laophatthananewspaper: ມີຫລາຍບັນຫາທ່ວງດຶງການພັດທະນາຂະແໜງໄຟຟ້າ

ທ່ານ ສີສະຫວາດ ທີຣະວົງ ອຳນວຍການລັດວິສາຫະກິດໄຟຟ້າລາວ ໃຫ້ຮູ້ວ່າ: ປັດຈຸບັນ, ແມ່ນມີຫລາຍບັນຫາທີ່ເປັນຜົນ ກະທົບຕໍ່ການພັດທະນາໃນຂະແໜງໄຟຟ້າ ເປັນຕົ້ນ: ຍັງບໍ່ສາມາດສະໜອງໄຟຟ້າທັນຕາມຄວາມຕ້ອງການຂອງສັງຄົມ, ມີຫລາຍໂຄງການຂະຫຍາຍຕາງໜ່າງໄຟຟ້າທັບຊ້ອນ, ການບໍລິການສັງຄົມຍັງບໍ່ດີ, ບັນຫາໜີ້ສິນມີຫລາຍໂດຍສະເພາະແມ່ນພາກລັດ ແລະ ໂຄງການຊົນລະປະທານ, ບັນດານະໂຍບາຍ, ລະບຽບການ, ນິຕິກຳຄຸ້ມຄອງ ແລະ ສົ່ງເສີມໂຄງການຜະລິດມີການປັບປຸງ ແລະ ອອກມາໃໝ່ເລື້ອຍໆ ເຮັດໃຫ້ຫລາຍໂຄງການມີມູນຄ່າເພີ່ມຂຶ້ນ ແລະ ການເຈລະຈາຊື້-ຂາຍໄຟຟ້າມີຄວາມຫຍຸ້ງຍາກ.

ອຳນວຍການລັດວິສາຫະກິດໄຟຟ້າລາວ ກ່າວວ່າ: ບັນຫາສ່ວນຫລາຍແມ່ນເກີດຈາກຂອດກວດກາການຈັດຕັ້ງປະຕິບັດບໍ່ເປັນໄປຕາມແຜນວຽກ, ມີຫລາຍໂຄງການຈັບຈອງໄວ້ແຕ່ບໍ່ມີການພັດທະນາ, ການປະສານງານ ແລະ ການເຜີຍແຜ່ລະບຽບຫລັກການລະຫວ່າງຜູ້ສະໜອງ ແລະ ຜູ້ຊົມໃຊ້ຍັງບໍ່ທັນລະອຽດ, ສ່ວນບັນຫາໜີ້ສິນພາກລັດທີ່ມີຕົວເລກເພີ່ມຂຶ້ນຫລວງ
ຫລາຍເຖິງ 372 ຕື້ກວ່າກີບ ແມ່ນມີຄວາມຫຍຸ້ງຍາກໃນການເກັບລາຍຮັບຫລາຍສົມຄວນ, ນອກຈາກນີ້ການກຳນົດລາຄາຍັງບໍ່ມີພື້ນຖານຫລັກການຄົບຖ້ວນ, ບໍ່ມີມາດຕະຖານ, ຂາດໂຄງສ້າງລາຄາໄຟຟ້າ, ການຊື້ໄຟຟ້າຈາກຕ່າງປະເທດ ເພື່ອມາສະ

ໜອງໃຫ້ທ້ອງຖິ່ນ ຫລື ອຸດສະຫະກຳພາຍໃນປະເທດມີລາຄາສູງ, ບາງໂຄງການຂໍກະແສໄຟຫລາຍແຕ່ການຊົມໃຊ້ໜ້ອຍເຮັດໃຫ້ຜູ້ສະໜອງຕ້ອງແບກຫາບພາລະໃນການຈ່າຍລາຄາ, ສະນັ້ນ ມາດຕະການແກ້ໄຂແມ່ນພວກເຮົາຕ້ອງໄດ້ກວດຄືນບັນດາໂຄງການຜະລິດທີ່ບໍ່ສາມາດປະຕິບັດຕາມພັນທະກໍຄວນສົ່ງຄືນລັດຖະບານເພື່ອໃຫ້ຄົນອື່ນມາພັດທະນາ, ສ້າງລະບຽບຫລັກ ການຂໍນຳໃຊ້ໄຟໃຫ້ສອດຄ່ອງກັບສະພາບຕົວຈິງ, ປັບປຸງທັດສະນະການບໍລິການຂອງພະນັກງານໃຫ້ດີກວ່າເກົ່າ ແລະ ໂຄງ ການຊົນລະປະທານໃດບໍ່ມີປະສິດຕິພາບກໍຄວນຢຸດ ເພື່ອຫລຸດຜ່ອນບັນຫາໜີ້ສິນ. ແນວໃດກໍຕາມ, ສປປ ລາວ, ໄດ້ກຳນົດວິໄສທັດຮອດປີ 2030 ໄວ້ຄື ພັດທະນາທຸກແຫລ່ງພະລັງງານທີ່ເປັນທ່າແຮງ ແລະ ໝົດບໍ່ເປັນຂອງຊາດ ຕາມຄວາມສາມາດແຂ່ງຂັນໃນຕະຫລາດໃຫ້ມີຄວາມຍືນຍົງ ເນັ້ນປະສິດທິພາບປະສິດທິຜົນ, ຊຸກຍູ້ໃຫ້ການເຊື່ອມໂຍງກັບພາກພື້ນ ແລະ ການຕອບສະໜອງຄວາມຕ້ອງການພາຍໃນປະເທດ ມີຄວາມກົມກຽວສົ່ງເສີມເຊິ່ງກັນ ແລະ ກັນ ຍູ້ໜູນການເຕີບໂຕທຸກຂະແໜງການຕາມທິດຫັນເປັນອຸດສະຫະກຳ ແລະ ທັນສະໄໝ. ສະນັ້ນນັບແຕ່ປີ 2015 - 2020 ແມ່ນຈະສູ້ຊົນພັດທະນາແຫລ່ງພະ ລັງງານໃຫ້ໄດ້ 12 ພັນເມກາວັດໂດຍບໍ່ນັບລວມໂຮງໄຟຟ້າທີ່ມີແລ້ວ.