ລາວຈະສຸມໃສ່ລົບລ້າງຄວາມບໍ່ຮູ້ໜັງສືໃຫ້ສຳເລັດທົ່ວປະເທດໃນປີນີ້

     ກະຊວງສຶກສາທິການ ແລະ ກິລາ ໃຫ້ຮູ້ວ່າ: ໃນສົກປີຜ່ານມາ ໄດ້ດຳເນີນການ ລົບລ້າງຄວາມບໍ່ຮູ້ໜັງສື ແລະ ບຳລຸງຈົບ ຊັ້ນປະຖົມໃຫ້ເດັກນ້ອຍກຸ່ມອາຍຸ 6-14 ປີ ດ້ວຍຮູບແບບສອນກັບທີ່ ແລະ ເຄື່ອນທີ່ຢູ່ 3 ແຂວງຄື: ສະຫວັນນະເຂດ, ຄຳ ມ່ວນ ແລະ ເຊ ກອງ. ມາຮອດປັດຈຸບັນ ມີ 144 ໃນ 148 ເມືອງ ໄດ້ປະກາດຈົບ ຊັ້ນປະຖົມບຳລຸງແລ້ວ, ຍັງເຫລືອ 4 ເມືອງ ຂອງແຂວງໄຊສົມບູນ ຄື: ເມືອງ ອານຸວົງ, ເມືອງຮົ່ມ, ລ້ອງແຈ້ງ ແລະ ລ້ອງຊານ ແລະ ມີ 16 ໃນ 18 ແຂວງທົ່ວ ປະເທດປະກາດຈົບຊັ້ນປະຖົມບຳລຸງ ແລ້ວ.

     ຄຽງຄູ່ກັບການບຳລຸງຈົບຊັ້ນປະຖົມ, ການບຳລຸງຍົກລະດັບຊັ້ນມັດທະຍົມຕອນຕົ້ນ ແລະ ປາຍກໍໄດ້ຮັບການສົ່ງເສີມເຊັ່ນ ກັນ. ປັດຈຸບັນມີ 26 ເມືອງໃນທົ່ວປະເທດທີ່ສາມາດປະກາດຈົບຊັ້ນມັດທະຍົມຕອນຕົ້ນບຳລຸງ, ຊຶ່ງການຝຶກອົບຮົມວິຊາຊີບ ຂັ້ນພື້ນຖານແມ່ນວຽກງານໜຶ່ງທີ່ກະຕຸກຊຸກຍູ້ໃຫ້ແກ່ປະຊາຊົນມາຮຽນໜັງສື,ປະກອບສ່ວນເຂົ້າໃນການລຶບລ້າງຄວາມທຸກຍາກໃຫ້ແກ່ປະຊາຊົນ. ນອກນັ້ນ, ຍັງໄດ້ຝຶກອົບຮົມວິຊາຊີບໃນວິຊາຫລັກຄື: ການລ້ຽງໄກ່, ລ້ຽງກົບ, ລ້ຽງປາ, ປູກເຫັດ, ປຸງແຕ່ງອາຫານ, ຕັດຫຍິບ,
ເສີມສວຍ, ຊ່າງໄມ້, ຊ່າງກໍ່, ຊ່າງໄຟຟ້າ ແລະ ອື່ນໆ, ເຊິ່ງມີຜູ້ເຂົ້າຮ່ວມຝຶກອົບຮົມເປັນຈຳນວນຫລາຍ. ນອກຈາກນີ້ ຍັງໄດ້ພັດ ທະນາຫລັກສູດ, ປຶ້ມແບບຮຽນ, ຄູ່ມືຄູ, ປຶ້ມບົດ ເຝຶກຫັດຊັ້ນປະຖົມສຳລັບເດັກ 6-14 ປີ, ທີ່ບໍ່ເຄີຍໄດ້ເຂົ້າຮຽນຢູ່ເຂດຫ່າງ

ໄກສອກຫລີກ, ຊຶ່ງໄດ້ທົດລອງຢູ່ ແຂວງສະຫວັນນະເຂດ ສຳລັບກອງທຶນເລັ່ງລັດ ມີຫລັກສູດສອງລະດັບ ແລະ ທຽບເທົ່າຊັ້ນ ປະຖົມໃນໂຮງຮຽນ, ໄດ້ຈັດພິມ ແລະ ສະໜອງປຶ້ມຄູ່ມືຄູ ພ້ອມດ້ວຍບົດເຝຶກຫັດໃຫ້ແກ່ເດັກ ແລະ ຄູ ສອນເຄື່ອນທີ່, ປັບປຸງ ຊຸດການຮຽນ-ການສອນວິຊາຊີບຂັ້ນພື້ນຖານສຳເລັດ 3 ສາຂາວິຊາຄື: ປູກພືດ, ລ້ຽງສັດ, ປຸງແຕ່ງອາຫານ. ແນວໃດກໍຕາມ ຍັງມີບາງບັນຫາທີ່ຈະ ຕ້ອງເລັ່ງແກ້ໄຂຄື: ໂຄງປະກອບການຈັດຕັ້ງດ້ານບໍລິ ຫານ ແລະ ວິຊາການຂອງສູນການສຶກສານອກ ໂຮງຮຽນຂັ້ນແຂວງ, ຂັ້ນເມືອງ ແລະ ສູນການຮຽນຮູ້ຊຸມຊົນບໍ່ທັນສ້າງຂຶ້ນໄດ້ຢ່າງທົ່ວເຖິງ ແລະ ການເຄື່ອນໄຫວບໍ່ທັນມີປະ ສິດທິພາບ, ການສະໜອງງົບປະມານ ສຳລັບວຽກງານຊຸກຍູ້, ສົ່ງເສີມ ແລະ ພັດທະນາຄຸນນະພາບຂອງວຽກງານສຶກສາ ນອກໂຮງຮຽນ ຍັງມີໜ້ອຍ ແລະ ຊັກຊ້າເຊັ່ນ: ເງິນອຸດໜູນຄູອາສາສະໝັກຍັງຕ່ຳ, ເງິນບໍລິຫານໂຮງຮຽນຂອງສູນການ ສຶກສານອກໂຮງຮຽນຂັ້ນແຂວງ, ເມືອງ ດ້ວຍຮູບແບບຄິດ ໄລ່ຕາມຫົວໜ່ວຍນັກຮຽນບໍ່ທັນປະຕິບັດໄດ້, ເງິນນະໂຍບາຍ ອຸດໜຸນຄູສອນຢູ່ເຂດຫ່າງໄກສອກຫລີກ ສຳລັບການສຶກສານອກ ໂຮງຮຽນກໍຍັງປະຕິບັດ ບໍ່ທັນໄດ້; ອາຄານສະຖານທີ່, ພື້ນຖານວັດຖຸ ແລະ ອຸປະກອນຮັບໃຊ້ສຳລັບສູນການສຶກສານອກໂຮງ ຮຽນຂັ້ນແຂວງ, ຂັ້ນເມືອງ ແລະ ສູນການຮຽນຮູ້ຊຸມ ຊົນແມ່ນຍັງຂາດເຂີນ ແລະ ບໍ່ໄດ້ຕາມມາດຕະຖານ ແລະ ບຸກຄະລາກອນທີ່ ເຮັດວຽກງານສຶກສານອກໂຮງຮຽນເປັນຕົ້ ແມ່ນຄູສອນບໍ່ພຽງພໍ ແລະ ຄວາມຮູ້ຄວາມສາມາດຍັງບໍ່ທັນສູງ, ຂາດການບຳລຸງສ້າງ ຕາມສາຍວິຊາການ ແລະ ການຝຶກອົບ ຮົມກໍຍັງມີໜ້ອຍ, ໂດຍໃນສົກປີນີ້ ກະຊວງສຶກສາທິການ ແລະ ກິລາຈະສືບຕໍ່ການບຳລຸງ ຍົກລະດັບການສຶກສາຊັ້ນມັດທະ ຍົມຕອນຕົ້ນໃຫ້ມີຄຸນນະພາບ, ຈັດຝຶກອົບຮົມວິຊາຊີບຂັ້ນພື້ນຖານຄວບຄູ່ກັບການຮຽນໜັງສື ແລະ ບຳລຸງຍົກລະດັບການ ສຶກສາໂດຍເລັ່ງໃສ່ເຂດຈຸດສຸມ 3 ສ້າງແກ້ໄຂຄວາມທຸກຍາກ; ປັບປຸງ ແລະ ສ້າງ ສູນການສຶກສານອກ ໂຮງຮຽນຂັ້ນແຂວງ, ຂັ້ນເມືອງ ແລະ ສູນກາງສຶກສານອກໂຮງຮຽນຂັ້ນແຂວງ, ເມືອງ ແລະ ສູນການຮຽນຮູ້ຊຸມຊົນ; ປັບປຸງ, ພັດ ທະນາ ແລະ ຈັດພິມຫລັກສູດ, ຄູ່ມືຄູ ແລະ ປຶ້ມແບບຮຽນຊັ້ນມັດທະຍົມຕອນຕົ້ນປະຊາຊົນ ແລະ ວິຊາຊີບຂັ້ນພື້ນຖານ; ປັບປຸງ ແລະ ສ້າງນິຕິກຳຕ່າງໆ ກ່ຽວກັບການ ທຽບເທົ່າຫລັກສູດຊັ້ນປະຖົມ, ການທຽບໂອນຫລັກສູດວິຊາຊີບຂັ້ນພື້ນຖານ, ລະບຽບການ ຄຸ້ມຄອງການຮຽນ-ການສອນບຳລຸງມັດທະຍົມຕອນຕົ້ນ ແລະ ຕອນປາຍ, ສ້າງມາດຕະຖານ, ລະບົບການຕິດຕາມ ແລະ ປະເມີນ ການສຶກສານອກໂຮງຮຽນນຳອີກ.