ໃນວັນທີ 24 ທັນວານີ້, ເຈົ້າໜ້າທີ່ ປກສ ເມືອງສີໂຄດຕະບອງ ນະຄອນ ຫລວງວຽງຈັນ ໄດ້ນຳຕົວທ້າວ ຈັນສະໝອນ ອາຍຸ 21 ປີ ຢູ່ບ້ານຕາດທອງ ເມືອງສີໂຄດຕະບອງ ນະຄອນຫລວງວຽງຈັນ ໄປເຮັດແຜນປະກອບຄຳສາລະພາບ ຢູ່ຈຸດເກີດເຫດ ຂໍ້ຫາຄາດຕະກຳທ້າວ ເດັ່ນ ອາຍຸ 13 ປີ ຢູ່ບ້ານຕາດທອງ (ຫລານຊາຍ) ເມື່ອວັນທີ
14 ທັນວາ.
ເຈົ້າໜ້າທີ່ ປກສ
ໃຫ້ຮູ້ວ່າ: ໃນວັນທີ 14 ທັນວາ 2014, ທ້າວ ຈັນສະໝອນ ໄດ້ນັ່ງຢູ່ໜ້າເຮືອນ ແລະ ພົບເຫັນທ້າວ ເດັ່ນ ເຊິ່ງເປັນຫລານຊາຍ (ລູກຂອງເອື້ອຍ) ຂັບລົດຈັກເວບ
100 ສີໝາກຄໍ້ກາຍມາ ຈຶ່ງເກີດຄວາມຄິດຢາກໄດ້ລົດຄັນດັ່ງກ່າວໄປຂາຍ ເພື່ອເອົາເງິນໄປຊື້ຢາບ້າມາເສບ. ຈາກນັ້ນ ກໍໄດ້ວາງແຜນຄາດຕະກຳ ໂດຍໄດ້ກະກຽມເອົາສາຍເຊືອກຍາວປະມານ 80 ຊັງຕີແມັດ ເຊື່ອງໄວ້ໃນຖົງໂສ້ງ. ຈາກນັ້ນ ກໍເອີ້ນທ້າວ ເດັ່ນ
ມາຫາແລ້ວບອກໃຫ້ໄປສົ່ງຢູ່ບ້ານໃໝ່ ເມືອງສີໂຄດຕະບອງ ໂດຍຈະໃຫ້ຄ່າຈ້າງ 10.000 ກີບ. ຈາກນັ້ນ ທ້າວ ເດັ່ນ ກໍຕົກລົງ ແລ້ວຂັບລົດຈັກໄປສົ່ງ. ພໍໄປຮອດເຂດວັດ
ໜອງແສງ ບ້ານຕາດທອງ, ທ້າວ ຈັນສະໝອນ ໄດ້ຂໍປ່ຽນມາຂັບລົດເອງຈົນຮອດບ້ານໃໝ່ ແລ້ວຍົວະທ້າວ ເດັ່ນ ໃຫ້ເຂົ້າໄປໃນປ່າ ເພື່ອຈະເສບຢາບ້າ. ໃນເວລາຢູ່ໃນປ່າ ຈຶ່ງຫາໂອກາດເອົາສາຍເຊືອກທີ່ກຽມມາຂອດເປັນບ້ວງ ແລ້ວເອົາມາຄ້ອງຄໍທ້າວ ເດັ່ນ ແລະ ດຶງຖົກຢ່າງແຮງຈົນທ້າວ ເດັ່ນ ລົ້ມລົງພື້ນ. ຈາກນັ້ນ ທ້າວ
ຈັນສະໝອນ ໄດ້ໃຊ້ຕີນເບື້ອງຂວາຢຽບກາງຫລັງທ້າວ ເດັ່ນ ພ້ອມທັງດຶງເຊືອກຈົນທ້າວ ເດັ່ນ ເສຍຊີວິດ. ຈາກນັ້ນ ທ້າວ ຈັນສະໝອນ ກໍເອົາລົດຈັກຄັນດັ່ງກ່າວໄປຂາຍ. ຫລັງຈາກນັ້ນ ກໍຖືກເຈົ້າໜ້າທີ່ນຳຈັບມາດຳເນີນຄະດີຕາມລະບຽບກົດໝາຍ.
No comments:
Post a Comment