laophatthananewspaper: ອວ່າຍແລວນ້ຳໂຄງການກໍ່ສ້າງໄຟຟ້ານ້ຳຂອງໄຊຍະບູລີ

ພິທີອວ່າຍແລວນ້ຳໂຄງການກໍ່ສ້າງໄຟຟ້ານ້ຳຂອງໄຊຍະບູລີ ໄດ້ຈັດຂຶ້ນໃນວັນທີ 26 ມັງກອນ 2015 ທີ່ເມືອງ ແລະ ແຂວງໄຊຍະບູລີ ໂດຍເປັນກຽດເຂົ້າຮ່ວມ ແລະ ລັ່ນຄ້ອງ 9 ບາດເພື່ອເປັນສີລິມົງຄຸນຂອງທ່ານ ຈູມມາລີ ໄຊຍະສອນ ປະທານ ປະເທດແຫ່ງ ສປປ ລາວ ພ້ອມດ້ວຍລັດຖະມົນຕີ, ເຈົ້າແຂວງ, ເຈົ້າເມືອງ ພ້ອມດ້ວຍແຂກທີ່ຖືກເຊີນຈາກພາກລັດ ແລະ ເອກະຊົນເຂົ້າຮ່ວມ.

ທ່ານ ສົມສະຫວາດ ເລັ່ງສະຫວັດ ຮອງນາຍົກລັດຖະມົນຕີ ຜູ້ຊີ້ນຳວຽກງານການຜະລິດ ແລະ ຈໍລະຈອນສິນຄ້າ ກ່າວວ່າ: ໂຄງການພະລັງໄຟຟ້າຝາຍນ້ຳລົ້ນນ້ຳຂອງໄຊຍະບູລີ ເປັນໂຄງການໜຶ່ງທີ່ມີຄວາມສຳຄັນຢູ່ໃນແຜນພັດທະນາພະລັງງານໄຟຟ້າຂອງ ສປປ ລາວ; ເປົ້າໝາຍຂອງການພັດທະນາແມ່ນເພື່ອຂຸດຄົ້ນ ແລະ ເສີມຂະຫຍາຍທ່າແຮງຂອງປະເທດທີ່ມີແມ່ນ້ຳລຳເຊຫລາຍສາຍສາມາດຜະລິດພະລັງງານໄຟຟ້າສະໜອງໃຫ້ແກ່ການຊົມໃຊ້ພາຍໃນ ແລະ ສົ່ງອອກສ້າງລາຍຮັບໃຫ້ກັບປະເທດຊາດ. ພິທີອວ່າຍແລວນ້ຳຄັ້ງນີ້ຈັດເປັນໄລຍະທີໜຶ່ງຂອງການກໍ່ສ້າງເພື່ອກ້າວສູ່ໄລຍະທີສອງຂອງ

ໂຄງການເຊິ່ງທາງຄະນະບໍລິຫານຂອງບໍລິສັດຜູ້ພັດທະນາໂຄງການກໍຄືບໍລິສັດທີ່ປຶກສາຈະຕ້ອງເຂັ້ມງວດໃນການເອົາໃຈໃສ່ຄຸ້ມຄອງການດຳເນີນໂຄງການແຕ່ລະຂັ້ນຕອນໃຫ້ຖືກຕ້ອງຕາມມາດຖານເຕັກນິກຄວາມປອດໄພສິ່ງແວດລ້ອມເປີດເຜີຍ ແລະ ໂປ່ງໃສໃຫ້ສອດຄ່ອງກັບສົນທິສັນຍາວ່າດ້ວຍການນຳໃຊ້ແມ່ນ້ຳຂອງ ປີ 1995 ບໍ່ສົ່ງຜົນກະທົບຕໍ່ບັນດາປະເທດລຸ່ມແມ່ນ້ຳຂອງ ເນື່ອງຈາກໂຄງການນີ້ມີລັດຖະບານໄດ້ ວ່າຈ້າງວິສາວະກອນທີ່ປຶກສາທີ່ມີຊື່ສຽງລະດັບໂລກມາຄຸ້ມຄອງ ຕິດຕາມ ແລະ ກວດກາຢ່າງໃກ້ຊິດ.

ເພື່ອເປັນການຕອບສະໜອງໃຫ້ແກ່ການພັດທະນາໄລຍະຍາວຈະສູ້ຊົນໃຫ້ ສປປ ລາວ ຫລຸດພົ້ນອອກຈາກສະພາວະດ້ອຍພັດທະນາຫັນໄປສູ່ປະເທດອຸດສາຫະກຳ ແລະ ທັນສະໄໝ ການປັບປຸງລະບົບພື້ນຖານໂຄງລ່າງທາງດ້ານເສດຖະກິດ-ສັງຄົມຈະຕ້ອງໃຫ້ທັນສະໄໝໃນບາງເຂດ ແລະ ບາງດ້ານ ເພື່ອອຳນວຍຄວາມສະດວກໃຫ້ແກ່ການພັດທະນາ ແລະ ການເຊື່ອມຕົວເຂົ້າສູ່ພາກພື້ນ ແລະ ສາກົນ, ສ້າງໃຫ້ ສປປ ລາວ ກາຍເປັນໃຈກາງຂອງການບໍລິການບາງດ້ານໃນພາກພື້ນ ການເຊື່ອມໂຍງເສດຖະກິດ ແລະ ການຮ່ວມມືກັບພາກພື້ນ ແລະ ສາກົນໄດ້ມີການເພີ່ມຂຶ້ນ ແລະ ຂະຫຍາຍ ກວ້າງອອກດ້ວຍຫລາຍຮູບແບບຫລາຍລະດັບ ແລະ ມີການແຂ່ງຂັນກັນສູງຂຶ້ນ ມີຫລາຍປະເທດໄດ້ກາຍເປັນສະມາຊິກຂອງອົງການຕ່າງໆເຊັ່ນ: ອົງການການຄ້າໂລກ (WTO) ປະຊາຄົມເສດຖະກິດອາຊຽນ (AEC) ແລະ ອຶ່ນໆ ເຊິ່ງຈະເຮັດໃຫ້ການຄ້າ ການລົງທຶນ ການບໍລິການເພີ່ມຂຶ້ນ ບັນດາຄູ່ຮ່ວມພັດທະນາ ແລະ ອົງການຈັດຕັ້ງສາກົນ ຈະສືບຕໍ່ໃຫ້ການຊ່ວຍເຫລືອ ແລະ ເຂົ້າໃຈຖືກຕ້ອງຕໍ່ກັບການພັດທະນາກໍຄືການພັດທະນາໂຄງການໄຟຟ້ານ້ຳຕົກຂະໜາດໃຫຍ່ໃນ ສປປ ລາວ.

ໂຄງການກໍ່ສ້າງໄຟຟ້າພະລັງງານນ້ຳຂອງໄຊຍະບູລີ ໄດ້ເລີ່ມລົງມືກໍ່ສ້າງມາແຕ່ປີ 2012 ດ້ວຍອາຍຸສຳປະທານ 25-30 ປີ ໄດ້ມີຄວາມຄືບໜ້າແລ້ວປະມານ 40% ພາຍຫລັງການສຳເລັດກໍ່ສ້າງ ຝັ່ງເບື້ອງຂວາ ແລະ ທາງໂຄງການໄດ້ມີການອວ່າຍແລວນ້ຳຂອງມາເບື້ອງຝັ່ງຂວາທີ່ກໍ່ສ້າງສຳເລັດ ກໍຈະເລີ່ມກໍ່ສ້າງຝັ່ງເບື້ອງຊ້າຍທັນທີ,ຄາດວ່າ ຈະສຳເລັດໃນສົມບູນໃນປີ 2019. ດ້ວຍມູນຄ່າການລົງທຶນມະຫາສານປະມານ 3,8 ຕື້ໂດລາສະຫະລັດ ຫລື ປະມານ 30 ພັນຕື້ກີບ. ຕາມຂໍ້ມູນເບື້ອງຕົ້ນໃຫ້ຮູ້ວ່າຫາກໂຄງການດັ່ງກ່າວສຳເລັດສົມບູນແບບຈະມີກຳລັງຕິດຕັ້ງທັງໝົດ 1.285 ເມກາວັດ ຈະສາມາດຜະລິດກະແສໄຟຟ້າໄດ້ທັງໝົດ 7.406 ກິກະວັດໂມງຕໍ່ປີ ໃນນັ້ນຈະສະໜອງພາຍໃນ 60 ເມກາວັດ ສ່ວນທີ່ເຫລືອແມ່ນສະໜອງໃຫ້ກັບປະເທດເພື່ອນບ້ານ.

ດ້ວຍຈຳນວນການລົງທຶນຢ່າງມະຫາສານບວກກັບລາຍຮັບຂອງພາກລັດມີຢ່າງຈຳກັດຈິ່ງໄດ້ເປີດໂອກາດໃຫ້ນັກທຸລະກິດເຂົ້າມາມີສ່ວນຮ່ວມເຊັ່ນ:ບໍລິສັດພາຍໃນປະເທດໄທຖືຮຸ້ນ75%ລັດຖະ ບານລາວ 20% ແລະ ນັກທຸລະກິດລາວ 5% ການກໍ່ສ້າງແມ່ນໄດ້ເລັ່ງປະຕິບັດຕະຫລອດ 24 ຊົ່ວໂມງນັບແຕ່ມື້ລົງມືປະຕິບັດເພື່ອໃຫ້ໂຄງການສຳເລັດຕາມກຳນົດເວລາເຊິ່ງໄດ້ໃຊ້ແຮງງານທັງໝົດ 9-10 ພັນຄົນ ແຮງງານລາວກວມເອົາ 60%.