ທ່ານລັດຖະມົນຕີ ກ່າວວ່າ: ຕະຫລອດໄລຍະປະຕິບັດແຜນການ 6
ເດືອນຕົ້ນປີຜ່ານມາ ເຫັນວ່າຄວາມຮັບຜິດຊອບ ແລະ ຄວາມເປັນເຈົ້າການໃນການຈັດຕັ້ງປະຕິບັດບັນດາໂຕເລກຄາດໝາຍແຜນການຂອງບາງຂະແໜງການຢູ່ສູນກາງ ແລະ
ທ້ອງຖິ່ນບໍ່ທັນສູງ, ບໍ່ທັນເສີມຂະຫຍາຍສິດເປັນເຈົ້າຄວາມຮັບຜິດຊອບຂອງທຸກພາກສ່ວນໃນສັງຄົມໄດ້ຢ່າງແຂງແຮງ ແລະ ກວ້າງຂວາງ;
ສະຕິຄວາມຮັບຜິດຊອບຕໍ່ວິໄນແຜນການ-ການເງິນຂອງຂະແໜງການ ແລະ ທ້ອງຖິ່ນຈຳນວນໜຶ່ງຍັງບໍ່ທັນສູງເທົ່າທີ່ຄວນ, ເຖິງວ່າໃນຊຸມປີຜ່ານມາ,
ລັດຖະບານໄດ້ອອກຫລາຍມາດຕະການແກ້ໄຂແລ້ວກໍຕາມ, ແຕ່ກໍຍັງມີການລະເມີດ
ລະບຽບການ ເຮັດໃຫ້ໜີ້ສິນຍັງມີທ່າເພີ່ມຂຶ້ນ, ການຄຸ້ມຄອງ ແລະ ຊຳລະໜີ້ສິນ ເຖິງວ່າມີການປະສານສົມທົບລະຫວ່າງພາກສ່ວນກ່ຽວຂ້ອງ,
ແຕ່ຍັງບໍ່ຫລີກເວັ້ນໄດ້ສະພາບການຊຳລະຊ້ຳຊ້ອນ, ໜີ້ມີຫລາຍແຕ່ແຫລ່ງທຶນຊຳລະມີຈຳກັດ ເຮັດໃຫ້ກົດດັນຕໍ່ການຈັດລຽງບູລິມະສິດໂຄງການ ເພື່ອຊຳລະຢ່າງທົ່ວເຖິງ. ໃນດ້ານນະໂຍບາຍ ແລະ ມາດຕະການຄຸ້ມຄອງລາຄາສິນຄ້າ ໂດຍສະເພາະສິນຄ້າທີ່ມີຜົນກະທົບໂດຍກົງຕໍ່ຊີວິດການເປັນຢູ່ຂອງປະຊາຊົນຍັງບໍ່ທັນຈະແຈ້ງ ເຮັດໃຫ້ລາຄາສິນຄ້າເພີ່ມຂຶ້ນແຕ່ລະໄລຍະ, ຄ່າຄອງຊີບສູງຂຶ້ນ ໂດຍສະເພາະຢູ່ໃນຕົວເມືອງໃຫຍ່ ເປັນຕົ້ນໝວດສິນຄ້າໃຊ້ສອຍ ອຸປະໂພກ- ບໍລິໂພກຕ່າງໆ, ຖ້າທຽບຄ່າຄອງຊີບກັບປະເທດໃກ້ຄຽງແມ່ນສູງພໍສົມຄວນ.
ໃນຂະນະດຽວກັນ
ອັດຕາແລກປ່ຽນກໍບໍ່ມີການເໜັງຕີງແຮງ, ອັດຕາເງິນເຟີ້ກໍຢູ່ໃນລະດັບຕ່ຳ. ພ້ອມກັນນີ້ ການປຸກລະດົມສົ່ງເສີມການປະກອບສ່ວນຂອງພາກສ່ວນຕ່າງໆຂອງສັງຄົມ
ທັງພາຍໃນ ແລະ ຕ່າງປະເທດເຂົ້າໃນການແກ້ໄຂຄວາມທຸກຍາກຍັງເຮັດບໍ່ທັນໄດ້ດີ, ສ່ວນໃຫຍ່ຍັງອີງໃສ່ງົບປະມານຂອງລັດເປັນຫລັກ. ການກຳນົດໂຄງການລົງທຶນຂອງບັນດາຂະແໜງການ ແລະ
ທ້ອງຖິ່ນຍັງບໍ່ມີຈຸດສຸມ ຍັງເຮັດແບບສະເລ່ຍທົ່ວໄປ. ທຶນມີໜ້ອຍໄປແຈກຢາຍໃສ່ຫລາຍໂຄງການ, ສຸດທ້າຍໂຄງການໃດກໍບໍ່ສຳເລັດຂາດຕົວ
ພາໃຫ້ເກີດໜີ້ສິນຕາມມາ. ຂະນະດຽວກັນ
ຕົວແບບໃນການພັດທະນາຢູ່ທ້ອງຖິ່ນຕ່າງໆຍັງມີໜ້ອຍ ຫລາຍບ່ອນກໍບໍ່ທັນພົ້ນເດັ່ນເທົ່າທີ່ຄວນ, ການເຮັດການຜະລິດກະສິກຳເພື່ອເປັນສິນຄ້າຢູ່ບາງທ້ອງຖິ່ນກໍພົບບັນຫາລາຄາ ແລະ
ຕະຫລາດຮອງຮັບ ຈຶ່ງບໍ່ສ້າງແຮງຈູງໃຈກະຕຸ້ນໃຫ້ຄອບຄົວປະຊາຊົນທຳການຜະລິດເປັນສິນຄ້າ, ການສ້າງມູນຄ່າເພີ່ມໃຫ້ສິນຄ້າຍັງມີລັກສະນະຈຳກັດ. ອົງການມະຫາພາກກໍບໍ່ທັນໄດ້ມີນະໂຍບາຍຊຸກຍູ້ຢ່າງຕັ້ງໜ້າ ເປັນຕົ້ນການຊອກຕະຫລາດ, ການຄ້ຳປະກັນລາຄາ ແລະ ການສ້າງນະໂຍບາຍເອື້ອອຳນວຍອື່ນໆ; ການເຮັດວຽກງານ 3 ສ້າງ ເຖິງແມ່ນມີຜົນສຳເລັດຫລາຍດ້ານ, ແຕ່ການມອບສິດ ແລະ
ຄວາມຮັບຜິດຊອບຂອງກະຊວເປົ້າໝາຍເຮັດທົດລອງໃຫ້ແກ່ທ້ອງຖິ່ນຮາກຖານຍັງບໍ່ທັນແຈ້ງການ, ມີລັກສະນະຢຸດໆຢ່ອນ. ບາງທ້ອງຖິ່ນຍັງບໍ່ເປັນເຈົ້າການ ແລະ ກ້າຫານໃນການຮັບເອົາສິດ, ຄວາມຮັບຜິດຊອບ
ແລະ ບາງກະຊວງບໍ່ທັນເອົາໃຈໃສ່ສືບຕໍ່ເຮັດຢ່າງຕໍ່ເນື່ອງ ແລະ ເລິກເຊິ່ງ ຍັງໜັກໄປແຕ່ດ້ານການຄົ້ນຄວ້າຂຶ້ນແຜນໂຄງການພັດທະນາພື້ນຖານໂຄງລ່າງ ເພື່ອສະເໜີເຂົ້າແຜນປະຈຳປີ, ການພັດທະນາແມ່ນຍັງອີງໃສ່ງົບປະມານຂອງລັດ, ສ່ວນການປະກອບສ່ວນຂອງປະຊາຊົນຍັງມີໜ້ອຍ.
ສຳລັບຂົງເຂດວຽກງານວັດທະນະທຳ-ສັງຄົມ, ທ່ານລັດຖະມົນຕີວ່າການກະຊວງແຜນການ ແລະ ການລົງທຶນ ໄດ້ຊີ້ອອກວ່າ: ການເຂົ້າເຖິງການສຶກສາຢູ່ເຂດຊົນນະບົດຫ່າງໄກສອກຫລີກຍັງບໍ່ທົ່ວເຖິງ, ສະຖານທີ່ໂຮງຮຽນຫລາຍແຫ່ງຍັງບໍ່ທັນເປັນບ່ອນດຶງດູດ. ພ້ອມດຽວກັນນັ້ນ
ສິ່ງເອື້ອອຳນວຍຄວາມສະດວກຂອງໂຮງຮຽນຍັງບໍ່ທັນໄດ້ດີ, ໂຮງຮຽນຫລາຍໆແຫ່ງຍັງຂາດຫ້ອງສະໝຸດ, ຫ້ອງທົດລອງ, ປຶ້ມແບບຮຽນ ແລະ ອຸປະກອນສື່ການຮຽນ-ການສອນຍັງມີຈຳກັດ ໂດຍສະເພາະເຂດຊົນນະບົດ,
ສ່ວນທາງດ້ານສາທາລະນະສຸກຍັງມີຄວາມແຕກໂຕນກັນລະຫວ່າງຕົວເມືອງ ແລະ ຊົນນະບົດ,
ການປົກຫຸ້ມການບໍລິການດ້ານປະກັນສຸຂະພາບຍັງຈຳກັດ ປະຊາຊົນຜູ້ທຸກຍາກບໍ່ໄດ້ຮັບການບໍລິການຮັກສາສຸຂະພາບຢູ່ໂຮງໝໍເທົ່າທີ່ຄວນ. ຕໍ່ກັບການຈັດຕັ້ງປະຕິບັດເປົ້າໝາຍສະຫັດສະວັດດ້ານການພັດທະນາ
(MDGs) ຍັງມີບາງເປົ້າໝາຍບໍ່ສາມາດບັນລຸ ແລະ ມີຄວາມສ່ຽງຈະບໍ່ບັນລຸ ເປັນຕົ້ນອັດຕາສ່ວນເດັກນ້ອຍຕ່ຳກວ່າ 5 ປີ
ທີ່ມີນ້ຳໜັກຕ່ຳກວ່າມາດຕະຖານ, ອັດຕາສ່ວນເດັກນ້ອຍຕ່ຳກວ່າ 5 ປີ ທີ່ຂາດສານອາຫານແບບຊ້ຳເຮື້ອ
ຫລື ເຕ້ຍ ແລະ ອັດຕາການຕາຍຂອງເດັກອ່ອນຕ່ຳກວ່າ 1 ປີ ແລະ 5 ປີຍັງມີສູງ.
No comments:
Post a Comment