ລັດວິສາຫະກິດນ້ຳປະປານະຄອນຫລວງໄດ້ປັບຂຶ້ນລາຄາຕື່ມ
550 ກີບຄື ຈາກ 1.350 ກີບ ມາເປັນ 1900 ກີບຕໍ່ແມັດກ້ອນ,ຫລັງຈາກເຫັນວ່າລາຄາທີ່ນຳໃຊ້ໃນໄລຍະ
5 ປີຜ່ານມານັ້ນແມ່ນ ຍັງຢູ່ລະດັບຕ່ຳກວ່າຕົ້ນທຶນການຜະລິດ, ເຊິ່ງບໍ່ສອດ ຄ່ອງກັບກົນໄກເສດຖະກິດຕະຫລາດ
ແລະ ເປັນພາລະໜັກໜ່ວງໃຫ້ລັດຖະບານຕ້ອງໄດ້ຖົມຂຸມດ້ານທຶນຮອນເປັນຈຳນວນ ບໍ່ໜ້ອຍໃນແຕ່ລະປີ.
ທ່ານອຳນວຍການລັດວິສາຫະກິດນ້ຳປະປານະຄອນຫລວງວຽງຈັນ
ຄຳເຜີຍ ວົງສາຄຳຜຸຍ ໃຫ້ຮູ້ສາເຫດຂອງການປັບລາຄານ້ຳປະປາເທື່ອນີ້ວ່າ: ປັດຈຸບັນ,
ສະພາບການເໜັງຕິງທາງເສດ ຖະກິດແມ່ນສູງຂຶ້ນເຮັດໃຫ້ວັດຖຸດິບ, ອຸປະກອນ, ກະແສໄຟຟ້າ,
ກົນຈັກການຜະລິດ ແລະ ຄ່າແຮງງານມີມູນຄ່າເພີ່ມຂຶ້ນຕາມສະພາບກົນໄກເສດຖະກິດຕະຫລາດ
ຈຶ່ງເຮັດໃຫ້ລາຄານ້ຳປະປາທີ່ເຄີຍປະຕິບັດມາແຕ່ປີ 2009 ໃນລາຄາ 1.350 ກີບຕໍ່ແມັດກ້ອນບໍ່ສາມາດດຸ່ນດ່ຽງຕົ້ນທຶນຕົວຈິງໄດ້,
ເນື່ອງຈາກລາ ຄາຕົ້ນທຶນການຜະລິດນ້ຳປະປາຕົວຈິງໃນປັດຈຸບັນແມ່ນຕົກຢູ່ປະມານ
1.900 ກີບຕໍ່ແມັດກ້ອນ, ໝາຍວ່າລາຄາທີ່ປັບໃໝ່ນີ້ກໍແມ່ນເກັບຕາມລາຄາຕົ້ນທຶນການຜະລິດເທົ່ານັ້ນ
ແລະ ກໍໄດ້ເລີ່ມຈັດຕັ້ງປະຕິບັດຫົວໜ່ວຍຄາລາໃໝ່ແຕ່ເດືອນກັນຍາ 2014 ເປັນຕົ້ນມາ,
ທັງນີ້ກໍເພື່ອໃຫ້ແທດເໝາະກັບສະພາບຕົວຈິງຂອງເສດຖະກິດໃນປັດຈຸບັນ, ເຮັດໃຫ້ລັດວິສາຫະກິດນ້ຳປະປາມີຄວາມສາມາດກຸ້ມຕົນເອງດ້ານການເງິນໃນການຊຳລະຄ່າໃຊ້ຈ່າຍຕ່າງໆ
ແລະ ສິ່ງສຳຄັນແມ່ນຫລີກເວັ້ນການຖົມຂຸມຂອງລັດ ຖະບານ ແລະ ເຊື່ອໝັ້ນວ່າ ການປັບຂຶ້ນລາຄາຄືດັ່ງກ່າວ,
ຈະບໍ່ກະທົບຕໍ່ສັງຄົມປານໃດ ເພາະວ່າຕາມການຄິດໄລ່ຂອງ
ທະ ນາຄານພັດທະນາອາຊີ (ADB) ຄ່ານ້ຳປະປາກວມປະ ມານ 4% ຂອງລາຍຈ່າຍໃນຄົວເຮືອນ
ຕົວຢ່າງ: ໃຊ້ນ້ຳປະມານ 30 ແມັດກ້ອນຕໍ່ເດືອນຕໍ່ຄົວເຮືອນຕາມລາຄາເກົ່າຈະຕົກຢູ່
ປະມານ 31 ພັນກີບ, ແຕ່ຖ້າຄິດໄລ່ຕາມລາຄາໃໝ່ກໍຈະຕົກຢູ່ປະມານ 35 ພັນກີບຕໍ່ເດືອນຕໍ່ຄົວເຮືອນ.
ທ່ານອຳນວຍການລັດວິສາຫະກິດນ້ຳປະປາ ກ່າວວ່າ:
ຕາມແຜນພັດທະນາຂອງລັດວິສາຫະກິດນ້ຳປະປານະຄອນຫລວງວຽງຈັນໃນປີ 2015 ນີ້ ຈະໃຫ້ປະຊາຊົນໃນ
7 ເມືອງຂອງນະ ຄອນຫລວງມີນ້ຳປະປາຊົມໃຊ້ກວມປະມານ 80-85% ແລະ ໃຫ້ກວມປະມານ
90-95% ໃນ 2020 ຄຽງຄູ່ກັນນີ້, ກໍຂໍຮຽກຮ້ອງໃຫ້ສັງຄົມຈົ່ງໃຊ້ນ້ຳຢ່າງປະຢັດ ແລະ
ໃຫ້ເກີດປະໂຫຍດ ສູງສຸດເພື່ອຊ່ວຍຫລຸດຜ່ອນລາຍຈ່າຍ ແລະ ປະກອບສ່ວນປົກປັກຮັກສາແຫລ່ງນ້ຳ
ແລະ ທຳມະຊາດໃຫ້ຍືນຍົງ.
No comments:
Post a Comment