ໃນວັນທີ 22 ຕຸລານີ້, ໂຮງໝໍມະໂຫສົດ, ໄດ້ເລີ່ມໃຫ້ບໍລິການຢາຄຸມກຳເນີດແບບໃໝ່
(ຊະນິດ ຝັງ) ແລະ ມີການແນະນຳ ແລະ ໃຫ້ຄຳປຶກສາແກ່ແມ່ຍິງທີ່ຕ້ອງ ການໃຊ້ຢາຝັງຄຸມກຳເນີດດັ່ງ
ກ່າວ.
ທ່ານນາງ ພິມມະສອນ ສິລິມະໂນທຳ ຮອງຫົວໜ້າພະແນກ
ອອກລູກ ແມ່ ແລະ ເດັກ ໂຮງໝໍມະໂຫສົດ ໃຫ້ຮູ້ວ່າ:ຢາຝັງຄຸມກຳເນີດຈະມີຄວາມແຕກຕ່າງຈາກວິທີການຄຸມກຳເນີດທົ່ວໄປ
ເນື່ອງຈາກມີຄວາມສະດວກ, ມີປະສິດທິຜົນສູງ ແລະ ສາມາດໃຊ້ໄດ້ດົນເຖິງ 3 ປີ,
ບໍ່ຈຳເປັນຕ້ອງທຽວໄປຫາແພດໝໍຫລາຍເທື່ອ, ສາມາດມີລູກໄດ້ທັນທີເມື່ອເອົາຢາຄຸມກຳເນີດອອກ
ແລະ ສາ ມາດເຮັດວຽກໜັກໄດ້ເປັນປົກກະຕິ, ເປັນວິທີທີ່ເໝາະສົມສຳລັບແມ່ຍິງທີ່ຍັງບໍ່ພ້ອມມີລູກ
ແລະ ຕ້ອງການຢາກມີລູກຫ່າງ, ສາ ມາດປ້ອງກັນການຖືພາຢ່າງມີປະສິດທິຜົນ 99%
ແຕ່ບໍ່ສາມາດປ້ອງກັນພະຍາດຕິດຕໍ່ທາງເພດສຳພັນ
ແລະ ພະຍາດເອສໄດ້. ສຳລັບຜົນຂ້າງຄຽງໃນການໃຊ້ຢາດັ່ງກ່າວແມ່ນປະຈຳເດືອນຈະມີການປ່ຽນແປງ,
ບາງຄົນອາດ ມີອາການເຈັບຫົວ, ເປັນສິວ, ວິນຫົວ, ປວກຮາກ, ອາການສົນ ໃນໄລຍະນຳໃຊ້ເບື້ອງຕົ້ນ
ແລະ ແມ່ຍິງສາມາດໃຊ້ຢາຝັງຄຸມກຳເນີດໄດ້ທຸກເວລາທີ່ຕ້ອງການຖ້າຫາກມີຄວາມແນ່ນອນວ່າບໍ່ໄດ້ຖືພາ,
ແມ່ຍິງທີ່ເກີດລູກໄດ້ 6 ອາທິດຂຶ້ນໄປສາມາດຝັງຢາຄຸມກຳເນີດໄດ້ເມື່ອຄົບກຳນົດ
3 ປີ ຕ້ອງໄດ້ເອົາຢາຝັງຄຸມກຳເນີດ ອອກ ແລະ ສາມາດໃສ່ຢາໃໝ່ໄດ້ທັນທີ, ແຕ່ຢາຝັງຄຸມກຳເນີດນີ້ບໍ່ຄວນໃຊ້ກັບແມ່ຍິງທີ່ຖືພາ,
ແມ່ຍິງທີ່ຫາກໍ່ເກີດລູກໄດ້ 6 ເດືອນ ແລະ ລ້ຽງລູກດ້ວຍນົມແມ່, ແມ່ ຍິງເປັນພະຍາດຕັບຮ້າຍແຮງ
ແລະ ເປັນພະຍາດເສັ້ນເລືອດອຸດຕັນ.
ໃນວັນດຽວກັນ, ຢູ່ໂຮງໝໍເສດຖະທິລາດ, ນະຄອນຫລວງວຽງຈັນ
ກໍໄດ້ເປີດໃຫ້ຄຳປຶກສາ ແລະ ບໍລິການຢາຝັງຄຸມກຳເນີດເຊັ່ນດຽວກັນ.
No comments:
Post a Comment