ທະນາຄານພັດທະນາອາຊີ ຫຼື ເອດີບີ (ADB) ໄດ້ອະນຸມັດໃຫ້ເງິນກູ້ຢືມແກ່ລັດຖະ
ບານລາວ ຈຳນວນ 21 ລ້ານໂດລາສະຫະລັດ ຫຼື ປະມານ 168 ຕື້ກີບ ເຂົ້າໃນການຈັດຕັ້ງ ປະຕິບັດໂຄງການພັດທະນາການລ້ຽງສັດ
ເພື່ອຜະລິດເປັນສິນຄ້າສົ່ງອອກ ຢູ່ເຂດພາກເໜືອຂອງລາວ.
ໂຄງການນີ້ ໂດຍແມ່ນກະຊວງກະສິກຳ ແລະປ່າໄມ້ເປັນຜູ້ປະຕິບັດໃນໄລຍະເວລາ
ເກືອບ 7 ປີ ຄືແຕ່ປີ 2015 ຮອດກາງປີ 2021 ຢູ່ໃນ 12 ເມືອງຂອງ 4 ແຂວງພາກເໜືອຂອງລາວ
ຄື: ແຂວງຫົວພັນ, ຊຽງຂວາງ, ຫຼວງພະບາງ ແລະ ຫຼວງນ້ຳທາ. ເພື່ອສືບຕໍ່ພັດທະນາການລ້ຽງສັດໃຫ້ເປັນສິນຄ້າໂດຍສະເພາະກຸ່ມຜູ້ລ້ຽງສັດ
ແລະ ຄ້າຂາຍສັດໃຫ້ມີຄວາມເຂັ້ມແຂງ ທັງສາມາດເຂົ້າເຖິງຕະຫຼາດ, ທັງມີການປັບປຸງຄຸນນະພາບຂອງຊິ້ນສັດລ້ຽງໃຫ້ມີປະ
ລິມານ ແລະ ຄຸນນະພາບຖືກຫຼັກອະນາໄມ ສາມາດສະໜອງພາຍໃນ ແລະ ສົ່ງອອກແຂ່ງຂັນກັບຕ່າງປະເທດໄດ້. ທັງນີ້ກໍເພື່ອເປັນການສ້າງລາຍຮັບໃຫ້ປະຊາຊົນຊາວກະສິກອນຜູ້ລ້ຽງ
ສັດ. ນອກຈາກນັ້ນ
ຍັງໄດ້ປັບປຸງຄຸນນະພາບການຮຽນ-ການສອນ ຂອງໂຮງຮຽນວິທະຍາໄລເຕັກນິກກະສິກຳພາກເໜືອ,
ປັບປຸງດ້ານຄວາມປອດໄພຂອງອາຫານ ດ້ວຍການສ້າງຕົວແບບໂຮງງານຂ້າສັດແນໃສ່ເປັນພື້ນຖານໃຫ້ສິນຄ້າສັດ
ແລະ ເປັນທີ່ຍອມຮັບຂອງຕະຫຼາດພາຍໃນ ແລະ ຕ່າງປະເທດໃນ ຕໍ່ໜ້າ.
ກະຊວງການເງິນໃຫ້ຮູ້ຕື່ມວ່າ: ໃນປີຕໍ່ໜ້າໂຄງການດັ່ງກ່າວຍັງຈະໄດ້ຮັບການຊ່ວຍເຫຼືອດ້ານການເງິນ
ຈາກກອງທືນສາກົນ ເພື່ອພັດທະນາກະສິກຳຕື່ມອີກປະມານ 10 ລ້ານໂດລາສະຫະລັດ ຫຼື
ປະມານ 80 ຕື້ກີບ. ເພື່ອປະກອບ ສ່ວນໃນການພັດທະນາໂຄງການລ້ຽງສັດເປັນສິນຄ້າໃນພາກເໜືອໃຫ້ມີຄວາມເຂັ້ມແຂງ
ແລະ ມີຄຸນນະພາບດີຂຶ້ນເລື້ອຍໆ. ພິທີລົງນາມສັນຍາຄັ້ງນີ້ ລະຫວ່າງ ທ່ານ ນາງ
ທິບພະກອນ ຈັນທະວົງສາ ລັດຖະມົນຕີຊ່ວຍວ່າການກະຊວງການເງິນ ແລະ ທ່ານ ນາງ ແຊນດຣາ
ນິໂຄລ ( Sandra nicoll) ຫົວໜ້າຫ້ອງການຜູ້ຕາງໜ້າທະນາຄານ ເອດີບີ ປະຈຳລາວ, ມີ ທ່ານ
ດຣ. ພວງປະຣີສັກ ປຣະວໍວຽງຄຳ ລັດຖະມົນຕີຊ່ວຍວ່າການກະຊວງກະສິກຳ ແລະ ປ່າໄມ້ ພ້ອມດ້ວຍພະນັກງານກ່ຽວຂ້ອງທັງສອງຝ່າຍເຂົ້າຮ່ວມ.
No comments:
Post a Comment