laophatthananewspaper: ຫາລືຮ່າງກົດໝາຍ ວ່າດ້ວຍການຕ້ານ ແລະ ສະກັດກັ້ນການໃຊ້ຄວາມຮຸ່ນແຮງຕໍ່ແມ່ຍິງ-ເດັກນ້ອຍ

ໃນວັນທີ 23 ຕຸລານີ້, ຢູ່ນະຄອນຫລວງວຽງຈັນ, ສະພາແຫ່ງຊາດຮ່ວມກັບກະຊວງຍຸຕິທຳ, ຄະນະກຳມາທິການເພື່ອແມ່ ແລະ ເດັກແຫ່ງຊາດ ແລະ ພາກ ສ່ວນກ່ຽວຂ້ອງ, ໄດ້ປຶກສາຫາລື ແລະ ແລກປ່ຽນບົດຮຽນກ່ຽວກັບຮ່າງກົດໝາຍວ່າດ້ວຍການຕ້ານການໃຊ້ຄວາມຮຸນແຮງຕໍ່ແມ່ຍິງ ແລະ ເດັກນ້ອຍໃນ ສປປ ລາວ ພາຍໃຕ້ການເປັນປະທານຂອງທ່ານ ດຣ. ໄຊສົມພອນ ພົມ ວິຫານ ຮອງປະທານສະພາແຫ່ງຊາດລາວ ແລະ ທ່ານນາງ ມາຕາ ຊັນໂທສ໌ ໄພສ໌ ຜູ້ຕາງໜ້າພິເສດຂອງເລຂາທິການໃຫຍ່ອົງການສະຫະປະຊາຊາດ ທີ່ເຮັດວຽກກ່ຽວກັບວຽກງານການຕ້ານການໃຊ້ຄວາມຮຸນແຮງຕໍ່ເດັກ, ມີທ່ານນາງ ຫົງເວີຍ ເກົາ ຜູ້ຕາງໜ້າອົງການອຸຍນີເຊັບປະຈຳລາວ ແລະ ບັນດາຄະ ນະກຳມາທິການກົດໝາຍເຂົ້າຮ່ວມ.

ທ່ານຮອງປະທານສະພາແຫ່ງຊາດ ກ່າວຕໍ່ກອງປະຊຸມວ່າ: ປັດຈຸບັນ ສປປ ລາວ ກຳລັງຮ່າງກົດໝາຍວ່າ ດ້ວຍການຕ້ານການໃຊ້ຄວາມຮຸນແຮງຕໍ່ແມ່ຍິງ ແລະ ເດັກນ້ອຍ, ເປັນກົດໝາຍທີ່ລະບຸສະເພາະກ່ຽວກັບການຕ້ານການໃຊ້ຄວາມຮຸນແຮງຕໍ່

ແມ່ຍິງ ແລະ ເດັກນ້ອຍ ເຊິ່ງມັນສອດຄ່ອງກັບແຜນດຳເນີນງານແຫ່ງຊາດກ່ຽວກັບການປ້ອງກັນ ແລະ ແກ້ໄຂຄວາມຮຸນແຮງຕໍ່ແມ່ຍິງ ແລະ ເດັກນ້ອຍ ທັງຈະຊ່ວຍໃຫ້ວຽກງານດ້ານນິຕິກຳ ເພື່ອປົກປ້ອງແມ່ຍິງ ແລະ ເດັກນ້ອຍ ຈາກຄວາມຮຸນແຮງໃຫ້ມີຄວາມເຂັ້ມແຂງກວ່າເກົ່າ ເຊິ່ງສາມາດຕອບຂໍ້ສະເໜີແນະຂອງຄະນະກຳມະການສົນທິສັນຍາວ່າດ້ວຍສິດທິເດັກຂອງອົງການສະຫະປະຊາຊາດ ແລະ ຄະນະກຳມະ ການວ່າດ້ວຍການລຶບລ້າງທຸກຮູບແບບຂອງການຈຳແນກຕໍ່ແມ່ຍິງ. ໂດຍຮ່າງກົດໝາຍດັ່ງ ກ່າວປະກອບມີ 9 ພາກ 83 ມາດ ຕາ.

ທ່ານຮອງປະທານສະພາແຫ່ງຊາດກ່າວຕື່ມວ່າ: ຄວາມຮຸນແຮງຕໍ່ເດັກເມື່ອເກີດຂຶ້ນແລ້ວ ແມ່ນສ້າງຄວາມສູນເສຍຢ່າງຫລວງຫລາຍຕໍ່ຊຸມຊົນ, ສັງຄົມ ແລະ ປະເທດຊາດ ຕໍ່ບັນຫາດັ່ງກ່າວລັດຖະບານລາວ, ໄດ້ເອົາໃຈໃສ່ໃນການແກ້ໄຂຄວາມຮຸນແຮງຕໍ່ເດັກໃນທຸກລະດັບ ເພື່ອຮັບປະກັນໃນການປົກປ້ອງເດັກຈາກຄວາມຮຸນແຮງ ຊຶ່ງສະແດງອອກໃນການເຂົ້າຮ່ວມກັບບັນ ດາປະເທດໃນພາກພື້ນ ແລະ ສາ ກົນ ໂດຍສະເພາະແມ່ນການໃຫ້ສັດຕະຍາບັນຕໍ່ສົນທິສັນຍາວ່າດ້ວຍສິດທິເດັກໃນປີ 1991, ຮັບ ຮອງເອົາຖະແຫລງການອາຊຽນ ກ່ຽວກັບການລຶບລ້າງຄວາມຮຸນແຮງຕໍ່ແມ່ຍິງ ແລະ ຄວາມຮຸນແຮງຕໍ່ເດັກໃນປີ 2013 ແລະ ຖະແຫລງການນິວເດັນລີໃນຂອບການຮ່ວມມືລະຫວ່າງບັນດາປະເທດກຳລັງພັດທະນາກ່ຽວກັບສິດທິເດັກໃນປີ 2013.

ປັດຈຸບັນ, ສປປ ລາວ ມີຄວາມຄືບໜ້າຫລາຍດ້ານໃນການແກ້ໄຂບັນຫາຄວາມຮຸນ ແຮງຕໍ່ເດັກເຊິ່ງລັດຖະບານໄດ້ຮັບ ຮອງເອົາແຜນດຳເນີນງານແຫ່ງຊາດເພື່ອປ້ອງກັນ ແລະ ລຶບ ລ້າງຄວາມຮຸນແຮງຕໍ່ແມ່ຍິງ ແລະ ຄວາມຮຸນແຮງຕໍ່ເດັກ 2014-2020 ເພື່ອກ້າວໄປເຖິງ ການລຶບລ້າງຄວາມຮຸນແຮງຕໍ່ແມ່ຍິງ ແລະ ຄວາມຮຸນແຮງຕໍ່ເດັກແບບຍືນຍົງ, ແຜນດຳເນີນງານໄດ້ກຳນົດຂອບການປະ ສານງານກັບທຸກຂະແໜງການ ເພື່ອປ້ອງກັນ ແລະ ແກ້ໄຂທຸກຮູບແບບຂອງຄວາມຮຸນແຮງ. ໄປຄຽງຄູ່ກັນນັ້ນລັດຖະບານລາວກຳລັງດຳເນີນການສຶກສາຄົ້ນຄວ້າກ່ຽວກັບຂະໜາດ ແລະ ລັກສະນະຂອງຄວາມຮຸນແຮງທີ່ສົ່ງຜົນກະທົບຕໍ່ແມ່ຍິງ ແລະ ເດັກນ້ອຍ.