ຮອງນາຍົກ ສົມສະຫວາດ ເລັ່ງສະຫວັດລົງຊີ້ນຳໂຄງການຄ້ຳປະກັນສະບຽງອາຫານຂອງກະຊວງກະສິກຳ

     ເຊົ້າວັນທີ 9 ຕຸລາຜ່ານມານີ້, ທ່ານຮອງນາຍົກລັດຖະມົນຕີ ສົມສະຫວາດ ເລັ່ງສະຫວັດ ຜູ້ຊີ້ ນຳວຽກງານເສດຖະກິດການ ຜະລິດ ແລະ ຈະລາຈອນ ໄດ້ເຄື່ອນໄຫວຢ້ຽມຢາມ ແລະ ຊີ້ນຳບັນດາໂຄງການຄ້ຳປະກັນສະບຽງອາຫານຂອງ ກະຊວງກະສິກຳ ແລະ ປ່າໄມ້, ເຊິ່ງມີທ່ານ ວິໄລວັນ ພົມເຂ ລັດຖະມົນຕີວ່າການ ກະຊວງດັ່ງກ່າວພ້ອມຄະນະນຳກະຊວງໃຫ້ການຕ້ອນຮັບຢ່າງ ອົບອຸ່ນ.

     ໂຄງການຄ້ຳປະກັນສະບຽງອາຫານເປັນໂຄງການບຸລິມະສິດທີ່ພັກ ແລະ ລັດຖະບານເຮົາໄດ້ ຮັບຮອງເອົາເພື່ອສາມາດຄ້ຳ ປະກັນສະບຽງອາຫານໄປຄຽງຄູ່ກັບການເພີ່ມຂຶ້ນຂອງພົນລະເມືອງຊຶ່ງຄາດວ່າ ຮອດປີ 2025 ຈະມີປະມານ 8,7 ລ້ານຄົນ ດັ່ງ ນັ້ນ, ລັດຖະບານຈຶ່ງໄດ້ກຳນົດເອົາ 10 ແຂວງເປົ້າໝາຍເພື່ອຜະລິດກະສິ ກຳເປັນຕົ້ນຕໍຄື: ຫລວງນ້ຳທາ, ບໍ່ແກ້ວ, ໄຊຍະບູ ລີ, ແຂວງວຽງຈັນ, ບໍລິຄຳໄຊ, ຄຳມ່ວນ, ສະຫວັນນະເຂດ, ສາລະວັນ, ຈຳປາສັກ ແລະ ນະຄອນຫລວງວຽງຈັນ.

     ໂອກາດນີ້, ທ່ານຮອງນາຍົກ ສົມສະຫວາດ ເລັ່ງສະຫວັດ ກໍໄດ້ສະແດງຄວາມຊົມເຊີຍຕໍ່ບັນດາຜົນງານທີ່ຂະແໜງການ ຍາດມາໄດ້ແຕ່ຄຽງຄູ່ກັນນັ້ນ, ກໍຕ້ອງໄດ້ເອົາໃຈໃສ່ຕື່ມບາງບັນຫາໃນການຈັດຕັ້ງປະຕິບັດໂຄງການຄ້ຳປະກັນສະບຽງອາຫານ, ໃນນັ້ນ ໃຫ້ເບິ່ງຄືນນະໂຍບາຍ 12 ຂໍ້ທີ່ກຳນົດໄວ້ໃນໂຄງການດັ່ງກ່າວວ່າມີອັນໃດຕ້ອງເພີ່ມເຕີມ ຫລື ປັບປຸງຕື່ມເພື່ອໃຫ້ສອດ ຄ່ອງກັບການຈັດຕັ້ງປະຕິບັດ, ໂດຍສະເພາະໃນ 10 ແຂວງເປົ້າໝາຍກ່ຽວກັບລະບົບສະນອງນ້ຳຊົນລະປະທານ, ການປັບປຸງ ດິນເພື່ອໃຫ້ແຕ່ລະພື້ນທີ່ສາມາດນຳໃຊ້ແນວພັນອັນດຽວກັນໄດ້ຢ່າງມີປະສິດທິພາບ, ພ້ອມທັງກຳນົດແນວພັນໃຫ້ສອດຄ່ອງກັ ບສະພາບອາກາດໃນແຕ່ລະເຂດ-ແຕ່ລະແຂວງ, ໃຫ້ເອົາໃຈໃສ່ຖອດຖອນບົດຮຽນຈາກປະເທດເພື່ອນມິດຍຸດທະສາດໂດຍສະ ເພາະຮູບແບບການຮ່ວມທຸລະກິດການຜະລິດກັບປະຊາຊົນ, ສົມທົບກັບກະຊວງກົມກອງທີ່ກ່ຽວຂ້ອງເພື່ອປົກປັກຮັກສາປ່າ ໃນເຂດຍອດນ້ຳໃຫ້ມີຄວາມຍືນຍົງໃນການສະໜອງນ້ຳໃຫ້ແກ່ການຜະລິດກະສິກຳ, ສຸມໃສ່ປັບປຸງບັນດາສູນກະສິກຳຕ່າງໆໃຫ້ ສາມາດຕອບສະໜອງໄດ້ທັງເຕັກນິກ, ວິຊາການ ແລະ ແນວພັນທີ່ເໝາະສົມ, ເອົາໃຈໃສ່ສ້າງກຸ່ມການຜະລິດໃຫ້ເຂັ້ມແຂງ ແລະ ສາມາດນຳໃຊ້ເຄື່ອງມືການຜະລິດໃຫ້ມີປະສິດທິພົນສູງ.