laophatthananewspaper: ສະຫາຍເລຂາທິການໃຫຍ່ ຈູມມາລີ ໄຊຍະສອນ ໃຫ້ກຽດໂອ້ລົມຜູ້ແທນກອງປະຊຸມໃຫຍ່ແມ່ຍິງລາວທົ່ວປະເທດຄັ້ງທີ VII

ກອງປະຊຸມໃຫຍ່ຜູ້ແທນແມ່ຍິງລາວທົ່ວປະເທດຄັ້ງທີ VII ໄດ້ອັດລົງດ້ວຍຜົນສຳເລັດຈົບງາມໃນຕອນແລງວັນທີ 21 ຕຸລານີ້, ຢູ່ຫໍປະຊຸມແຫ່ງຊາດນະຄອນຫລວງວຽງຈັນ ແລະ ໃນໂອກາດອັນສະຫງ່າລາສີນີ້ ສະຫາຍເລຂາທິການໃຫຍ່, ປະທານປະເທດ ຈູມມາລີ ໄຊຍະສອນ ໄດ້ໃຫ້ກຽດໂອ້ລົມຜູ້ແທນກອງປະຊຸມດັ່ງກ່າວວ່າ: ໃນໄລຍະນີ້ ປະເທດເຮົາພວມສືບຕໍ່ເປີດກວ້າງ ການພົວພັນຮ່ວມມືກັບບັນດາປະເທດໃນພາກພື້ນ, ໃນໂລກ, ເຊື່ອມໂຍງເຂົ້າກັບປະຊາຄົມອາຊຽນ ແລະ ປະເທດເຮົາກໍຈະໄດ້ເປັນປະທານປະຊາຄົມອາຊຽນໃນທ້າຍປີນີ້, ເພື່ອຍາດແຍ່ງ ແລະ ສ້າງສະພາບແວດລ້ອມອັນເອື້ອຍອຳນວຍໃຫ້ພາລະກິດປົກປັກຮັກສາ ແລະ ສ້າງສາປະເທດຊາດ, ໂດຍສະເພາະການພັດທະນາແມ່ຍິງລາວແຕ່ຄຽງຄູ່ກັນນັ້ນ ເມື່ອເບິ່ງເລິກໆແລ້ວຍັງເຫັນວ່າ ມີແມ່ຍິງລາວບັນດາເຜົ່າຈຳນວນບໍ່ໜ້ອຍ ຍັງດຳລົງຊີວິດດ້ວຍຄວາມທຸກຍາກລຳບາກເປັນຕົ້ນຢູ່ເຂດຊົນນະບົດຫ່າງໄກສອກຫລີກ, ເຂດທຸລະກັນດານລະດັບການສຶກສາຍັງຕ່ຳບໍ່ສາມາດເຂົ້າເຖິງການບໍລິການດ້ານສາທາລະນະສຸກໄດ້, ຊີວິດການເປັນຢູ່ຍັງຂາດເຂີນດ້ານວັດຖຸ ແລະ ຈິດໃຈ, ຍັງອອກແຮງງານດ້ວຍຕີນມືທີ່ໜັກໜ່ວງ, ບໍ່ມີອາຊີບທີ່ໝັ້ນຄົງທີ່ສາມາດສ້າງລາຍຮັບໃຫ້ແກ່ຕົນເອງ ແລະ ຄອບຄົວ, ການສຶກສາອົບຮົມການເມືອງແນວຄິດ, ການເຕົ້າໂຮມຄວາມສາມັກຄີ, ການປຸກລະດົມແມ່ຍິງເຂົ້າສັງກັດຢູ່ໃນການຈັດຕັ້ງສະຫະພັນແມ່ຍິງບໍ່ກກວ້າງຂວາງ, ເນື້ອໃນ ແລະ ຮູບການ

ເຄື່ອນໄຫວຂອງສະຫະພັນແມ່ຍິງແຕ່ລະຂັ້ນບໍ່ທັນອຸດົມສົມບູນ ແລະ ຫລາຍຮູບຫລາຍສີເທື່ອ, ການສ້າງຂະບວນການ ແລະ ກິດຈະກຳຕ່າງໆບໍ່ທັນຫລາຍສີສັນ, ຍັງມີແມ່ຍິງຈຳນວນໜຶ່ງທີ່ບໍ່ໄດ້ເຂົ້າສັງກັດການຈັດຕັ້ງສະຫະພັນແມ່ຍິງລາວ. ນອກນັ້ນແລ້ວ ຍັງມີສະພາບຫຍໍ້ທໍ້ຕ່າງໆເກີດຂຶ້ນໃນຖັນແຖວແມ່ຍິງເຮົາເປັນຕົ້ນການຢ່າຮ້າງມີຈຳນວນເພີ່ມຂຶ້ນ, ການເຊື່ອຖືງົມງວາຍ, ສະພາບຕິດການພະນັນ, ຜູ້ຖືກເຄາະຮ້າຍຈາກການຄ້າມະນຸດ ແລະ ຄວາມຮຸນແຮງໃນຮູບແບບຕ່າງໆຕໍ່ແມ່ຍິງ ແລະ ເດັກນ້ອຍຍັງກວມອັດຕາສ່ວນສູງ, ແບບແຜນການດຳລົງຊີວິດການພົວພັນໃນຄອບຄົວ ແລະ ສັງຄົມ, ການນຸ່ງຖື-ແຕ່ງກາຍ ຍັງມີສະພາບແລ່ນນຳຄ່ານິຍົມຂອງຍຸກສະໄໝທີ່ບໍ່ເໝາະກັບຮີດຄອງປະເພນີ ແລະ ມູນເຊື້ອອັນດີງາມຂອງຊາດ ກໍຄືແມ່ຍິງລາວ.

ຄຽງຄູ່ກັນນີ້ ເລຂາທິການໃຫຍ່ ຍັງໄດ້ເນັ້ນໃຫ້ຄະນະສະຫະພັນແມ່ຍິງທຸກຂັ້ນ ໂດຍສະເພາະຄະນະບໍລິຫານງານສູນກາງສະຫະພັນແມ່ຍິງລາວຊຸດທີ VII ນີ້: ຈົ່ງສືບຕໍ່ນຳພາການຈັດຕັ້ງສະຫະພັນແມ່ຍິງ, ສະມາຊິກສະຫະພັນແມ່ຍິງທຸກຂັ້ນປົກປັກຮັກສາ ແລະ ສືບທອດມູນເຊື້ອອັນດີງາມຂອງຊາດ, ຂອງແມ່ຍິງ, ເສີມຂະຫຍາຍຜົນງານ ແລະ ທ່າແຮງບົ່ມຊ້ອນຂອງແມ່ຍິງລາວບັນດາເຜົ່າ, ເປັນເຈົ້າການເຕົ້າໂຮມຄວາມສາມັກຄີ, ປຸກລະດົມແມ່ຍິງບັນດາເຜົ່າເຂົ້າຮ່ວມໃນການຈັດຕັ້ງປະຕິບັດແນວທາງ ແລະ ນະໂຍບາຍຂອງພັກ-ລັດຖະທຳມະນູນ-ກົດໝາຍ, ແຜນພັດທະນາເສດຖະກິດ-ສັງຄົມແຫ່ງຊາດ; ສືກສາອົບຮົມສະມາຊິກສະຫະພັນແມ່ຍິງໃຫ້ມີຄຸນທາດການເມືອງໜັກແໜ້ນ, ມີຄຸນສົມບັດສິນທຳປະຕິວັດ, ມີນ້ຳໃຈຮັກຊາດ, ຮັກລະບອບປະຊາທິປະໄຕປະຊາຊົນ, ຮູ້ຮັກສາກຽດສັກສີຂອງແມ່ຍິງລາວ, ຮູ້ປົກປັກຮັກສາ ແລະ ເສີມຂະຫຍາຍມູນເຊື້ອຂອງແມ່ຍິງລາວ; ເອົາໃຈໃສ່ປັບປຸງການຈັດຕັ້ງຂອງຕົນໃຫ້ມີຄວາມໜັກແໜ້ນເຂັ້ມແຂງໃນທຸກດ້ານ, ປັບປຸງແບບແຜນວິທີນຳພາ, ວິທີເຮັດວຽກໃຫ້ແທດຕົວຈິງ; ໃຫ້ເອົາໃຈໃສ່ ແລະ ຕັ້ງໜ້າປະສານສົມທົບກັບຄະນະພັກ, ອົງການປົກຄອງໃນແຕ່ລະຂັ້ນໃນການສ້າງແຜນກຳນົດ, ແຜນກໍ່ສ້າງ ແລະ ບຳລຸງພະນັກງານເພດຍິງ ແລະ ແມ່ຍິງທົ່ວໄປທັງໄລຍະສັ້ນ ແລະ ຍາວນານ ເພື່ອຍົກລະດັບຄວາມຮູ້ດ້ານທິດສະດີການເມືອງ, ວິຊາຊີບ, ການສຶກສາ ແລະ ໃຫ້ມີສີມືແຮງງານໃຫ້ສາມາດຕອບສະໜອງຕາມຄວາມຮຽກຮ້ອງຕ້ອງການຂອງໜ້າທີ່ວຽກງານໃຫ້ດີຂຶ້ນ, ຈັດຕັ້ງປະຕິບັດເນື້ອໃນຄຳຂວັນ ແລະ ຂໍ້ແຂ່ງຂັນ 3 ດີຂອງສະຫະພັນແມ່ຍິງລາວ ໃຫ້ໄດ້ຮັບຜົນສໍາເລັດຕາມຄາດໝາຍ, ສົມທົບກັບທຸກພາກສ່ວນສ້າງເງື່ອນໄຂເອື້ອອຳນວຍໃຫ້ແມ່ຍິງ ແລະ ເດັກທີ່ມີບັນຫາຢູ່ໃນຄອບຄົວ ແລະ ສັງຄົມໄດ້ເຂົ້າເຖິງຂະບວນການຍຸຕິທຳຫລາຍຂຶ້ນ ແລະ ເພີ່ມທະວີການພົວພັນຮ່ວວມມືກັບອົງການຈັດຕັ້ງແມ່ຍິງຂອງບັນດາປະເທດເພື່ອນມິດໃຫ້ຫລາຍຂຶ້ນ, ເພື່ອຍາດແຍ່ງທຶນຮອນປະສົບການ ແລະ ບົດຮຽນມາພັດທະນາປະເທດເຮົາໃຫ້ຈະເລີນຮຸ່ງເຮືອງຂຶ້ນເລື້ອຍໆ.

ກອງປະຊຸມໃຫຍ່ຜູ້ແທນແມ່ຍິງລາວທົ່ວປະເທດຄັ້ງທີ VIIນີ້ ໄດ້ເປັນເອກກະສັນຢ່າງສົມບູນເລືອກເອົາທ່ານ ດຣ. ນາງ ອິນລາວັນ ແກ້ວບຸນພັນ ເປັນປະທານບໍລິຫານງານສູນກາງສະຫະພັນແມ່ຍິງລາວ, ທ່ານນາງ ບັນດິດ ປະທຸມວັນ, ທ່ານນາງ ທຸມມາລີ ວົງພະຈັນ, ທ່ານນາງ ບົວຈັນ ສີຫານາດ ແລະ ທ່ານນາງ ສິລິກິດ ບຸບຜາ ເປັນຮອງປະທານ, ໃນນັ້ນ ໄດ້ເລືອກເອົາທ່ານນາງ ທຸມມາລີ ວົງພະຈັນ ເປັນປະທານກວດກາຂອງສະຫະພັນແມ່ຍິງລາວຊຸດນີ້.