ກະຊວງກະສິກຳ ແລະ ປ່າໄມ້ໃຫ້ຮູ້ວ່າ: ການຜະລິດເຂົ້ານາແຊງຂອງປະເທດເຮົາປີນີ້ບັນລຸໄດ້ແລ້ວຫຼາຍກວ່າ
89 ພັນເຮັກຕາ, ເທົ່າກັບ 71%, ຂອງເນື້ອທີ່ແຜນການ 126.600 ເຮັກຕາ, ໃນນັ້ນປັກດຳໄດ້ຫຼາຍກວ່າໝູ່ແມ່ນບັນດາແຂວງພາກກາງປະຕິບັດໄດ້
62 ພັນກວ່າເຮັກຕາ, ພາກໃຕ້ 20 ພັນກວ່າເຮັກຕາ ແລະ ພາກເໜືອ 6 ພັນກວ່າເຮັກຕາ,
ທຽບໃສ່ໄລຍະດຽວກັນຂອງປີຜ່ານມາເຫັນວ່າການປູກເຂົ້ານາແຊງປີນີ້ມີຄວາມຊັກຊ້າ,
ຍ້ອນສະພາບອາກາດໜາວເຢັນແກ່ຍາວ ແລະ ກະສິກອນຈຳນວນໜຶ່ງໄດ້ຫັນໄປເຮັດກິດຈະກຳອື່ນ,
ໂດຍສະເພາະແມ່ນເຂດທີ່ມີຜົນຜະລິດເຂົ້ານາປີກຸ້ມກິນ ແລະ ເຫຼືອກິນແລ້ວແມ່ນບໍ່ຜະລິດນາແຊງອີກ,
ດັ່ງນັ້ນ ອາດເປັນຜົນໃຫ້ການຜະລິດເຂົ້ານາແຊງປີນີ້ບໍ່ບັນລຸຕາມຄາດໝາຍແຜນການທີ່ວາງໄວ້
ເຖິງຢ່າງໃດກໍຕາມຂະແໜງກະສິກຳຈະສືບຕໍ່ຊຸກຍູ້ກະສິກອນບ່ອນທີມີເງື່ອນໄຂສືບຕໍ່ປັກດຳນາແຊງດ້ວຍເຕັກນິກການຢອດ
ແລະ ຫວານ, ເພື່ອເປັນການປະຢັດເວລາ ແລະ ທັນກັບລະດູການກັບກ່ຽວ, ຄຽງຄູ່ກັນນັ້ນການປູກພືດລະດູແລ້ງກໍດຳເນີນໄປຢ່າງເປັນຂະບວນກ້ວາງຂວາງ,
ຊຶ່ງມາຮອດປັນຈຸບັນທົ່ວປະເທດສາມາດປູກພືດລະດູແລ້ງໄດ້ແລ້ວຫຼາຍກວ່າ 99 ພັນເຮັກຕາ,
ເທົ່າກັບ 62 % ຂອງເນື້ອທີ່ແຜນການ, ທຽບໃສ່ອາທິດຜ່ານມາເພີ່ມຂຶ້ນ 8%, ໃນນີ້ແຂວງທີ່ປະຕິບັດໄດ້ຫຼາຍກວ່າໝູ່ກໍຍັງແມ່ນ
ບັນດາແຂວງພາກກາງບັນລຸໄດ້ 44 ພັນກວ່າເຮັກຕາ, ພາກເໜືອ 42 ພັນກວ່າເຮັກຕາ
ແລະ ພາກໃຕ້ 12 ພັນກວ່າເຮັກຕາ, ສ່ວນຂະແໜງກະສິກຳໄດ້ນຳສົ່ງພະນັກງານວິຊາການລົງຕິດຕາການປູກພືດລະດູແລ້ງຂອງກະສິກອນທ້ອງຖິ່ນຕ່າງໆຢ່າງໃກ້ຊິດເພື່ອແນະນຳແນະວິທີການປູກ ແລະ ການບົວລະບັດຮັກສາເພື່ອມີຜົນຜະລິດສູງ.
No comments:
Post a Comment