laophatthananewspaper: ລາວຖອດຖອນບົດຮຽນການເຮັດທົດລອງວຽກງານ 3 ສ້າງສອງປີຜ່ານມາ

ກອງປະຊຸມສະຫຼຸບຖອດຖອນບົດຮຽນກ່ຽວກັບການເຮັດທົດລອງ 3 ສ້າງທົ່ວປະເທດ, ໃນວັນທີ 24-25 ພະຈິກນີ້, ຢູ່ສູນຝຶກ ອົບຮົມຫຼັກ 5 ( ICTC) ນະຄອນຫຼວງວຽງຈັນ, ໃຫ້ກຽດເຂົ້າຮ່ວມຂອງ ທ່ານ ຈູມມາລີ ໄຊຍະສອນ ເລຂາທິການໃຫຍ່ຄະນະບໍລິຫານສູນກາງພັກ, ປະ ທານປະເທດ ແຫ່ງ ສປປ ລາວ, ທ່ານ ບຸນຍັງວໍລະຈິດ ຜູ້ປະຈຳການຄະນະເລຂາທິ ການສູນກາງ ຫົວໜ້າຄະນະຊີ້ນຳວຽກງານ 3 ສ້າງຮອງປະທານປະເທດ ແລະ ມີຜູ້ແທນຕາງໜ້າຈາກພາກຂະແໜງ ການ, ທ້ອງຖິ່ນຕ່າງໆໃນທົ່ວປະເທດເຂົ້າຮ່ວມເປັນຈຳນວນຫຼາຍ.

ທ່ານ ບຸນຍັງ ວໍລະຈິດ ໄດ້ ກ່າວເປີດກອງປະຊຸມວ່າ: ເພື່ອສືບຕໍ່ຜັນຂະຫຍາຍມະຕິກອງປະຊຸມໃຫຍ່ ຄັ້ງທີ IX ຂອງພັກກໍຄືມະຕິ 03 ຂອງກົມການເມືອງສູນກາງພັກວ່າດ້ວຍການສ້າງ ແຂວງເປັນຫົວໜ່ວຍຍຸດທະສາດ, ສ້າງເມືອງເປັນຫົວໜ່ວຍເຂັ້ມແຂງຮອບດ້ານ, ສ້າງບ້ານເປັນຫົວໜ່ວຍພັດທະນາໃຫ້ເຂົ້າສູ່ລວງເລິກ ແລະ ເປັນບົດຮຽນໃຫ້ແກ່ການຜັນຂະຫຍາຍໃນ

ຂອບເຂດທົ່ວປະເທດດັ່ງນັ້ນ ພວກເຮົາຈະໄດ້ພ້ອມກັນສັງເກດຕີລາຄາຢ່າງພາວະວິໄສໃນການເຮັດທົດລອງວຽກງານດັ່ງກ່າວ ໃນ 2 ປີຜ່ານມາ, ໂດຍສະເພາະແມ່ນໃນ 51 ເມືອງ ແລະ 109 ບ້ານເປົ້າໝາຍທີ່ຖືກຄັດເລືອກເພື່ອຊອກໃຫ້ເຫັນດ້ານດີ ທີ່ຈະຕ້ອງໄດ້ສົ່ງເສີມ ແລະດ້ານອ່ອນ ເພື່ອເປັນບົດຮຽນທີ່ຈະຕ້ອງປັບ ປຸງແກ້ໄຂໃຫ້ມີປະສິດທິພາບສູງຂຶ້ນ.

ທ່ານ ຈັນສີ ໂພສີຄຳ ຄະນະເລຂາທິການສູນກາງພັກຫົວໜ້າ ຄະນະຈັດຕັ້ງສູນກາງພັກຮອງຫົວໜ້າຄະນະຊີ້ນຳເຮັດທົດລອງວຽກງານ 3 ສ້າງຕີລາຄາວ່າ: ໃນ 2 ປີ ຜ່ານມາແຕ່ລະຂະແໜງ ການ ແລະ ທ້ອງຖິ່ນຕ່າງໆໄດ້ເອົາໃຈໃສ່ເຜີຍແຜ່ ແລະ ຜັນຂະ ຫຍາຍມະຕິ 03 ຂອງກົມການເມືອງ, ກໍຄືບັນດາມະຕິກຳຕ່າງໆ ກ່ຽວກັບວຽກງານ 3 ສ້າງໄດ້ດີສົມຄວນ, ອັນໄດ້ເຮັດໃຫ້ບັນດາຊັ້ນຄົນມີຄວາມຮັບຮູ້ເຂົ້າໃຈ ແລະ ຕື່ນຕົວເປັນເຈົ້າການເຂົ້າຮ່ວມໃນຂະບວນການສ້າງບ້ານພັດທະນາຢ່າງເປັນຄະບວນຟົດຟື້ນ ແລະ ຕໍ່ເນື່ອງ, ເຮັດໃຫ້ລະ ບົບການເມືອງ ແລະ ການປົກ ຄອງຢູ່ຮາກຖານເປັນຕົ້ນແມ່ນຢູ່ບັນດາບ້ານ 3 ສ້າງສືບຕໍ່ໄດ້ຮັບການປັບປຸງໃຫ້ມີຄວາມໜັກແໜ້ນເຂັ້ມແຂງ, ສາມາດເວົ້າໄດ້ວ່າ ມະຕິ 03 ກ່ຽວກັບ 3 ສ້າງໄດ້ກາຍເປັນຄວາມຮັບຮູ້ເຂົ້າໃຈ, ໄດ້ຖືກຜັນຂະຫຍາຍເປັນຂະບວນ ການກະທຳຂອງສະມາຊິກພັກ- ພະນັກງານ ແລະ ປະຊາຊົນທັງຢູ່ຂັ້ນສູນກາງ ແລະ ທ້ອງຖິ່ນ ຮາກຖານ, ໂດຍສະເພາະແມ່ນ 51 ເມືອງ ແລະ 109 ບ້ານເປົ້າໝາຍ ແລະ ໄດ້ເຮັດໃຫ້ການຈັດຕັ້ງນຳ ພາ, ການບໍລິຫານຄຸ້ມຄອງຢູ່ທ້ອງຖິ່ນ ແລະ ຮາກຖານໄດ້ຮັບການຍົກລະດັບ, 3 ສ້າງໄດ້ກາຍເປັນປັດໄຈກະຕຸກຊຸກຍູ້ການພັດ ທະນາຊົນນະບົດ ໃຫ້ມີໃບໜ້າໃໝ່ ແລະ ມີໜໍ່ແໜງໃໝ່, ດ້ານການຜະລິດເປັນສິນຄ້າໄດ້ເກີດຂຶ້ນ ຫຼາຍ ແລະ ມີການຈັດຕັ້ງເປັນກຸ່ມຂຶ້ນຕິດພັນກັບການຊ່ວຍໜຸນ ຂອງນັກວິຊາການ, ສິນເຊື່ອ ການຕະຫຼາດ ແລະ ການຊ່ວຍເຫຼືອຈາກຂະແໜງການຕ່າງໆ ທັງພາກລັດ ແລະ ເອກະຊົນ, ໄດ້ເຮັດໃຫ້ການແກ້ໄຂຄວາມທຸກຍາກຂອງປະຊາຊົນກໍຄືການສ້າງເມືອງ ແລະ ບ້ານພັດທະນາມີຜົນສຳເລັດ ແລະ ອີງໃສ່ຜົນການປະເມີນຄວາມທຸກຍາກ ແລະ ການພັດທະນາລັດຖະບານປີ 2014 ເຫັນວ່າຢູ່ໃນ 51 ເມືອງທົດລອງ, ມີ 34 ເມືອງມີບາດ ກ້າວຫັນປ່ຽນດີຂຶ້ນ ແລະ ສາ ມາດກາຍເປັນຕົວເມືອງເຂັ້ມແຂງຮອບດ້ານ, ສ່ວນໃນ 109 ບ້ານເຮັດທົດລອງມີ 30.995 ຄອບຄົວ, ມີ 82 ບ້ານໄດ້ກາຍເປັນບ້ານພັດທະນາ, ມີຄອບຄົວພັດທະນາ25.967 ຄອບ ຄົວ ແລະ ບ້ານປອດຄະດີ 108 ບ້ານ. ນອກ ຈາກນີ້, ການຄຸດຄົ້ນທ່າແຮງຢູ່ພາຍໃນ ແລະ ການເກັບລາຍຮັບເຂົ້າງົບປະມານໄດ້ເພີ່ມຂຶ້ນທຸກເມືອງ ແລະ ບ້ານເປົ້າໝາຍທົດລອງພົ້ນເດັ່ນແມ່ນ: ການເກັບພາ ສີທີ່ດິນຢູ່ບ້ານສີສະຫວາດ, ເມືອງບໍລິຄັນເພີ່ມຂຶ້ນ 3 ເທົ່າຕົວ, ເມືອງແປກ, ຊຽງຂວາງເປັນເມືອງພົ້ນເດັ່ນການຂຸດຄົ້ນລາຍຮັບເຂົ້າງົບປະມານໃນສົກປີ 2012-2013ໄດ້ເພີ່ມຂຶ້ນ 3 ເທົ່າຕົວ, ເມືອງຫ້ວຍຊາຍ, ແຂວງບໍ່ແກ້ວ ແລະ ເມືອງທ່າແຂກ, ແຂວງຄຳມ່ວນ ແມ່ນສາມາດກຸ້ມຕົນເອງທາງດ້ານລາຍຈ່າຍບໍລິຫານປົກກະຕິ. ພິເສດຍັງມີການປະກອບສ່ວນຂອງປະຊາ ຊົນຮ່ວມກັບລັດໃນການກໍ່ສ້າງພື້ນຖານໂຄງລ່າງເຊັ່ນ: ປະ ຊາຊົນບ້ານຊອກ ແລະ ບ້ານຜັກຂະ, ເມືອງໄກສອນພົມວິຫານໄດ້ອອກທຶນຂອງຕົນເອງສ້າງທາງຊອຍ 13 ເສັ້ນມູນຄ່າ 790 ລ້ານກີບ ແລະ ບ່ອນອື່ນໆ, ອັນນີ້ຖືເປັນຕົວແບບທີ່ດີທີ່ລັດ ແລະ ປະ ຊາຊົນພ້ອມກັນເຮັດ ຊຶ່ງຕ້ອງໄດ້ສືບຕໍ່ຊຸກຍູ້ສົ່ງເສີມໃຫ້ກ້ວາງຂວາງ.

ດ້ານວຽກງານວັດທະນະທຳ-ສັງຄົມ: ຢູ່ບັນດາບ້ານເຮັດທົດລອງກໍໄດ້ມີການຫັນປ່ຽນ ຢ່າງຕັ້ງໜ້າໂດຍສະເພາະການແກ້ໄຂບັນດາບ້ານທີ່ບໍ່ມີໂຮງ ຮຽນ, ຂາດແຄນອຸປະກອນການຮຽນ-ການສອນ ແລະ ຂາດແຄນຄູສອນແມ່ນໄດ້ເຂົ້າເຖິງການສຶກສາເປັນປົກກະຕິ, ປັດຈຸບັນມີ 13 ແຂວງໄດ້ປະກາດຈົບຊັ້ນປະ ຖົມບຳລຸງ ແລະ ອີກ 3 ແຂວງແມ່ນກຽມປະກາດໃນໄວໆນີ້. ຕາ ໜ່າງສາທາລະນະສຸກຢູ່ບັນດາບ້ານທົດລອງໄດ້ສືບຕໍ່ເອົາໃຈໃສ່ປັບປຸງທາງດ້ານປະລິມານ ແລະ ຄຸນນະພາບ, ກອງທຶນເພື່ອສຸຂະ ພາບສຳລັບຜູ້ທຸກຍາກໄດ້ຮັບການສ້າງຕັ້ງຂຶ້ນ, ຊຶ່ງໄດ້ສ້າງເງື່ອນໄຂໃຫ້ປະຊາຊົນຜູ້ທຸກຍາກຂາດເຂີນສາມາດເຂົ້າເຖິງການບໍລິການສາທາລະນະສຸກຫຼາຍ ຂຶ້ນ, ບ້ານແບບຢ່າງສາທາລະ ນະສຸກຢູ່ໃນບ້ານທົດລອງໄດ້ເພີ່ມຂຶ້ນຈາກ 59 ມາເປັນ 104 ບ້ານ, ສ່ວນວຽກງານເຜີຍແຜ່ສຶກສາອົບຮົມຕິດພັນກັບການອານຸລັກ ແລະ ເສີມຂະຫຍາຍວັດທະນະທຳ, ມູນເຊື້ອຮີດຄອງປະເພນີອັນດີງາມຂອງຊາດໄດ້ຮັບການເສີມຂະຫຍາຍຢ່າງກວ້າງຂວາງ, ປັດ ຈຸບັນມີບ້ານວັດທະນາທຳ 98 ບ້ານຢູ່ໃນບ້ານທົດລອງ, ປະຊາຊົນມີຄວາມຕື່ນຕົວເປັນເຈົ້າການເຂົ້າຮ່ວມໃນການພັດທະນາບ້ານຂອງຕົນໃຫ້ກາຍເປັນຕົວແບບດ້ານວັດທະນາທຳ, ສາທາລະນະສຸກ ແລະ ຕົວແບບຄອບຄົວດີເດັ່ນຕ່າງໆຫຼາຍຂຶ້ນກວ່າເກົ່າ. ການປະຕິບັດເປົ້າໝາຍສະຫັດສະວັດດ້ານການພັດທະນາຢູ່ບ້ານເປົ້າໝາຍເຮັດທົດລອງມີຄວາມຄືບໜ້າ ແລະ ສາມາດບັນລຸຕາມຄາດໝາຍໄວ້.

ແຕ່ຄຽງຄູ່ກັບຜົນສຳເລັດກໍຍັງມີບາງຂໍ້ຄົງຄ້າງ ແລະ ຈຸດອ່ອນຈຳນວນໜຶ່ງທີ່ຕ້ອງໄດ້ປັບ ປຸງແກ້ໄຂເປັນຕົ້ນແມ່ນ: ຄວາມເຂົ້າໃຈກ່ຽວກັບ 3 ສ້າງ ແລະ ການເຮັດຕົວຈິງຍັງມີບັນຫາໃນບາງດ້ານ, ການຄົ້ນຄ້ວາເຊື່ອມຊືມມະຕິຕ່າງໆຂອງກົມການເມືອງ, ເລຂາທິການສູນກາງພັກບໍ່ທັນເລິກເຊິ່ງຈຶ່ງເຮັດໃຫ້ການເລືອກເອົາເມືອງ ແລະ ບ້ານເປົ້າໝາຍ 3 ສ້າງຢູ່ທ້ອງຖິ່ນຈຳນວນ ໜຶ່ງບໍ່ຖືກ ແລະ ມີການປ່ຽນໄປມາເຮັດໃຫ້ມີຄວາມຫຍຸ້ງ ຍາກໃນການຈັດຕັ້ງປະຕິບັດຕົວຈິງ, ການມອບສິດ ແລະ ມອບຄວາມຮັບຜິດຊອບຂອງກະຊວງເປົ້າໝາຍເຮັດທົດລອງໃຫ້ແກ່ທ້ອງຖິ່ນບໍ່ແທດກັບຕົວຈິງ, ທ້ອງຖິ່ນຈຳນວນໜຶ່ງຍັງບໍ່ທັນເສີມຂະ ຫຍາຍຄວາມເປັນເຈົ້າການ ແລະ ຄວາມກ້າຫານໃນຄວາມຮັບຜິດຊອບຂອງຕົນເອງ ແລະ ບາງບັນຫາອື່ນໆ ອີກຊຶ່ງຕໍ່ໄປນີ້ພວກເຮົາຈະຕ້ອງໄດ້ເອົາໃຈໃສ່ສືບຕໍ່ປັບປຸງແກ້ໄຂໃຫ້ມີຜົນສຳເລັດຫຼາຍຂຶ້ນ.