laophatthananewspaper: ສາທາປະເມີນການຈັດຕັ້ງປະຕິບັດມາດຕະການປ້ອງກັນ ແລະ ສະກັດກັ້ນພະຍາດອີໂບລາ

ວັນທີ 16 ທັນວານີ້ ກະຊວງສາທາລະນະສຸກໄດ້ຈັດກອງປະຊຸມປຶກສາຫາລື ແລະ ປະເມີນການຈັດຕັ້ງປະຕິບັດມາດຕະ ການປ້ອງກັນແລະສະກັດກັ້ນພະຍາດອີໂບລາຂຶ້ນຢູ່ນະຄອນຫຼວງວຽງຈັນ, ໂດຍການເປັນປະທານ ຂອງທ່ານ ດຣ ບຸນຫຼາຍ ພົມມະສັກ ຫົວໜ້າກົມຄວບຄຸມພະຍາດ ຕິດຕໍ່ກະຊວງສາທາລະນະສຸກ, ມີຜູ້ຕ່າງໜ້າຈາກກະຊວງ, ອົງການຈັດຕັ້ງສາກົນ ແລະ ພາກສ່ວນກ່ຽວຂ້ອງອື່ນໆເຂົ້າຮ່ວມນຳອີກ.

ກອງປະຊຸມຕີລາຄາວ່າ: ສະພາບການລະບາດຂອງພະຍາດອີໂບລາຢູ່ບັນດາປະເທດອາຟຣິກາໃຕ້ນັບມື້ຍິ່ງຮ້າຍແຮງຂຶ້ນ, ຊຶ່ງມາຮອດປັດຈຸບັນມີຈຳນວນຜູ້ຕິດເຊື້ອສູງເຖິງ 17 ພັນກວ່າຄົນ, ໃນນີ້ເສຍຊີວິດແລ້ວ 6 ພັນກວ່າຄົນ ແລະ ປະເທດເຮົາກໍມີຄວາມສ່ຽງຕໍ່ພະຍາດດັ່ງກ່າວຈາກການເຂົ້າອອກຂອງຜູ້ໂດນສານທີ່ເດີນທາງມາຈາດປະເທດທີ່ມີການລະບາດ, ຜ່ານມາພວກເຮົາກໍໄດ້ຈັດຕັ້ງໜ່ວຍງານເພື່ອປ້ອງກັນ ແລະ ສະກັດກັ້ນຢູ່ຕາມດ່ານຊາຍແດນຕ່າງໆໃນທົ່ວປະເທດເພື່ອຕິດຕາມເຝົ້າລະວັງບໍ່ໃຫ້ມີການແຜ່ລະ ບາດຂອງພະຍາດດັ່ງກ່າວໃນປະເທດເຮົາ, ໂດຍອີງການຄຳສ່ັງແນະນຳຂອງທ່ານ ນາຍຍົກລັດຖະ

ມົນຕີທີ່ໄດ້ເນັ້ນ ໃຫ້ກະຊວງສາທາ ລະນະສຸກເປັນຈຸດປະສານງານໃນການສະກັດກັ້ນພະຍາດອີໂບລາ, ໂດຍເອົາໃຈໃສ່ຕິດຕາມການລະບາດຂອງພະຍາດດັ່ງກ່າວໃນທົ່ວໂລກຢ່າງໃກ້ຊິດ, ປະສານສົມທົບກັບອົງການຈັດຕັ້ງສາກົນ ແລະ ບັນດາປະເທດອາຊຽນໃນການແລກ ປ່ຽນຂໍ້ມູນຂ່າວສານ ແລະ ມາດຕະການກັນພະຍາດຕາມລະບຽບສາທາລະນະສຸກສາກົນເຜີຍແຜ່ຄວາມຮູ້ ແລະ ວິທີປ້ອງກັນຕົນເອງໃຫ້ປະຊາຊົນໄດ້ກວ້າງຂວາງ ແລະ ທົ່ວເຖິງ, ເພີ່ມທະວີການເປົ້າລະວັງໃນທົ່ວປະເທດ, ຮັບປະກັນໃຫ້ມີແພດປະຈຳຢູ່ດ່ານສາກົນຕ່າງໆ, ໂດຍສະເພາະໃນສະໜາມບິນສາກົນວັດໄຕ, ຫຼວງພະບາງ, ສະຫວັນນະເຂດ, ຈຳປາສັກ ແລະ ຂົວມິດຕະພາບ 1,2,3,4, ເພື່ອຕິດຕາມ ແລະ ກວດກາທຸກໆຜູ້ໂດຍສານທີ່ເດີນທາງມາຈາກປະເທດທີ່ມີການລະບາດຂອງພະຍາດອີໂບລາ.

ທ່ານປະທານກອງປະຊຸມໃຫ້ຮູ້ວ່າ: ຜ່ານການເຝົ້າລະວັງມາຮອດປັດຈຸບັນແມ່ນຍັງບໍ່ພົບກໍລະນີຜູ້ຕິດເຊື້ອແຕ່ຢ່າງໃດ,ແຕ່ເພື່ອເຮັດໃຫ້ວຽກງານປ້ອງ ແລະ ສະກັດກັ້ນພະຍາດດັ່ງກ່າວມີປະ ສິດຕິພາບດີຂຶ້ນ, ພວກເຮົາຈະໄດ້ ຮ່ວມກັນປຶກສາຫາລື ແລະ ປະເມີນຄືນການຈັດຕັ້ງປະຕິບັດມາດຕະການປ້ອງກັນ ແລະ ສະ ກັດກັ້ນພະຍາດດັ່ງກ່າວໃນໄລຍະຜ່ານມາ, ເພື່ອຈະໄດ້ແກ້ໄຂຂໍ້ບົກພ່ອງຕ່າງໆເຮັດໃຫ້ການປ້ອງກັນ ແລະ ສະກັດກັ້ນມີປະສິດທິ ພາບຈົນກ່າວການລະບາດຂອງພະຍາດັ່ງກ່າວຫຼຸດໜ້ອຍລົງ ແລະ ດັບສູນ.