ພົບວັດຖຸບູຮານເກົ່າແກ່ຍຸກທົ່ງໄຫຫີນຢູ່ແຂວງຊຽງຂວາງ

    ເມື່ອບໍ່ດົນມານີ້, ນັກບູຮານວິທະຍາຂອງລາວ ແລະ ອົດສະຕາລີ, ໄດ້ພົບວັດ ຖຸບູຮານເກົ່າໃນຍຸກປະມານສັດຕະວັດທີ 16 ຫລາຍປະເພດເຊັ່ນ: ກອກຢາສູບ ດິນເຜົາ, ເງິນຫລຽນ ແລະ ເຄື່ອງປະດັບປະດາຕ່າງໆ ທີ່ພິສູດໄດ້ວ່ານຳເຂົ້າ ມາແຕ່ປະເທດຈີນ ແລະ ຍີ່ປຸ່ນເຊິ່ງເປັນຍຸກດຽວກັນກັບການເກີດມີໄຫຫີນຢູ່ ແຂວງຊຽງຂວາງ ແລະ ການຄົ້ນພົບນີ້ສາມາດຢັ້ງຢືນໃຫ້ເຫັນວ່າໄດ້ມີການ ພົວພັນທາງການຄ້າລະຫວ່າງຄົນທີ່ອາ​ໄສຢູ່ພື້ນທີ່ດັ່ງກ່າວກັບຄົນຢູ່ພື້ນທີ່ອື່ນໆໃນເວລານັ້ນ, ນອກຈາກນີ້ການຄົ້ນພົບ ອາດເຜີຍໃຫ້ເຫັນສະພາບການດຳລົງຊີວິດຂອງກຸ່ມຄົນທີ່ເປັນຜູ້ສ້າງໄຫຫີນນຳດ້ວຍ.

     ທ່ານຮອງຫົວໜ້າກົມມໍລະດົກ, ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ວຽງແກ້ວ ສຸກສະຫວັດດີ ກ່າວວ່າ: ຢູ່ປະເທດລາວແມ່ນມີແຫລງວັດຖຸບູຮານສຳຄັນຫລາຍແຫ່ງ ແລະ ບັນດາແຫລງເຫລົ່ານັ້ນສາມາດຊ່ວຍໃຫ້ພວກ ເຮົາມີຄວາມເຂົ້າໃຈເຖິງປະຫວັດສາດ, ຮີດຄອງປະເພນີ ແລະ ຄວາມເປັນມາດ້ານຕ່າງໆຂອງພາກພື້ນນີ້ໄດ້ກວ້າງຂວາງ ຫລາຍຂຶ້ນ ແລະ ຜ່ານການຄົ້ນຄວ້າແຫລ່ງວັດຖຸບູຮານຄັ້ງນີ້ ຈະສ້າງຄວາມສົນໃຈໃຫ້ແກ່ນັກທ່ອງທ່ຽວຫລາຍ ແລະ ຈະເກີດປະໂຫຍດດ້ານເສດຖະກິດຂອງແຂວງຊຽງຂວາງອີກດ້ວຍ.