ວັນທີ
4 ກຸມພານີ້ ໂຮງໝໍແມ່ ແລະ ເດັກໄດ້ມອບເຄື່ອງກວດດ້ວຍຄື້ນສຽງໃຫ້ໂຮງໝໍແຂວງຈຳປາສັກ,
ມູນຄ່າ 12 ພັນໂດລາສະຫາລັດຫຼືປະມານ 100 ລ້ານ ກີບ, ຊຶ່ງເປັນເຄື່ອງກວດຢູ່ໂຮງໝໍແມ່
ແລະ ເດັກໄດ້ຮັບຈາກການຊ່ວຍເຫຼືອຂອງໂຮງໝໍປະເທດສະວິດ, ຕາງໜ້າມອບໂດຍທ່ານຮອງສາສະດາຈານ
ດຣ ບົວວັນ ແສນສະຖິດ ອຳນວຍການໂຮງໝໍແມ່ ແລະ ເດັກ ແລະ ຮັບໂດຍ ທ່ານ ນາງ ດຣ ຈັນທະພອນ
ຕ່າງໜ້າພະແນກປະສູດ ໂຮງໝໍແຂວງຈຳປາສັກ, ໂດຍມີພະນັກງານແພດໝໍໂຮງໝໍດັ່ງກ່າວເຂົ້າຮ່ວມນຳ.
ອຳນວຍການໂຮງໝໍແມ່
ແລະ ເດັກກ່າວວ່າ: ຍ້ອນເຫັນໄດ້ຄວາມສຳຄັນສຸຂະພາບແມ່ ແລະ ເດັກ ແລະ ຄວາມຂາດເຂີນທາງດ້ານອຸປະກອນການແພດທີ່ທັນສະໄໝຂອງໂຮງໝໍແຂວງຈຳສັກ,
ໂດຍສະເພາະແມ່ນພະແນກປະສູດ, ດັ່ງນັ້ນ, ໂຮງໝໍແມ່ ແລະ ເດັກຂໍການຊ່ວຍເຫຼືອເຄື່ອງກວດດັ່ງກ່າວຈາກໂຮງໝໍປະເທດສະວິດເພື່ອມາມອບໃຫ້ໂຮງໝໍແຂວງຈຳປາສັກເພື່ອ
ຊ່ວຍຍົກສູງຄຸນນະພາບການປິ່ນປົວສຸຂະພາບຂອງແມ່
ແລະ ເດັກໃນໂຮງໝໍແຂວງຈຳປາສັກໃຫ້ມີຄຸນນະພາບ ໂດຍສະເພາະແມ່ນການກວດ ແລະ
ບົ່ງມະຕິພະຍາດແມ່ ແລະ ເດັກໄດ້ດີຍິ່ງຂຶ້ນ, ເນື່ອງຈາກເຄື່ອງກວດດັ່ງກ່າວເປັນເຄື່ອງມືການແພດທີ່ທັນສະໄໝ,
ຊຶ່ງກ່ອນໜ້ານີ້ທາງໂຮງໝໍແຂວງຈຳປາສັກໄດ້ສົ່ງພະນັກງານແພດໝໍມາເຝິກອົບຮົມການນຳໃຊ້ຈົນມີຄວາມຊຳນານ,
ເພື່ອສາມາດນຳໃຊ້ເຄື່ອງດັ່ງກ່າວໃຫ້ມີປະສິທິຜົນສູງ.
ອຳນວຍການໂຮງໝໍແມ່
ແລະ ເດັກໃຫ້ຮູ້ອີກວ່າ: ປັດຈຸບັນໂຮງໝໍຂອງຕົນກຳລັງສຸມໃສ່ຝຶກອົບຮົມການນຳໃຊ້ຄອມພິວເຕີໃຫ້ກັບພະນັກງານແພດໝໍທຸກພະແນກ,
ເພື່ອກຽມຫັນເປັນທັນສະໄໝ ແລະ ທັງເປັນການກຽມພ້ອມໃນການເປີດໃຫ້ບໍລິການໂຮງໝໍແມ່ແລະ
ເດັກຫຼັງໃໝ່, ໂດຍຄາດວ່າຈະເປີດໃຫ້ບໍລິການໃນເດືອນ ເມສາທີຈະມາເຖິງນີ້.
No comments:
Post a Comment