ກອງປະຊຸມສະໄໝສາມັນເທື່ອທີ
10 ຂອງສະພາແຫ່ງຊາດຊຸດທີ VII, ໄດ້ອັດລົງດ້ວຍຜົນສໍາເລັດຈົບງາມໃນຕອນບ່າຍວັນທີ 25 ທັນວານີ້, ພາຍຫລັງດຳເນີນມາເປັນເວລາ 18 ວັນທີ່ຫໍສະພາແຫ່ງຊາດ, ໂດຍການໃຫ້ກຽດເຂົ້າຮ່ວມຂອງທ່ານເລຂາທິການໃຫຍ່ຄະນະບໍລິຫານງານສູນກາງພັກປະຊາຊົນປະຕິວັດລາວ, ປະທານປະເທດ ຈູມມາລີ
ໄຊຍະສອນ.
ທ່ານປະທານສະພາແຫ່ງຊາດນາງ ປານີ ຢາທໍ່ຕູ້ ໄດ້ກ່າວສູນທອນພົດປິດກອງປະຊຸມຊຶ່ງມີບາງຕອນສໍາຄັນວ່າ: ສະພາແຫ່ງຊາດຊຸດທີ VII ໃກ້ຈະໝົດວາລະໃນບໍ່ເທົ່າໃດເດືອນຂ້າງໜ້ານີ້ ແລະ ຕະຫລດດໄລຍະ 5 ປີຜ່ານມາໃນຖານະເປັນອົງການແຫ່ງສິດ ແລະ ຜົນປະ
ໂຫຍດຂອງປະຊາຊົນສະ ມາຊິກສະພາແຫ່ງຊາດແຕ່ລະທ່ານໄດ້ຍົກສູງຄວາມຮັບຜິດຊອບທາງດ້ານການເມືອງໃນການຄົ້ນຄວ້າພິຈາລະນາ ແລະ ຕົກລົງບັນຫາສຳຄັນຂອງຊາດ, ພ້ອມທັງໄດ້ລົງໃກ້ຊິດຕິດແທດເພື່ອຮັບຟັງຂໍ້ຄິດເຫັນຂອງປະຊາຊົນ ແລະ ນຳສະເໜີຕໍ່ພາກສ່ວນກ່ຽວຂ້ອງພິຈາລະນາແກ້ໄຂຕາມຄວາມເໝາະສົມແລະ ທັນການ.
ພາຍຫລັງກອງປະຊຸມອັດລົງຢ່າງເປັນທາງການ, ທ່ານຮອງປະທານສະພາແຫ່ງຊາດ ສົມພັນ
ແພງຄໍາມີ ກໍໄດ້ຖະແຫລ່ງຜົນສໍາເລັດຂອງກອງປະຊຸມຕໍ່ສື່ມວນຊົນວ່າ: ກອງປະຊຸມດັ່ງກ່າວໄດ້ດໍາເນີນມາແຕ່ວັນທີ 7-25 ທັນວາ 2015 ໂດຍພາຍໃຕ້ການເປັນປະທານຂອງທ່ານປະທານສະພາແຫ່ງຊາດນາງ ປານີ ຢາທໍຕູ້
ແລະ ມີສະມາຊິກສະພາແຫ່ງຊາດໃນແຕ່ລະເຂດເລືອກຕັ້ງເຂົ້າຮ່ວມຢ່າງພ້ອມ ພຽງ, ຊຶ່ງໄດ້ພິຈາລະນາຮັບຮອງເອົາລັດຖະທຳມະນູນສະບັບປັບປຸງປີ
2015 ເຊິ່ງເປັນກົດໝາຍພື້ນ ຖານຂອງຊາດ ເພື່ອເປັນພື້ນຖານໃຫ້ແກ່ການປັບປຸງບູລະນະອົງການອຳນາດລັດໃຫ້ເຂັ້ມແຂງ, ເຮັດໃຫ້ການຄຸ້ມຄອງລັດ-ຄຸ້ມຄອງສັງຄົມດ້ວຍກົດໝາຍມີຄວາມເຂັ້ມງວດ ແລະ ສັກສິດຫລາຍກວ່າເກົ່າ, ໄດ້ພິຈາລະນາຮັບຮອງເອົາກົດໝາຍທັງໝົດ 11 ສະບັບ, ໃນນີ້ມີກົດໝາຍສ້າງໃໝ່ 4 ສະບັບຄື: ກົດໝາຍວ່າດ້ວຍສະພາປະຊາຊົນຂັ້ນແຂວງ, ກົດໝາຍວ່າດ້ວຍພະນັກງານ-ລັດຖະກອນ, ກົດໝາຍວ່າດ້ວຍການຕ້ານການຄ້າມະນຸດ ແລະ ກົດໝາຍວ່າດ້ວຍການປ້ອງກັນຊາດ, ສ່ວນກົດໝາຍປັບປຸງໃໝ່ມີຈຳນວນ 7 ສະບັບຄື: ກົດໝາຍວ່າດ້ວຍສະພາແຫ່ງຊາດ, ກົດໝາຍວ່າດ້ວຍການເລືອກຕັ້ງສະມາຊິກສະພາແຫ່ງຊາດ ແລະ ສະພາປະຊາຊົນຂັ້ນແຂວງ, ກົດໝາຍວ່າດ້ວຍການລົງທຶນຂອງລັດ,
ກົດໝາຍວ່າດ້ວຍງົບປະມານ, ກົດໝາຍວ່າດ້ວຍສ່ວຍສາອາກອນ, ກົດໝາຍວ່າດ້ວຍການປົກຄອງທ້ອງຖິ່ນ ແລະ ກົດໝາຍວ່າດ້ວຍລັດຖະບານ. ນອກຈາກນີ້ຍັງໄດ້ຮັບຟັງລາຍງານຂອງລັດຖະບານກ່ຽວກັບແຜນພັດທະນາເສດຖະກິດ-ສັງຄົມ 5 ປີຄັ້ງທີ VIII
(2016-2020), ຍຸດທະສາດຮອດປີ
2025, ວິໄສທັດຮອດປີ
2030, ການພັດທະນາໂຄງການດາວທຽມລາວ ແລະ ໂຄງການກໍ່ສ້າງເສັ້ນທາງລົດໄຟລາວ-ຈີນ, ການຄຸ້ມຄອງລັດ-ຄຸ້ມຄອງເສດຖະກິດ-ສັງຄົມໃນ
4 ຂະແໜງການຂອງລັດຖະບານຄື: ກະຊວງອຸດສາຫະກຳ ແລະ
ການຄ້າ, ກະຊວງຖະແຫລງຂ່າວ, ວັດທະນະທຳ ແລະ
ທ່ອງທ່ຽວ, ກະ ຊວງປ້ອງກັນຄວາມສະຫງົບ ແລະ ທະນາຄານແຫ່ງ ສປປ ລາວ,ພິຈາລະນາຮັບຮອງເອົາການຈັດຕັ້ງປະຕິບັດວຽກງານທົດລອງ 3 ສ້າງ ແລະ ການເຄື່ອນໄຫວວຽກງານ 5 ປີຂອງສະພາແຫ່ງຊາດຊຸດທີ
VII(2011-2015).
ນອກຈາກນີ,
ກອງປະຊຸມຍັງໄດ້ພິຈາລະນາຮັບຮອງກ່ຽວກັບການກະກຽມບັ້ນເລືອກຕັ້ງສະ ມາຊິກສະພາແຫ່ງຊາດຊຸດທີ VIII, ສະມາຊິກສະພາປະຊາຊົນຂັ້ນແຂວງ ແລະ ການສ້າງຕັ້ງສະພາປະຊາຊົນຂັ້ນທ້ອງຖິ່ນ, ຮັບຮອງບົດລາຍງານຂອງອົງການກວດສອບແຫ່ງລັດກ່ຽວກັບຜົນການກວດສອບບົດສະຫລຸບຂາດຕົວຂອງການປະຕິບັດແຜນງົບປະມານແຫ່ງລັດສົກປີ 2013-2014, ການປະຕິບັດມະຕິຂອງສະພາແຫ່ງຊາດ, ການແກ້ໄຂການລະເມີດ ແລະ ການກວດຄືນຜົນການກວດສອບ, ພິເສດໃນໄລຍະການດຳເນີນກອງປະຊຸມໄດ້ມີປະຊາຊົນສົ່ງຄວາມຄິດເຫັນແລະຂໍສະເໜີຜ່ານໂທລະສັບສາຍດ່ວນສະພາຫລາຍກວ່າ 150 ບັນຫາ, ເຊິ່ງສ່ວນໃຫຍ່ກ່ຽວຂ້ອງກັບສ້ອມແປງຖະໜົນຫົນທາງ, ເງິນອຸດໜູນ ແລະ ເງິນນະໂຍບາຍຕ່າງໆ, ເຊິ່ງສະພາແຫ່ງຊາດໄດ້ສະຫລຸບສັງລວມ ແລະມອບໃຫ້ພາກສ່ວນກ່ຽວຂ້ອງໃຫ້ຄວາມກະຈ່າງແຈ້ງຜ່ານທາງສື່ມວນຊົນແລ້ວຈໍານວນໜຶ່ງ.
No comments:
Post a Comment