ໃນວັນທີ 22 ທັນວານີ້, ເຊິ່ງເປັນອາທິດສຸດທ້າຍ ຂອງການດຳເນີນກອງປະຊຸມສະໄໝສາມັນເທື່ອທີ
10 ຂອງສະພາແຫ່ງຊາດຊຸດທີ 7, ພາຍໃຕ້ການເປັນປະທານຂອງທ່ານນາງ ປານີ ຢາທໍ່ຕູ້ ປະ ທານສະພາແຫ່ງຊາດ, ໃນຕອນເຊົ້າ ທ່ານ ຄຳໝັ້ນ ສູນວິເລີດ ລັດຖະມົນຕີວ່າການກະຊວງພາຍໃນ
ໄດ້ຂຶ້ນຜ່ານບົດລາຍງານຜົນການຈັດຕັ້ງປະຕິບັດວຽກງານ 3 ສ້າງໃນຜ່ານມາວ່າ: ພາຍຫລັງ
ມີມະຕິ 03/ກມສພ ວ່າດ້ວຍ 3 ສ້າງ ຄະນະຮັບຜິດຊອບວຽກງານດັ່ງກ່າວ ກໍໄດ້ຄົ້ນຄວ້າເຊື່ອມຊຶມ ແລະ ຫັນເອົາເນື້ອໃນມະຕິດັ່ງກ່າວເປັນນິຕິກຳ,
ເປັນແຜນການ, ໂຄງການຕ່າງໆຢ່າງລະອຽດ ແລະ ຄົບຊຸດພໍສົມຄວນ ເພື່ອນຳມາຜັນຂະຫຍາຍເຂົ້າສູ່ຕົວຈິງ, ພ້ອມນັ້ນ ກໍໄດ້ມີການຈັດຕັ້ງປະຕິບັດຕົວຈິງຢ່າງມີຈຸດສຸມຢູ່ໃນ 52 ເມືອງ ແລະ 109 ບ້ານໃນທົ່ວປະເທດ, ຕະຫລອດໄລຍະຂອງການຈັດຕັ້ງປະຕິບັດການເຮັດທົດລອງ 3 ສ້າງ, ຄະນະຮັບຜິດຊອບຊີ້ນຳເຮັດທົດລອງ 3 ສ້າງຂັ້ນຕ່າງໆ ໄດ້ເອົາໃຈໃສ່ຊີ້ນຳ-ນຳພາ, ຕິດຕາມ, ຊຸກຍູ້, ກວດກາ ແລະ ຖອດຖອນບົດຮຽນໃນການດຳເນີນກອງປະຊຸມຕ່າງໆ
ເພື່ອເປັນແຮງກະຕຸກຊຸກຍູ້ໃຫ້ການຈັດຕັ້ງປະຕິບັດວຽກງານດັ່ງກ່າວ ໃຫ້ໄດ້ຮັບຜົນສຳເລັດດີຂຶ້ນເທື່ອລະກ້າວ ແລະ ເຫັນວ່າ ປະຊາຊົນມີຄວາມກະຕືລືລົ້ນ, ເປັນເຈົ້າການເຂົ້າຮ່ວມໃນການພັດທະນາ ເພາະເຂົາເຈົ້າໄດ້ຮັບຜົນປະໂຫຍດຕົວຈິງ ຈາກ 3 ສ້າງ ເປັນຕົ້ນຜົນປະໂຫຍດຈາກການລົງທຶນຂອງລັດ ເຂົ້າໃສ່ການພັດທະນາໃນດ້ານຕ່າງໆຢູ່ໃນເມືອງ ແລະ ບ້ານເປົ້າໝາຍເຮັດທົດລອງ 3 ສ້າງ, ຜົນປະໂຫຍດຈາກການໃຫ້ສິນເຊື່ອຂອງທະນາຄານ ເພື່ອສົ່ງເສີມການຜະລິດເປັນສິນຄ້າແກ້ໄຂຄວາມທຸກຍາກ, ຜົນປະໂຫຍດຈາກການຈັດຕັ້ງຝຶກອົບຮົມ ໃຫ້ການຊ່ວຍເຫລືອແນະນຳທາງດ້ານວິຊາການຕ່າງໆ, ຜົນປະໂຫຍດຈາກການເຂົ້າຮ່ວມຂອງພາກທຸລະກິດ ແລະ ອື່ນໆ. ໃນ
2-3 ປີຜ່ານມາແມ່ນມີໂຄງການພັດທະນາເສດຖະກິດ-ສັງຄົມ ດ້ວຍການລົງທຶນຂອງລັດທັງໝົດ 943 ໂຄງການ, ລວມມີມູນຄ່າ 248 ຕື້ກີບ. ນອກນັ້ນ ກໍມີກຸ່ມການຜະລິດເປັນສິນຄ້າຂອງປະຊາຊົນບັນດາເຜົ່າໃນບ້ານເປົ້າໝາຍໄດ້ຮັບການສະໜອງສິນເຊື່ອມຈາກທະນາຄານນະໂຍບາຍ ຈຳນວນ
332.615 ຕື້ກີບ ຮອດເດືອນສິງຫາ 2015 ແລະ ທະນາຄານ
ສົ່ງເສີມກະສິກຳ ຈຳນວນ
44.701 ຕື້ກີບ ຮອດວັນທີ
20 ກໍລະກົດ 2015 ເພື່ອເປັນການຊຸກຍູ້ສົ່ງເສີມການຜະລິດເປັນສິນຄ້າ ແລະ ການສ້າງບ້ານພັດທະນາ ໄດ້ເຮັດໃຫ້ການຈັດຕັ້ງນຳພາ, ການບໍລິຫານຄຸ້ມຄອງຢູ່ຂັ້ນເມືອງ ແລະ ຮາກຖານບ້ານ ໄດ້ຮັບການປັບປຸງຍົກລະດັບ ກາຍເປັນປັດໄຈກະຕຸກຊຸກຍູ້ການພັດທະນາຊົນນະບົດໃຫ້ມີໃບໜ້າໃໝ່,
ການຜະລິດເປັນສິນຄ້າໄດ້ມີການຈັດຕັ້ງເປັນກຸ່ມຕິດພັນກັບການຊ່ວຍໜູນຂອງນັກວິຊາການ, ສິນເຊື່ອ ແລະ ການຕະຫລາດ, ໄດ້ມີໜໍ່ແໜງເກີດຂຶ້ນດ້ວຍຄວາມຍືນຍົງ.
ຕາມການປະເມີນຄວາມທຸກຍາກ ແລະ ການພັດທະນາ ປີ
2014 ເຫັນວ່າ: ຢູ່ໃນບ້ານເຮັດທົດລອງ 3 ສ້າງໃນ 109 ບ້ານມີບ້ານພັດທະນາ 93 ບ້ານ, ມີຄອບຄົວພັດທະນາ 28.452 ຄອບຄົວ ໃນຈຳນວນຄອບຄົວທັງໝົດ 30.995 ຄອບຄົວ, ມີບ້ານຕົວແບບດີເດັ່ນ 72 ບ້ານ, ຄອບຄົວຕົວແບບດີເດັ່ນ 544 ຄອບຄົວ, ມີຜູ້ປະກອບການດີເດັ່ນ 144 ຄົນ ແລະ ນັກພັດທະນາດີເດັ່ນ 614 ຄົນ. ໃນ
109 ບ້ານນີ້ ມີ
47 ບ້ານທີ່ນອນຢູ່ໃນ 64 ຈຸດສຸມ ບູລິມະສິດຂອງລັດຖະບານ ແລະ ມີ
8 ບ້ານທີ່ນອນຢູ່ໃນ
167 ຈຸດຈັດສັນພູມລຳເນົາ ທີ່ສາມາດສ້າງເປັນຕົວເມືອງນ້ອຍໃນຊົນນະບົດເປັນຮູບປະທຳຫລາຍຂຶ້ນ.
No comments:
Post a Comment