ວຽກບ້ານ 18 ຂໍ້ຂອງ ຍທຂ ຕ້ອງໄດ້ແກ້ໄຂໃຫ້ເປັນຮູບປະທຳ

      ກອງປະຊຸມວຽກງານໂຍທາ ແລະ ຂົນສົ່ງ (ຍທຂ) ທົ່ວປະເທດປະຈຳປີ 2014 ໄດ້ສຳເລັດລົງເມື່ອບໍ່ດົນມານີ້, ເຊິ່ງລັດຖະມົນຕີວ່າການກະຊວງດັ່ງກ່າວໄດ້ຊີ້ໃຫ້ເຫັນວ່າມີ 14 ບັນຫາທີ່ຈະຕ້ອງໄດ້ຮີບຮ້ອນແກ້ໄຂໃຫ້ເປັນຮູບປະທຳ, ຂະ ນະທີ່ທ່ານຮອງນາຍົກລັດຖະມົນຕີ ສົມສະຫວາດ ເລັ່ງສະຫວັດ ທີ່ເຂົ້າຮ່ວມ ແລະ ໂອ້ລົມຕໍ່ກອງປະຊຸມດັ່ງກ່າວກໍໄດ້ເພີ່ມ ຕື່ມອີກ 4 ບັນຫາໃຫຍ່ຂອງຂະແໜງ ຍທຂ ຫາວິທີແກ້ໄຂ.

      ທ່ານ ບຸນຈັນ ສີນທະວົງ ລັດຖະມົນຕີວ່າການກະຊວງໂຍທາທິການ ແລະ ຂົນສົ່ງ ໃຫ້ຮູ້ວ່າ: 14 ບັນຫາທີ່ຈະສຸມໃສ່ ແກ້ປະກອບມີ: ການປະຕິບັດວິໄນແຜນການ ແລະ ຈັດລຽງບູລິມະສິດໂຄງການລົງທຶນແຕ່ລະສົກປີ, ການປະຕິບັດຕາມ ມາດຖານເຕັກນິກການກໍ່ສ້າງ ແລະ ສ້ອມແປງຂົວທາງ, ການສ້າງແຫລ່ງລາຍຮັບເພີ່ມ ແລະ ການຈັດສັນງົບປະມານກອງ ທຶນບູລະນະຮັກສາທາງຫລວງ, ການກຳນົດລາຄາຫົວໜ່ວຍກໍ່ສ້າງຂົວທາງ, ເຄຫາສະຖານ ແລະ ທາງນ້ຳ, ການຄຸ້ມຄອງຜັງ ເມືອງ ແລະ ການປຸກສ້າງ, ການຈັດຕັ້ງປະຕະບັດບູລະນະທາງຫລວງແຫ່ງຊາດ 4 ເຂດ, ການກວດກາ ແລະ ຄຸ້ມຄອງລົດ ບັນ ທຸກນ້ຳໜັກເກີນ, ການຄຸ້ມຄອງເຂດສະຫງວນທາງຫລວງ,ການສ້າງຕັ້ງເຈົ້າໜ້າທີ່ ຍທຂ, ການຄຸ້ມຄອງຂົນສົ່ງໂດຍສານ,

ການຄຸ້ມຄອງພາຫະນະ, ການປັບປຸງວິສາຫະກິດຂະແໜງ ຍທຂ, ການພັດທະນາບຸກຂະລະກອນ ແລະ ຍົກລະດັບສະຖາ ບັນຄົ້ນຄວ້າ, ສູນຝຶກອົບຮົມ ຍທຂ, ການແກ້ໄຂອຸປະຕິເຫດຕາມທ້ອງຖະໜົນ ແລະ ຈະລາຈອນຕິດຂັດແອອັດໃນຕົວ ເມືອງ. ສ່ວນບັນຫາສຳຄັນທີ່ທ່ານຮອງນາຍົກລັດຖະມົນຕີ ສົມສະຫວາດ ເລັ່ງສະຫວັດ ເນັ້ນໃຫ້ເອົາໃຈໃສ່ຕື່ມນັ້ນປະກອບ

ມີການຄຸ້ມຄອງ ແລະ ພັດທະນາການບິນໃຫ້ມີຄວາມປອດໄພ ແລະ ທັນສະໄໝ, ການເສີມຂະຫຍາຍພາລະບົດບາດຄຸ້ມ ຄອງມະຫາພາກຂອງກະຊວງ, ສ້າງກົນໄກປະສານງານກັບບັນດາກະຊວງກ່ຽວຂ້ອງ ແລະ ທ້ອງຖິ່ນ ແລະ ຄົ້ນຄວ້າຍຸດທະ ສາດຂອງຂະແໜງ ຍທຂ ໃນການຮ່ວມມືພາກພື້ນ ແລະ ສາກົນ ໃນເງື່ອນໄຂເຊື່ອມໂຍງສາກົນ. ສ່ວນມາດຕະການແກ້ໄຂ ຈັດຕັ້ງປະຕິບັດແມ່ນໃຫ້ຕິດພັນກັບວຽກງານສາມສ້າງໂດຍມີການຄົ້ນຄວ້າເຮັດທົດລອງຢູ່ແຂວງ ແລະ ເມືອງສາມສ້າງໃດ ໜຶ່ງເພື່ອເປັນຕົວແບບ ແລະ ມີການຖອດຖອນບົດຮຽນແລ້ວສືບຕໍ່ຜັນຂະຫຍາຍຕໍ່ໄປ.