ສະຫລອງວັນສ້າງຕັ້ງສາຍພົວພັນການທູດລາວ-ຍີ່ປຸ່ນຄົບຮອບ 60 ປີ

      ​ໃນ​ວັນ​ທີ 16 ມັງກອນຜ່ານ​ມາ​ນີ້, ສະຖານທູດ​ຍີ່​ປຸ່ນປະ​ຈຳ​ລາວ,​ໄດ້​ຈັດ​ງານ​ລ້ຽງສະເຫລີມສະຫລອງວັນສ້າງ ຕັ້ງສາຍພົວພັນການທູດລະຫວ່າງ​ສ ປປ ລາວ ​ແລະ ຍີ​jປຸ່ນຄົບຮອບ 60 ປີ (5 ມີນາ 1955 - 5 ມີນາ 2015 )ທີ່ໂຮງແຮມລາວ ພລາຊາ,ນະຄອນຫລວງວຽງຈັນ, ໂດຍການ​ເຂົ້າ​ຮ່ວມ​ຂອງ​ທ່ານ ທອງລຸນ ສີສຸລິດ ຮອງນາຍົກ ລັດ ຖະມົນຕີ, ລັດຖະມົນຕີວ່າການກະຊວງການຕ່າງປະເທດ, ທ່ານ ຣີໂຣະຢູກິ ກິຊິໂນເອກອັກຄະຣາຊະທູດວິສາມັນ ຜູ້ມີອຳນາດເຕັມ ແຫ່ງປະເທດ ຍີ່ປຸ່ນປະຈຳລາວ,ມີບັນດາລັດຖະມົນຕີ,ພ້ອມແຂກຖືກເຊີນທັງ​ລາວ-ຍີ່​ປຸ່ນ ເຂົ້າຮ່ວມ.

     ໂອກາດດັ່ງກ່າວ,ທ່ານ ອາລຸນແກ້ວ ກິດຕິຄຸນ ລັດຖະມົນຕີຊ່ວຍວ່າການກະຊວງຕ່າງປະເທດຂອງລາວ ແລະ ທ່ານ ກາຊຶຢູກິ ນາກາເນະ ລັດຖະມົນຕີຊ່ວຍວ່າການກະຊວງການຕ່າງປະເທດຍີ່ປຸ່ນ ໄດ້ຜັດປ່ຽນກັນຂຶ້ນມີຄວາມເຫັນໃນພິທີ, ໂດຍສອງຝ່າຍໄດ້ຕີລາຄາສູງຕໍ່ສາຍພົວພັນມິດຕະພາບ ແລະ ການຮ່ວມມືອັນເປັນມູນເຊື້ອໃນຕະຫລອດໄລຍະ 60

ປີຜ່ານມາ,ນັບແຕ່ສ້າງຕັ້ງສາຍພົວພັນການທູດຮ່ວມກັນການນຳຂັ້ນສູງຂອງທັງສອງປະເທດໄດ້ມີການແລກປ່ຽນຢ້ຽມ ຢາມ, ໄປມາຫາສູ່ເຊິ່ງກັນ ແລະ ກັນ ​ແລະ  ດ້ວຍຄວາມພະຍາຍາມຂອງທັງສອງຝ່າຍສາຍພົວພັນມິດຕະພາບ ແລະ ການຮ່ວມມືທີ່ມີປະສິດທິຜົນລະຫວ່າງສອງຊາດ ລາວ-ຍີ່ປຸ່ນໄດ້ຮັບການເສີມຂະຫຍາຍ ແລະ ເຕີບໃຫຍ່ຂະຫຍາຍຕົວ ຢ່າງຕໍ່ເນື່ອງ ແລະ ໄດ້ຖືກຍົກລະດັບໃຫ້ສູງຂຶ້ນຕະຫລອດມາ, ເຊິ່ງທັງສອງປະເທດໄດ້ມີການຊ່ວຍເຫລືອເຊິ່ງກັນ ແລະ ກັນ ໃນຫລາຍໆດ້ານໂດຍສະເພາະຂົງ​ເຂດການສຶກສາ, ສາທາລະນະ​ສຸກ, ກະສິກຳ ແລະ ອື່ນໆ.