laophatthananewspaper: ການພົວພັນຮ່ວມມືລາວ-ລັດເຊຍໃນໄລຍະຜ່ານມາໄດ້ຮັບການເສີມຂະຫຍາຍງອກງາມຂຶ້ນເປັນລຳດັບ

ວັນທີ 4 ກຸມພານີ້, ທ່ານ ບາຣານນົບ ທູດລັດເຊຍປະຈຳລາວ, ໄດ້ຖະແຫຼ່ງຕໍ່ສື່ມວນຊົນ, ກ່ຽວກັບການເສີມຂະຫຍາຍສາຍພົວພັນລັດເຊຍ-ລາວ, ລາວ-ລັດເຊຍ ໃນໄລຍະຜ່ານມາວ່າ: ສາຍພົວພັນມຮ່ວມືລະຫວ່າງລັດເຊຍກັບລາວຕັ້ງຢູ່ບົນພື້ນຖານຄວາມເຂົ້າໃຈ, ເຄົາລົົບນັບຖື ແລະ ໄວ້ວາງໃຈເຊິ່ງກັນ ແລະ ກັນ, ມີຄວາມໜັກແໜ້ນແຫ່ງມິດຕະພາບ ແລະ ການຊ່ວຍເຫຼືອເຊິ່ງ ກັນ ແລະກັນ, ທີ່ສ້າງຕັ້ງຂຶ້ນໃນກາງສະໄໝສະຫະພາບໂຊຫວຽດ ແລະ ສປປ ລາວ ຍັງໝຸ່ມນ້ອຍ, ໃນໄລຍະມໍ້ໆຜ່ານມາໄດ້ມີການເສີມຂະຫຍາຍການສົນທະນາທາງດ້ານການເມືອງຢ່າງຫ້າວຫັນ, ສິ່ງທີ່ເປັນການຊຸກຍູ້ອັນແຮງກ້າໃຫ້ແກ່ຂະບວນການດັ່ງກ່າວກໍຄືການຢ້ຽມຢາມລັດເຊຍຄັ້ງທຳອິດຢ່າງເປັນທາງການ ແລະ ເປັນປະຫວັດສາດຂອງປະທານປະເທດແຫ່ງ ສປປ ລາວ ໃນເດືອນ

ຕຸລາ 2011 ແລະ ການຮັບຮອງເອົາຖະແຫຼ່ງການວ່າດ້ວຍການເປັນຄູ່ຮ່ວມຍຸດທະສາດໃນຂົງເຂດພາກພື້ນອາຊີປາຊີຟິກ, ໃນປີ 2012 ປະທານນາທິບໍດີແ່ຫ່ງລັດເຊຍ, ໄດ້ຢ້ຽມຢາມ ສປປ ລາວ ເພື່ອເຂົ້າຮ່ວມກອງປະຊຸມສຸດຍອດອາເຊັມຄັ້ງທີ 9, ຊຶ່ງໄດ້ມີການພົບປະສອງຝ່າຍກັບປະທານປະເທດ ແລະ ນາຍົກລັດຖະມົນຕີຂອງລາວ, ອົງປະກອບທີ່ສຳຄັນຂອງການຮ່ວມມືສອງຝ່າຍແມ່ນການແລກປ່ຽນດ້ານມະນຸດສະທຳຊຶ່ງມີສູນວິທະຍາສາດ ແລະ ວັດທະນະທຳຂອງລັດເຊຍໄຂຂຶ້ນຢູ່ລາວໃນປີ 2013 ແລະ ໃນເດືອນ ພະຈິກ 2014 ໃນກອງປະຊຸມສຸດຍອດອາຊີຕາເວັນອອກຢູ່ປະເທດມຽນມາໄດ້ມີການພົບປະລະຫວ່າງ ທ່ານ ເມເວດເດັບ ນາຍົກ ລັດຖະມົນຕີລັດເຊຍ ແລະ ທ່ານ ທອງສິງທຳມະວົງ ນາຍົກລັດຖະມົນຕີຂອງ ສປປ ລາວ, ຊຶ່ງເປັນເງື່ອນໄຂດີໃນການສະແດງທັດສະນະຂອງແຕ່ລະຝ່າຍກ່ຽວກັບບັນຫາຮີບດ່ວນຂອງການພົວພັນລະຫວ່າງສອງປະເທດ, ສິ່ງດັ່ງກ່າວນັ້ນລ້ວນແຕ່ເປັນການ ພົວພັນລະດັບສູງ ແລະ ຄວາມເຂັ້ມແຂງໃນການຮ່ວມມືລະຫວ່າງສອງສະພາຂອງສອງປະເທດ.

ທ່ານທູດຖະແຫຼ່ງວ່າ: ໃນເດືອນຕຸລາ 2013 ທ່ານ ນາງປານີ ຢາທໍ່ຕູ້ ປະທານສະພາແຫ່ງຊາດລາວໄດ້ເດີນທາງໄປຢ້ຽມ ຢາມລັດເຊຍຢ່າງເປັນທາງການ ແລະ ໄດ້ລົງນາມສັນຍາວ່າດ້ວຍການຮ່ວມມືລະຫວ່າງສະພາແຫ່ງຊາດລາວ ແລະ ສະພາແຫ່ງສະຫະພັນລັດເຊຍ, ຊຶ່ງຕະຫຼອດໄລຍະຜ່ານມາທັງສອງປະເທດລາວ-ລັດເຊຍ, ລັດເຊຍ-ລາວ ໄດ້ເອົາໃຈໃສ່ເປັນຢ່າງຍິ່ງຕໍ່ການພົວພັນ ຮ່ວມມືດ້ານເສດຖະກິດການຄ້າ, ໂດຍສະເພາະການເຂົ້າມາລົງທຶນຂອງນັກລົງທຶນລັດເຊຍໃນຂົງເຂດໂທລະຄົມມະນາຄົມ, ການສຳຫຼວດທໍລະນີສາດ, ການຂຸດຄົ້ນບໍ່ແຮ່ຕ່າງໆເຊັ່ນ: ບໍລິສັດເນແລນພວມດຳເນີວຽກງານສຳຫຼວດບໍ່ຊືນ ແລະ ສັງກະສີຢູ່ແຂວງອັດຕະປື ແລະ ຄົ້ນຄວ້າການເປີດສາຍການບິນໂດຍກົງລະຫວ່າງສອງປະເທດເປັນການສ້າງສິ່ງອຳນວຍໃຫ້ແກ່ການພັດທະນາແລະ ເສີມຂະຫຍາຍດ້ານການຄ້າ, ທ່ອງທ່ຽວລະຫວ່າງສອງປະເທດ, ນອກນັ້ນລັດເຊຍຍັງໄດ້ໃຫ້ການສະໜັບສະໜັບດ້ານການສຶກສາແກ່ລາວ, ໂດຍສະເພາະແມ່ນໃຫ້ທຶນແກ່ນັກສຶກສາລາວໄປສຶກສາຕໍ່ຢູ່ປະເທດລັດເຊຍ ແລະ ໄດ້ເພີ່ມຈຳນວນທຶນຂຶ້ນໃນແຕ່ລະປີ ແລະ ໃນປີ 2014 ບັນດານັກຊ່ຽວຊານຢູ່ມະຫາວິທະຍາໄລຂອງລັດເຊຍໄດ້ພາກັນມາເຮັດວຽກຢູ່ມະຫາວິທະຍາໄລດົງໂດກໂດຍການຈັດເຝິກອົບຮົມໃຫ້ແກ່ອາຈານພາສາລັດເຊຍ ແລະ ນັກສຶກສາຮຽນພາສາລັດເຊຍ, ຊຶ່ງຄະນະນຳມະຫາວິທະຍາໄລດົງໂດກກໍໄດ້ຕີລາຄາສູງຕໍ່ຜົນງານຂອງບັນດາຊ່ຽວຊານດັ່ງກ່າວທີ່ໄດ້ປະກອບສ່ວນໃນການຊຸກຍູ້ສົ່ງເສີມວຽກງານການສຶກສາຂອງລາວກໍຄືການຮ່ວມມືໃນດ້ານການສຶກສາຂອງສອງປະເທດລາວ-ລັດເຊຍ, ລັດເຊຍ-ລາວ.