ໃນເວລາປະມານທ່ຽງຄືນໂມງຂອງວັນທີ 20 ຕຸລາຜ່ານມານີ້,
ເຈົ້າໜ້າທີ່ທະຫານປະຈຳຢູ່ບ້ານຫ້ວຍນ້ຳເຢັນ ເມືອງນາຊາຍທອງ ນະຄອນຫລວງວຽງຈັນ
ໄດ້ນຳກຳລັງເຂົ້າມ້າງຂະບວນການລັກລອບຕັດໄມ້ຫວງຫ້າມ (ໄມ້ດູ) ຢູ່ປ່າສະຫງວນແຫ່ງຊາດຫ້ວຍນ້ຳເຢັນ
ແລະ ສາມາດຈັບຜູ້ຕ້ອງຫາໄດ້ຄື ທ້າວ ຕຸ້ຍ ພານໄທ ອາຍຸ 43 ປີ, ທ້າວ ອຳຄາ ວິລະວົງສາ
ຢູ່ບ້ານຫ້ວຍນ້ຳເຢັນ, ພ້ອມຂອງກາງໄມ້ດູ່ 24 ທ່ອນ, ມີບໍລິມາດຫລາຍກວ່າ 1,29 ແມັດກ້ອນຢູ່ເທິງລົດຕ໋ອກໆສາມຄັນ,
ເຈົ້າໜ້າທີ່ຈຶ່ງໄດ້ຍຶດໄວ້ເປັນຫລັກຖານເພື່ອດຳເນີນຄະດີຕາມລະບຽບກົດໝາຍ,
ຂະນະທີ່ທ້າວ ປາ ວໍລະວົງສາ ອາຍຸ 55 ປີຢູ່ບ້ານຫ້ວຍນ້ຳເຢັນ (ເຊິ່ງເປັນພໍ່ຂອງທ້າວອຳຄາ)
ແລະ ເປັນ ຫົວໂປ່ໂຕການຂອງຂະບວນ ການລັກລອບຕັດໄມ້ໃນຄັ້ງນີ້ ພວມຫລົບໜີການຈັບກຸ່ມຂອງເຈົ້າໜ້າທີ່ຢູ່.
ຜ່ານການສຶບສວນ- ສອບສວນຂອງເຈົ້າໜ້າທີ່ທັງສອງຄົນຮັບສາລະພາບວ່າ: ໃນວັນທີ
16 ຕຸລາ 2014
ໄດ້ພ້ອມກັບໝູ່ຮ່ວມຂະບວນການທັງໝົດ 6 ຄົນ ໄດ້ລັກລອບເຂົ້າໄປຕັດໄມ້ໃນປ່າເລິກເຂດຂົວ
3 ບ້ານສີສະຫວາດ ເມືອງນາຊາຍທອງ ເພື່ອຈະເອົາມາຂາຍໃຫ້ລູກຄ້າທີ່ສັ່ງຊື້ ແລະ
ຕົກມາຮອດວັນທີ 20 ຕຸລາ 2014 ຈຶ່ງໄດ້ນຳລົດຕ໋ອກໆເຂົ້າໄປແກ່ເອົາໄມ້ດັ່ງກ່າວ,
ແຕ່ຈຶ່ງຖືກເຈົ້າໜ້າທີ່ຈັບຕົວໄດ້ເສຍກ່ອນ.
ເຈົ້າໜ້າທີ່ ໃຫ້ຮູ້ວ່າ: ປັດຈຸບັນ,ແມ່ນໄດ້ມີການສຶກສາອົບຮົມ
ແລະ ປັບໃໝພວກກ່ຽວຕາມລະ ບຽບກົດໝາຍເພື່ອບໍ່ໃຫ້ກັບມາກະທຳຜິດອີກ ແລະ ໃຫ້ກັບຄືນສູ່ຄອບຄົວ,
ຍ້ອນເປັນການກະທຳຜິດຄັ້ງທຳອິດ, ສ່ວນໄມ້ຂອງກາງທັງໝົດແມ່ນຮີບໄວ້ເປັນຂອງລັດ.
No comments:
Post a Comment