ເປີດຂະບວນການປູກລະດົມວັນສັກຢາກັນພະຍາດແຫ່ງຊາດເພື່ອກຳຈັດພະຍາດໝາກແດງໃຫຍ່ ແລະ ໝາກແດງນ້ອຍ ປີ 2014

       ວັນທີ 12 ພະຈິກນີ້ ກະຊວງສາທາລະນະສຸກ, ຄະນະກຳມາ ທິການເພື່ອແມ່ ແລະ ເດັກແ່ຫ່ງຊາດ, ຮ່ວມກັບອຳນາດການປົກຄອງນະຄອນຫຼວງວຽງຈັນເປີດຂະ ບວນການປຸກລະດົມວັນສັກຢາ ກັນພະຍາດແຫ່ງຊາດ (ວສຊ) ເພື່ອກຳຈັດພະຍາດ ໝາກແດງໃຫຍ່ ແລະ ໝາກແດງນ້ອຍຂຶ້ນ, ຢູ່ຫໍປະຊຸມແຫ່ງຊາດນະຄອນຫຼວງວຽງ ຈັນ, ໂດຍການໃຫ້ກຽດເຂົ້າຮ່ວມຂອງ ປະ ທານປະເທດ ຈູມມະລີ ໄຊຍະສອນ ເພື່ອປຸກລະດົມຂົນຂວາຍທຸກພາກສ່ວນຂອງສັງຄົມ, ທັງພາຍລັດ ແລະ ເອກະຊົນ ໃນນະຄອນຫຼວງວຽງຈັນ, ກໍຄືທົ່ວປະເທດໃຫ້ປະກອບສ່ວນຊຸກຍູ້ຂະບວນການສັກຢາກັນພະຍາດດັ່ງກ່າວ, ສຳລັບເດັກ ນ້ອຍອາຍຸແຕ່ 9 ເດືອນຫາລຸ່ມ 10 ປີໃຫ້ບັນລຸເປົ້າໝາຍ, ສົມທັບກັບການຢອດຢາກັນພະຍາດໂປລີໂອເພີ່ມ, ແຈກຢາຍຢາວິ ຕາມິນອາ ແລະ ຢາຂ້າແມ່ທ້ອງໃຫ້ແກ່ເດັກນ້ອຍອາຍຸລຸ່ມ 5 ປີ, ຊຶ່ງຈະຈັດຕັ້ງຂື້ນໃນລະຫວ່າງ ວັນທີ 17 -30 ພະຈິກນີ້.

        ເຈົ້າຄອງນະຄອນຫຼວງວຽງຈັນ ມີຄຳເຫັນໃນພິທີວ່າ: ຜ່ານມາລັດຖະບານກໍໄດ້ເອົາໃຈໃສ່ຊຸກຍູ້ວຽກງານສັກຢາກັນພະ ຍາດຢ່າງຈິງຈັງ ແລະ ສາມາດປະກາດເປັນປະເທດທີ່ປອດພະຍາດໂປລິໂອໄດ້ໃນປີ 2000, ສຳລັບນະຄອນຫຼວງວຽງຈັນກໍໄດ້ ປະກອບສ່ວນຢ່າງຕັ້ງໜ້າເຂົ້າໃນການມີສ່ວນຮ່ວມໃນການຫຼຸດຜ່ອນຄວາມເຈັບເປັນ, ການຕາຍຂອງແມ່ ແລະ ເດັກຊຶ່ງສະ ແດງອອກຈາກການສຳຫຼວດໃນປີ 2012 ອັດຕາການຕາຍຂອງເດັກອາຍຸລຸ່ມ 1 ປີຢູ່ນະຄອນຫຼວງວຽງຈັນໄດ້ຫຼຸດລົງເຫຼືອພຽງ 27 ສ່ວນພັນ, ເດັກອາຍຸ ລຸ່ມ 5 ປີ ເຫຼືອພຽງ 32 ສ່ວນພັນ, ແມ່ຕາຍ 45 ສ່ວນແສນຂອງເດັກເກີດ ມີຊີວິດເທົ່ານັ້ນ, ສຳລັບ ການສັກຢາກັນພະຍາດໝາກແດງຢູ່ນະຄອນຫຼວງວຽງຈັນໃນຮອບປົກກະຕິແມ່ນສາມາດບັນລຸໄດ້ເຖິງ 95 % ໃນປີ 2013 (ທົ່ວປະເທດບັບລຸໄດ້ 82%), ສຳລັບປີ 2014 ນີ້, ນະຄອນຫຼວງມີເປົ້າໝາຍ ຢອດຢາ ແລະ ສັກຢາກັນພະ ຍາດໃຫ້ເດັກອາຍຸ ລຸ່ມ 5 ປີ (ຢອດຢາໂປລິໂອ) ຈຳນວນ 117.487 ຄົນ, ຢອດຢາວິຕາມິນອາ ແລະ ກິນຢາຂ້າແມ່ທ້ອງບັນລຸ 90.375 ຄົນ, ເດັກນ້ອຍອາຍຸລຸ່ມ 9 ເດືອນ ຫາລຸ່ມ 10 ປີ ໄດ້ຮັບການສັກຢາກັນພະຍາດໝາກແດງຈຳນວນ 207.862 ຄົນ ແລະ ເພື່ອກຳ ຈັດພະຍາດໝາກແດງໃຫຍ່ ແລະ ໝາກແດງນ້ອຍຢູ່ນະຄອນຫຼວງວຽງຈັນ ແລະ ບັນດາແຂວງທົ່ວ ປະເທດໃຫ້ຫຼຸດໜ້ອຍ ຖອຍລົງ ແລະ ໝົດໄປໃນທີ່ສຸດ, ໃນລະຫວ່າງວັນທີ 17 - 30 ພະຈິກນີ້, ນະຄອນຫຼວງວຽງຈັນຈະຮ່ວມ ກັບກະຊວງສາທາ ລະນະສຸກຈັດກິດຈະກຳສັກຢາ ແລະ ຢອດຢາ ດັ່ງກ່າວຂຶ້ນຢູ່ຕາມໂຮງໝໍ, ສຸກສາລາ ແລະ ໜ່ວຍແພດເຄື່ອນທີ່, ດັ່ງນັ້ນຈຶ່ງ ຮຽກຮ້ອງໃຫ້ທຸກ ພາກສ່ວນທົ່ວສັງຄົມຈົ່ງເພີ່ມທະວີເອົາໃຈໃສ່ປຸກລະດົມໂຄສະນາຂະບວນການດັ່ງກ່າວນີ້ໃຫ້ ກວ້າງຂວາງ, ທົ່ວເຖິງ, ສຳຄັນ ແມ່ນການຊຸກຍູ້ຢ່າງແຂງແຮງ ຈາກອຳນາດການປົກຄອງທຸກຂັ້ນ, ອົງການຈັດຕັ້ງມະຫາຊົນ, ສື່ຕ່າງໆ, ລວມ ເຖິງພໍ່ແມ່ຜູ້ປົກຄອງຈົ່ງນຳລູກ, ຫຼານຂອງຕົນທີ່ຢູ່ໃນເກນອາຍຸ 10 ປີລົງມາໄປຮັບການສັກຢາ-ຢອດຢາກັນພະຍາດດັ່ງກ່າວໃຫ້ ບັນລຸໄດ້ 95% ຂຶ້ນໄປ.

  ລັດຖະມົນຕີກະຊວງສາທາລະນະສຸກມີຄຳເຫັນວ່າ: ສິ່ງສຳຄັນໃນການສັກຢາກັນພະຍາດແມນແນ່ໃສ່ກຸ່ມເປົ້າໝາຍ ແມ່ຍິງ ແລະ ເດັກນ້ອຍຊຶ່ງເປັນກຸ່ມຄົນທີ່ມີຄວາມສ່ຽງໃນການເຈັບເປັນ ແລະ ມີອັດຕາການຕາຍສູງກວ່າໝຸ່, ໂດຍສະເພາະຢູ່ເຂດ ຫ່າງໄກສອກຫຼີກ, ເຂດພູດອຍ, ເຂດເຂົ້າເຖິງຍາກຊີວິດການເປັນຢູ່ຂອງປະຊາຊົນຍັງຕິດພັນກັບທຳມະຊາດ, ການເຈັບເປັນ ຂອງຜູ້ເປັນແມ່ ແລະ ເດັກນ້ອຍໄດ້ສົ່ງຜົນກະທົບອັນໃຫຍ່ຫຼວງຕໍ່ເສດຖະກິດຄອບຄົວ ແລະ ການສຶກສາຂອງເດັກ, ການ ເຈັບເປັນຂອງສະມາຊິກຄອບຄົວແມ່ນເປັນທັງເຫດ ແລະ ຜົນຂອງຄວາມທຸກຍາກ, ຍ້ອນແນວນັ້ນ ລັດຖະບານເຮົາຈຶ່ງຖືເອົາ ຂະແໜງສາທາລະນະສຸກເປັນໜຶ່ງ ໃນ 4 ຂະແໜງການຫຼັກຂອງການພັດທະນາຊົນນະບົດຮອບດ້ານເພື່ອລຶບລ້າງຄວາມທຸກ ຍາກ ແລະ ສົ່ງເສີມຄວາມສາມາດຂອງປະຊາຊົນບັນດາເຜົ່າ.