laophatthananewspaper: ວຽກແຮງງານແລະສະຫວັດດີການສັງຄົມຍັງມີຫຼາຍຈຸດທີ່ຈະຕ້ອງໄດ້ແກ້ໄຂ

ກະຊວງແຮງງານແລະສະຫວັດດີການສັງຄົມໃຫ້ຮູ້ວ່າ: ໃນໄລຍະໜຶ່ງປີຜ່ານມາການຈັດຕັ້ງປະຕິບັດວຽກງານໃນຂະແໜງການ ຕົນແມ່ນເຮັດໄດ້ດີພໍສົມຄວນແລະ ສາມາດຍາດໄດ້ຜົນສຳເລັດຫຼາຍດ້ານເປັນຕົ້ນ: ໂຕເລກການພັດທະ ນາສີມືແຮງງານ ເພື່ອສະໜອງໃຫ້ຫົວໜ່ວຍທຸລະກິດ, ການຜະລິດ ແລະ ໂຄງການລົງ ທຶນຕ່າງໆ ແມ່ນມີຄວາມ ພະຍາຍາມສູງ; ການຈັດຫາວຽກເຮັດງານທຳໃຫ້ແຮງງານລາວຢູ່ພາຍໃນ ແລະ ສົ່ງໄປອອກແຮງງານຢູ່ຕ່າງ ປະເທດກໍໄດ້ຫັນໄປສູ່ດ້ານລະບຽບຫຼັກການ, ສະນັ້ນຜູ້ອອກແຮງງານນັບທັງພາຍໃນ ແລະ ຢູ່ຕ່າງ ປະເທດ, ລ້ວນແຕ່ໄດ້ຮັບການປົກປ້ອງສິດ ແລະ ຜົນປະໂຫຍດຕາມລະ ບຽບກົດໝາຍ ແລະ ມີຄວາມສະຫງົບ; ຜູ້ປະກັນຕົນ ແລະ ຜູ້ຢູ່ໃຕ້ການດູແລໄດ້ຮັບການປົກປ້ອງຢ່າງຕໍ່ເນື່ອງ ; ຂໍ້ມູນຕົວເລກພະນັກ ງານປະຕິວັດອາວຸໂສມີຄວາມຮັດກຸມກວ່າເກົ່າ ແລະ ການປະຕິບັດນະໂຍ ບາຍຕໍ່ຜູ້ມີຜົນງານ ແລະ ຄຸນງາມ ຄວາມດີຕໍ່ປະເທດຊາດໄດ້ຮັບການຕອບສະ ໜອງດ້ານງົບປະມານ
ຕາມຄວາມສາມາດຕົວຈິງ; ວຽກງານສັງ ຄົມສົງເຄາະສືບຕໍ່ໄດ້ຮັບການສະໜັບສະ ໜູນ,ໂດຍສະເພາະຜູ້ປະສົບໄພທຳມະຊາດ ແລະ ຜູ້ດ້ອຍໂອກາດທາງສັງຄົມ,ເຖິງຢ່າງໃດກໍຕາມຄຽງຄູ່ກັນນັ້ນວຽກງານແຮງງານແລະສະຫວັດດີການກໍຍັງມີຈຸດອ່ອນທີ່ຈະຕ້ອງ

ໄດ້ປັບປຸງແກ້ໄຂເປັນຕົ້ນການຈັດຕັ້ງປະຕິບັດບັນດາໂຕເລກຄາດໝາຍດ້ານການພັດທະນາສີມືແຮງງານຍັງບໍ່ທັນໄດ້ຕາມແຜນການທີ່ວາງໄວ້; ການສ້າງມາດຕະຖານສີມືແຮງງານ ແລະ ການເຮັດທົດສອບສີມືແຮງງານໃນຂະແໜງການຕ່າງໆມີຄວາມຄືບໜ້າຊ້າ; ການສະ ໜອງ ກຳລັງແຮງງານໃຫ້ຫົວໜ່ວຍແຮງງານຕ່າງໆຍັງບໍ່ທັນໄປຕາມຄວາມຕ້ອງການຂອງຕະຫລາດແຮງງານ; ການໂຄສະນາເຜີຍແຜ່ລະບຽບການ ແລະ ການກວດກາແຮງງານຕາມຫົວໜ່ວຍແຮງງານຕ່າງໆຍັງເຮັດໄດ້ໜ້ອຍ; ການແກ້ໄຂແຮງງານຕ່າງປະເທດທີ່ເຄື່ອນໄຫວບໍ່ຖືກຕ້ອງຍັງບໍ່ມີຄວາມຄືບໜ້າເທົ່າທີ່ຄວນ; ການສະໜອງງົບປະມານເຂົ້າກອງທຶນປະກັນສັງ ຄົມ ເພື່ອປະຕິບັດນະໂຍບາຍຕາມ 8 ອຸດໜູນ ໂດຍສະເພາະການເບີກຈ່າຍເງິນເດືອນພະນັກງານບຳ ນານ ແລະ ເງິນອຸດໜູນເສຍອົງຄະປະເພດຕ່າງໆຍັງຊັກຊ້າ. ພ້ອມກັນນີ້ ບໍລິສັດຈຳນ ວນໜຶ່ງບໍ່ໃຫ້ການຮ່ວມມືໃນການເຂົ້າເປັນສະມາຊິກຂອງອົງການປະກັນສັງຄົມພາກວິສາຫະກິດ; ການສະ ໜອງງົບປະມານໃຫ້ແກ່ການປະຕິບັດນະໂຍບາຍ 343/ນຍ ແລະ ໂຄງການລົງທຶນຕ່າງໆບໍ່ຄ່ອງຕົວ ເຮັດໃຫ້ການປະຕິບັດຄາດໝາຍສູ້ຊົນດ້ານຕ່າງໆຊັກຊ້າ; ເອກະສານຂໍຖອນເງິນໄດ້ຮັບການອະນຸມັດແລ້ວ ແຕ່ຂອດຊຳລະສະສາງບໍ່ສາມາດຕອບສະໜອງໄດ້ຕາມແຜນ ເຮັດໃຫ້ການເຄື່ອນໄຫວວຽກງານພົບກັບຄວາມຫຍຸ້ງຍາກ ລວມທັງງົບປະມານສະ ໜັບສະໜູນການປະຕິບັດວຽກງານ 3 ສ້າງຍັງຈຳກັດຫລາຍ.