ພິທີມອບ-ຮັບ
ໂຮງພິມໜັງສືພິມປະຊາຊົນພາກໃຕ້ໃນມູນຄ່າ 29 ຕື້ກີບ, ໄດ້ຈັດຂຶ້ນໃນວັນທີ 24 ກໍລະກົດຜ່ານມານີ້,
ທີ່ໂຮງແຮມຈໍາປາສັກແກຣນ ເມືອງປາກເຊ ແຂວງຈໍາປາສັກ ໂດຍການເຂົ້າຮ່ວມຂອງທ່ານ
ສາດສະດາຈານ ດຣ ບໍ່ແສງຄໍາ ວົງດາລາ ລັດຖະມົນຕີວ່າການກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວ, ທ່ານ ສະຫວັນຄອນ ຣາຊມຸນຕຣີ
ລັດຖະມົນຕີຊ່ວຍວ່າການກະຊວງຖະແຫລງຂ່າວ, ວັດທະນະທໍາ
ແລະ ທ່ອງທ່ຽວ, ພ້ອມດ້ວຍພະນັກງານ ກ່ຽວຂ້ອງເຂົ້າຮ່ວມເປັນຈໍານວນຫລາຍ.
ລັດຖະມົນຕີຊ່ວຍວ່າການ ສະຫວັນຄອນ
ຣາຊມຸນຕຣີ ກ່າວວ່າ: ການກໍ່ສ້າງໂຮງພິມປະຊາຊົນທີ່ແຂວງຈໍາປາສັກ,
ກໍເພື່ອຕອບສະໜອງຄວາມຮຽກຮ້ອງຕ້ອງການຂອງສັງຄົມ, ໂດຍສະເພາະໃນບັນດາແຂວງພາກກາງ ແລະ ພາກໃຕ້
ໃຫ້ສາມາດອ່ານໜັງສືພິມປະຊາຊົນ,
ປະເທດລາວ ແລະ ໜັງສືພິມອື່ນໆໃຫ້ທັນເຫດການວັນຕໍ່ວັນ, ເຊິ່ງໃນໄລ ຍະຜ່ານມາພວກເຮົາໄດ້ຈັດພິມໜັງສືພິມດັ່ງກ່າວຢູ່ນະຄອນຫລວງວຽງຈັນ,
ກ່ອນຈະສົ່ງໄປຈໍາໜ່າຍຢູ່ ແຂວງຕ່າງໆເຮັດໃຫ້ມີຄວາມຊັກຊ້າ ແລະ
ບໍ່ທັນເຫດການເຄື່ອນໄຫວຂອງສັງຄົມຕົວຈິງ, ພ້ອມນີ້, ຍັງເປັນການຍົກລະດັບການບໍລິການສັງຄົມໃຫ້ມີຄວາມວ່ອງໄວຫລາຍຂຶ້ນທັງເປັນການຕິດຕາມຂໍ້ມູນຂ່າວສານໃຫ້ມີຄວາມສະດວກວ່ອງໄວຂຶ້ນກວ່າເກົ່າ.
ແນວໃດກໍຕາມການເປີດໂຮງພິມດັ່ງກ່າວທີ່ແຂວງພາກໃຕ້ນີ້, ບໍ່ພຽງແຕ່ຈະຮັບໃຊ້ໃຫ້ແກ່ການຈັດພິມໜັງສືພິມປະຊາ ຊົນເທົ່ານັ້ນ, ແຕ່ຍັງສາມາດໃຫ້ບໍລິການສັງຄົມດ້ວຍເຄື່ອງພິມທີ່ທັນສະໃໝ,
ວ່ອງໄວ ແລະ ມີຄຸນນະພາບສູງນໍາອີກ.
No comments:
Post a Comment