ກອງປະຊຸມຄັ້ງທີ 38 ຂອງຄະນະກຳມະການຮ່ວມມືລາວ-ຫວຽດນາມ ໄດ້ຈັດຂຶ້ນໃນວັນທີ 25-27 ທັນວານີ້ທີ່ນະຄອນຫລວງວຽງຈັນພາຍໃຕ້ການເປັນປະທານຮ່ວມຂອງທ່ານສົມສະຫວາດ ເລັ່ງສະຫວັດຮອງນາຍົກລັດຖະມົນຕີ, ຜູ້ຊີ້ນຳຂົງເຂດວຽກງານເສດຖະກິດການຜະລິດ ແລະຈໍລະຈອນທັງເປັນປະທານຄະນະກຳມະການຮ່ວມມືລາວ-ຫວຽດນາມ ແລະທ່ານຫງວຽນຊວນຟຸກຮອງນາຍົກລັດຖະມົນຕີ, ປະທານຄະນະກຳມະການຮ່ວມມື
ຫວຽດນາມ-ລາວ ໂດຍການເຂົ້າຮ່ວມຂອງລັດຖະມົນຕີກະຊວງ
ແລະຂະແໜງການກ່ຽວຂ້ອງຕ່າງໆພ້ອມບັນດາເຈົ້າແຂວງຂອງສອງປະເທດເຂົ້າຮ່ວມຢ່າງພ້ອມພຽງ.
ກອງປະຊຸມທີ່ໄດ້ດຳເນີນໄປດ້ວຍບັນຍາກາດອັນອົບອຸ່ນ ແລະ ສະໜິດສະໜົມນັ້ນຕ່າງກໍໄດ້ຕີລາຄາສູງຕໍ່ຜົນສຳເລັດການພົວພັນຮ່ວມມືສອງຝ່າຍໃນໄລຍະຜ່ານມາ
ໂດຍສະເພາະແມ່ນເປັນການ ຈັດຕັ້ງປະຕິບັດເນື້ອໃນຈິດໃຈກອງປະຊຸມຄັ້ງທີ 37 ຜ່ານມາ
ແລະ ສັນຍາວ່າດ້ວຍການຮ່ວມມືທະວີພາຄີລະຫວ່າງສອງລັດຖະບານໃນປີ
2015 ແລະ ເຫັນວ່າມີຫລາຍອັນສາມາດບັນລຸຜົນສຳເລັດຕາມລະດັບຄາດໝາຍວາງໄວ້ເປັນຢ່າງດີ, ໄດ້ປະກອບສ່ວນສຳຄັນເຂົ້າໃນການຮັດແໜ້ນມູນເຊື້ອຄວາມສາມັກຄີແບບພິເສດ ແລະການຮ່ວມມືຮອບດ້ານລະຫວ່າງສອງພັກ, ລັດຖະບານ ແລະປະຊາຊົນສອງຊາດລາວ-ຫວຽດນາມນັບມື້ແຕກດອກອອກຜົນງອກງາມຍິ່ງໆຂຶ້ນ.
ກອງປະຊຸມຄັ້ງນີ້ຍັງໄດ້ພ້ອມກັນປຶກສາຫາລື ແລະ ເປັນເອກະພາບກັບທິດທາງແຜນການຮ່ວມມືທະວີພາຄີໄລຍະປີ 2016-2020 ແລະ ແຜນຮ່ວມມືປະຈຳປີ 2016 ໃຫ້ສອດຄ່ອງກັບສະພາບຄວາມເປັນຈິງຂອງທັງສອງຝ່າຍ ແນໃສ່ປະຕິບັດບັນດາຂໍ້ຕົກລົງຂອງກົມການເມືອງສອງຝ່າຍ ແລະສັນຍາຮ່ວມມືທະວີພາຄີລະຫວ່າງລັດຖະບານສອງປະເທດໃຫ້ປາກົດຜົນເປັນຈິງຄືເຮັດໃຫ້ຕົວເລກຄາດໝາຍການຄ້າລະຫວ່າງສອງປະເທດບັນລຸຜົນ 2 ຕື້ໂດລາໃນແຕ່ລະປີ, ຝ່າຍຫວຽດນາມເຫັນດີເພີ່ມທຶນການສຶກສາໃຫ້ແກ່ລາວ, ແຕ່ຂະນະດຽວກັນນັ້ນກໍສະເໜີໃຫ້ກະຊວງສຶກສາສອງຝ່າຍປະສານສົມທົບກັນໃນການຄັດເລືອກນັກຮຽນໄປຮຽນທັງທຶນສ່ວນຕົວ, ທຶນແຮກສ່ຽວ ແລະ ທຶນໃນແຜນໃຫ້ຮັບປະກັນຄຸນນະພາບ, ສອງຝ່າຍເຫັນດີກວດກາຄືນໃນການສ້າງເງື່ອນໄຂສະດວກໃຫ້ແກ່ການນຳໃຊ້ທ່າເຮືອຫວຸງອ່າງໃຫ້ມີປະສິດທິຜົນສູງສຸດ ແລະສືບຕໍ່ສ້າງເງື່ອນໄຂໃຫ້ແກ່ໂຄງການສ້າງທໍ່ສົ່ງນ້ຳມັນແຕ່ທ່າເຮືອຫວຸງອ່າງເຂົ້າມາລາວໃຫ້ປາກົດຜົນເປັນຈິງ ແລະ ບັນຫາສຳຄັນອື່ນໆອີກໃນການກະຕຸກຊຸກຍູ້ ແລະສ້າງເງື່ອນໄຂໃຫ້ແກ່ການລົງທຶນສອງຝ່າຍມີປະສິດທິຜົນສູງຂຶ້ນ.
ໃນໂອກາດດຳເນີນກອງປະຊຸມສຳຄັນດັ່ງກ່າວ, ທ່ານຮອງນາຍົກລັດຖະມົນຕີ ສົມສະຫວາດ ເລັ່ງສະຫວັດ ແລະ
ຫງວຽນຊວນຟຸກ ຮອງນາຍົກລັດຖະມົນຕີ ສສ
ຫວຽດນາມ ກໍໄດ້ມີຄຳເຫັນ ແລະ ຕີລາຄາສູງຕໍ່ໝາກຜົນການພົວພັນຮ່ວມມືຊ່ວຍເຫລືອເຊິ່ງກັນ ແລະ ກັນລະຫວ່າງສອງປະທານປະເທດອັນເປັນປັດໄຈສຳຄັນໃນການເພີ່ມພູນຄູນສ້າງມູນເຊື້ອການພົວພັນມິດຕະພາບ, ຄວາມສາມັກຄີແບບພິເສດ ແລະ ການຮ່ວມມືຮອບດ້ານລະຫວ່າງສອງປະເທດ ແລະ ປະຊາຊົນສອງຊາດນັບມື້ແຕກດອກອອກຜົນງອກງາມຍິ່ງໆຂຶ້ນ ແລະ ໃນໂອກາດອັນສຳຫງ່າລ່າສີນີ້, ທ່ານຮອງນາຍົກລັດຖະມົນຕີສົມສະຫວາດ ເລັ່ງສະຫວັດ ໄດ້ກ່າວສະແດງຄວາມຮູ້ບຸນຄຸນ ແລະ ຂອບອົກຂອບໃຈຢ່າງເລິກເຊິ່ງຕໍ່ພັກ, ລັດຖະບານ ແລະ ປະຊາຊົນຫວຽດນາມ ເຊິ່ງຍາມໃດກໍໄດ້ເຊີດຊູນ້ຳໃຈສາກົນອັນຜ່ອງໃສ, ຄວາມສາມັກຄີພິເສດ, ໃຫ້ການສະໜັບສະໜູນຊ່ວຍເຫລືອອັນໃຫຍ່ຫລວງ, ມີຜົນສັກສິດ ແລະ ທັນການແກ່ ສປປ ລາວ
ໃນການສ້າງສາພັດທະນາປະເທດຊາດຂອງຕົນໂດຍດີຕະຫລອດມາ.
No comments:
Post a Comment