ບໍລິສັດພູສີຫລວງພະບາງກໍ່ສ້າງ ແລະ ສ້ອມແປງຂົວ-ທາງຈຳກັດຜູ້ດຽວ(PSC), ໄດ້ແຕ່ງ ຕັ້ງບໍລິສັດຫລັກຊັບເອພີເອັມລາວຈຳກັດ(APM LAO)ເປັນທີ່ປຶກສາທາງການເງິນ ເພື່ອຈັດໂຄງສ້າງທາງທຸລະກິດກຽມຄວາມພ້ອມເຂົ້າຈົດທະບຽນຕະຫລາດຫລັກຊັບລາວໃນທ້າຍປີ 2016 ເພື່ອຮອງຮັບການຂະຫຍາຍຕົວ ແລະ
ເພີ່ມສັກກະຍະພາບການແຂ່ງຂັນຂອງທຸລະກິດ.
ທ່ານ
ສີທອງ ພົມມະຈິດ ອຳນວຍການໃຫຍ່ບໍລິສັດ ພູສີຫລວງພະບາງ ກໍ່ສ້າງ ແລະ ສ້ອມແປງຂົວ-ທາງຈຳກັດຜູ້ດຽວ ກ່າວວ່າ:
ບໍລິສັດຂອງຕົນມີແຜນທີ່ຈະເຂົ້າຈົດທະບຽນໃນຕະຫລາດຫລັກຊັບລາວ ເພື່ອນຳເງິນທີ່ໄດ້ຈາກການລະດົມທຶນໄປຂະຫຍາຍທຸລະກິດຮັບເໝົາກໍ່ສ້າງທີ່ມີການເຕີບໃຫຍ່ສູງໃນປະເທດ
ແລະ
ສ່ວນໜຶ່ງແມ່ນໃຊ້ເປັນເງິນທຶນໝູນວຽນໃນກິດຈະການ, ເຊິ່ງບໍລິສັດໄດ້ແຕ່ງຕັ້ງ APMLAO ເປັນທີ່ປຶກສາທາງການເງິນ ເພື່ອຈັດໂຄງສ້າງທາງທຸລະກິດ, ໂຄງສ້າງການເງິນ ແລະປັບປຸງມາດຕະຖານບັນຊີ ເພື່ອໃຫ້ສອດຄ່ອງກັບຫລັກການເພື່ອກຽມຄວາມພ້ອມເຂົ້າລະດົມທຶນ ແລະ ວາງແຜນທຸລະກິດ, ເຊິ່ງຈະຊ່ວຍເພີ່ມໂອກາດການແຂ່ງຂັນໃນອຸດສາຫະກຳກໍ່ສ້າງໄດ້ຢ່າງແຂງແຮງ, ຊຶ່ງປັດຈຸບັນບໍລິສັດມີໂຄງການທີ່ກຳລັງກໍ່ສ້າງຢູ່ຫລາຍໂຄງການເຊັ່ນ: ກໍ່ສ້າງຖະໜົນລຽບແຄມຂອງຢູ່ຫລວງພະບາງມີມູນຄ່າປະມານ 43 ລ້ານໂດລາສະຫະລັດ,ກໍ່ສ້າງຖະໜົນໃນແຂວງຫລວງພະບາງມູນຄ່າ 10 ລ້ານໂດລາສະຫະລັດ, ກໍ່ສ້າງຖະໜົນລຽບຊາຍແດນລາວ-ກຳປູເຈຍທີ່ແຂວງອັດຕະປືມີມູນຄ່າ
60 ລ້ານໂດລາສະຫະລັດ ແລະ
ໃນປີ
2016 ບໍລິສັດມີໂຄງການກໍ່ສ້າງຖະໜົນທີ່ແຂວງຫລວງພະບາງອີກຈໍານວນໜຶ່ງທີ່ມີມູນຄ່າຫລາຍກວ່າ
30 ລ້ານໂດລາສະຫະລັດ, ໂຄງການກໍ່ສ້າງກັນຕະຝັ່ງເຈື່ອນມູນຄ່າຫລາຍກວ່າ 70 ລ້ານໂດລາສະຫະລັດ, ໂຄງການປັບປຸງສະໜາມບິນແຂວງບໍ່ແກ້ວທີ່ມີມູນຄ່າ
30 ລ້ານໂດລາສະຫະລັດ.
ທ່ານ
ສີທອງ ພົມມະຈິດ
ກ່າວວ່າ: ບໍລິສັດພວກເຮົາດໍາເນີນທຸລະກິດກໍ່ສ້າງເປັນຫລັກ, ເຊິ່ງມີສັດສ່ວນລາຍໄດ້ຈາກການຮັບເໝົາກໍ່ສ້າງກວມຫລາຍກວ່າ 80% ຂອງລາຍໄດ້ທັງໝົດຂອງກຸ່ມບໍລິສັດ,ນອກຈາກນີ້ບໍລິສັດຍັງໄດ້ຮັບສຳປະທານເຂື່ອນໄຟຟ້າຈາກລັດຖະບານອີກ 2 ແຫ່ງ, ເຊິ່ງມີໄລຍະສຳປະທານ 30 ປີ, ມີທຸລະກິດບໍລິການສະຖານີນ້ຳມັນພາຍໃຕ້ເຄື່ອງໝາຍການຄ້າ “PLP” ເຊິ່ງມີຍອດຂາຍປະມານ 4-5 ລ້ານລິດຕໍ່ເດືອນ ແລະ ມີທຸລະກິດສຳປະທານບໍ່ແຮ່ອີກຈໍານວນໜຶ່ງ.
ທ່ານ ສົມພົບ
ສັກພັນພະນົມ ອຳນວຍການໃຫຍ່ບໍລິສັດຫລັກຊັບເອພີເອັມລາວຈຳກັດ (APMLAO) ກ່າວວ່າ: ນັບວ່າເປັນໂອກາດດີທີ່ໄດ້ຮ່ວມງານກັບບໍລິສັດພູສີ
ເຊິ່ງເປັນບໍລິສັດທີ່ມີສັກກາຍະພາບເຕີບໃຫຍ່ສູງ, ແລະ ມີປະສົບການໃນການດຳເນີນທຸລະກິດມາແລ້ວຫລາຍກວ່າ 20 ປີ ແລະAPMLAO ຈະເຂົ້າມາຊ່ວຍໃນການຈັດໂຄງສ້າງທາງທຸລະກິດ ແລະ ໂຄງສ້າງທາງການເງິນໃຫ້ມີຄວາມເໝາະສົມໄປຕາມຫລັກເກນລວມເຖິງຊ່ວຍຈັດຫາແຫລ່ງທຶນທີ່ເໝາະສົມ ເພື່ອຂະຫຍາຍທຸລະກິດທີ່ດຳເນີນການຢູ່ ແລະ ຫາລືໃນການກຽມຄວາມພ້ອມ ເພື່ອເຂົ້າຈົດທະບຽນໃນຕະຫລາດຫລັກຊັບລາວ ແລະ ຄາດວ່າຈະສາມາດຍື່ນຄຳຂໍອະນຸຍາດສະເໜີຂາຍຮຸ້ນເພີ່ມທຶນຕໍ່ມວນຊົນຄັ້ງທຳອິດຕໍ່ສຳນັກງານຄະນະກຳມະການຄຸ້ມຄອງຫລັກຊັບ (ຄຄຊ) ເພື່ອລະດົມທຶນໄດ້ພາຍໃນຕົ້ນປີ 2016 ເພື່ອສ້າງໂອກາດໃນການຂະຫຍາຍທຸລະກິດຂອງບໍລິສັດໃນອະນາຄົດ.
No comments:
Post a Comment