມສາມາດຢ່າງຕ່ຳກໍ

40-50 ພັນ ກີບ ຈຶ່ງປ່ອຍໄປ, ໂດຍບໍ່ຫົວຊາກັບໃບຮັບເງິນ,ເຊັ່ນດຽວກັບເຈົ້າໜ້າທີ່ຕຳຫຼວດລ໊ອກລໍ້ລົດຜູ້ທີ່ລະເມີດຈອດ ປ້າຍຫ້າມຕາມ ສາຍທາງຕ່າງໆກໍໃຊ້ຮູບການປັບໃໝເອົາເງິນເຊັ່ນ ດຽວກັນ, ໂດຍບໍ່ຟັງຫາງສຽງທັກທ້ວງຈາກສັງຄົມ ແຕ່ຢ່າງໃດ.  

      ນອກຈາກນີ້ຍັງເກີດມີຫາງສຽງຕໍ່ເຈົ້າໜ້າທີ່ກວດກາປ່າໄມ້ ແລະ ພາກສ່ວນກ່ຽວຂ້ອງທີ່ລົງຕິດຕາມກວດກາການເຄື່ອນ ຍ້າຍໄມ້ແຕ່ລະປະເພດຈາກເມືອງນອກເຂົ້າສູ່ນະຄອນຫລວງເປັນຕົ້ນໄມ້ຄ້ຳແບບ, ໄມ້ປ່ອງ, ຟືນ, ຖ່ານ  ແລະ ອື່ນໆ, ຊຶ່ງເຈົ້າ ໜ້າທີ່ດັ່ງກ່າວໄດ້ລົງສະກັດຢູ່ຕາມຈຸດ ຕ່າງໆທີ່ຫລໍ່ແຫລມເມື່ອພົບເຫັນລົດຂົນສົ່ງວັດຖຸດັ່ງກ່າວກໍຈະ ອອກມາດຳເນີນການ ກວດກາ ເອກະສານ ຫລື ບາງກໍລະນີ ກໍບໍ່ກວດມີແຕ່ໃຊ້ຮູບການຖາມ ເອົາເງິນຈາກຜູ້ລະເມີດໂດຍກົງກໍມີຄັນໜຶ່ງຢ່າງ ຕ່ຳກໍ ອາດເສຍ 5 ແສນຫາ 1 ລ້ານກີບ ອັນສົ່ງຜົນ ເຮັດໃຫ້ຜູ້ປະກອບການດັ່ງກ່າວອັບປະໂຫຍດ ແລະ ຮ້າຍແຮງ ໄປກວ່ານັ້ນ ກໍແມ່ນສຽງຈົ່ມຈາກຊາວບ້ານກ່ຽວກັບການເກັບ ເງິນຄ່າທຳນຽມເຊັນເອກກະ ສານຕ່າງໆຂອງນາຍບ້ານກໍນັບມື້ແຜ່ຫລາຍ ຕົກເປັນກໍລະນີທີ່ ຄ້າຍຄືກັນຂອງທຸກໆບ້ານ, ຕົວ ຢ່າງເຊັນໃບຢັ້ງຢືນທີ່ຢູ່, ໜັງສື ແຈ້ງການເກີດ ແລະ ຄຳຮ້ອງ ຕ່າງໆຕ້ອງໄດ້ ເສຍຄ່າທຳນຽມ ຕ່ຳສຸດ 50 ພັນກີບຂຶ້ນໄປ, ບໍ່ນັບ ການເຊັນຢັ້ງຢືນການຊື້-ຂາຍຊັບສິນຕ່າງໆ, ຄະດີໄກ່ເກ່ຍຄອບຄົວ ຜິດ ຖຽງກັນ, ຄະດີລັກເລັກຄະ ໂມຍນ້ອຍ ແລະ ອື່ນໆ, ທາງບ້ານ ຈະຕ້ອງໄດ້ປັບໃໝຕົກເປັນເງິນ ນັບແສນຂຶ້ນໄປ, ໂດຍລວມ ແລ້ວ ຕໍ່ບັນຫາທັງໝົດທີ່ກ່າວມາຂ້າງ ເທິງນັ້ນ, ຫາກເຈົ້າໜ້າທີ່ກ່ຽວ ຂ້ອງທຸກຄົນຍຶດໝັ້ນໃນຈັນຍາ ບັນຂອງຕົນ ແລະ ເຫັນ ແກ່ປະເທດຊາດເປັນຫລັກ, ເງິນທີ່ ເກັບໄດ້ຈາກຜູ້ລະເມີດ ຫລື ຜູ້ເຂົ້າ ເຊັນໜັງສືຢູ່ຕາມບ້ານຕ່າງໆ ເຖິງຈະເປັນຈຳນວນ ໜ້ອຍ,ແຕ່ຖ້າເງິນເຫລົ່ານີ້ບໍ່ເຂົ້າຖົງບຸກຄົນພາກັນນຳເອົາເຂົ້າຄັງລວມຂອງລັດຈະເພີ່ມລາຍຮັບໃຫ້ແກ່ງົບປະມານເປັນຈຳນວນ ຫລວງ ຫລາຍ.